བསྒོམ་པ་རྣམ་པར་བསྒོམ་པའི་དོན་དུ་དེ་མྱི་དམྱིགས་པའི་ཚུལ་གྱིས་མྱི་འཇིགས་པ་བཞི་སྒོམ་མོ། །རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བ་མ་འདྲེས་པས་བསྒོམ་པ་རྣམ་པ་བསྒོམ་པའི་དོན་དུ། དེ་མྱི་དམིགས་པའི་ཚུལ་གྱིས་སོ་སོ་ཡང་དག་པར་རིག་པ་བཞི་སྒོམ་མོ། །རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བ་མ་འདྲེས་པས་བསྒོམ་པ་རྣམ་པ་བསྒོམ་པའི་དོན་དུ་དེ་མི་དམྱིགས་པའི་ཚུལ་གྱིས་སྙིང་རྗེ་ཆེན་པོ་སྒོམ་མོ། །རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བ་མ་འདྲེས་པས་བསྒོམ་པ་རྣམ་པ་བསྒོམ་པའི་དོན་དུ། དེ་མི་དམྱིགས་པའི་ཚུལ་གྱིས་སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་སྒོམ་མོ། །ཚེ་དང་ལྡན་པ་ཤ་ར་དྭ་ཏིའི་བུ་དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་ཡང་དག་པར་གནས་ཞེས་བྱའོ། །ཚེ་དང་ལྡན་པ་ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས། འདི་ལྟར་བྱང་ཆུབ་སེམས་དཔའ་དམྱིགས་སུ་མེད་པའི་ཕྱིར་འདི་ལྟ་སྟེ། བྱང་ཆུབ་སེམས་དཔའ་ཞེས་བྱ་བ་འདི་ནི་ཐ་སྙད་ཙམ་དུ་ཟད་དོ་ཞེས་བྱ་པར་ཤེས་སོ། །གཟུགས་དམྱིགས་སུ་མྱེད་པའི་ཕྱིར་གཟུགས་ཞེས་བྱ་བ་འདི་ནི་མྱིང་ཙམ་དུ་ཟད་དོ། །ཚོར་བ་དམྱིགས་སུ་མྱེད་པའི་ཕྱིར། ཚོར་བ་ཞེས་བྱ་བ་འདི་ནི་མྱིང་ཙམ་དུ་ཟད་དོ། །འདུ་ཤེས་དམྱིགས་སུ་མྱེད་པའི་ཕྱིར། འདུ་ཤེས་ཞེས་བྱ་བ་འདི་ནི། མྱིང་ཙམ་དུ་ཟད་དོ། །འདུ་བྱེད་དམྱིགས་སུ་མྱེད་པའི་ཕྱིར་འདུ་བྱེད་ཅེས་བྱ་བ་འདི་ནི་མྱིང་ཙམ་དུ་ཟད་དོ། །རྣམ་པར་ཤེས་པ་དམྱིགས་སུ་མྱེད་པའི་ཕྱིར། རྣམ་པར་ཤེས་པ་ཞེས་བྱ་བ་འདི་ནི་མྱིང་ཙམ་དུ་ཟད་དོ། །མྱིག་དམྱིགས་སུ་མྱེད་པའི་ཕྱིར། མྱིག་ཅེས་བྱ་བ་འདི་ནི་མྱིང་ཙམ་དུ་ཟད་དོ། །རྣ་བ་དམྱིགས་སུ་མྱེད་པའི་ཕྱིར། རྣ་བ་ཞེས་བྱ་བ་འདི་ནི་མྱིང་ཙམ་དུ་ཟད་དོ། །སྣ་དམྱིགས་སུ་མྱེད་པའི་ཕྱིར། སྣ་ཞེས་བྱ་བ་འདི་ནི་མྱིང་ཙམ་དུ་ཟད་དོ། །ལྕེ་དམྱིགས་སུ་མྱེད་པའི་ཕྱིར་ལྕེ་ཞེས་བྱ་བ་འདི་ནི་མྱིང་ཙམ་དུ་ཟད་དོ།