འོང་བ་མྱེད་ཅིང་འབྲོ་བ་མྱེད་པ་དང་། ཀུན་ནས་ཉོན་མོངས་པ་མྱེད་ཅིང་རྣམ་པར་བྱང་བ་མྱེད་པ་དེ་ལ་ཉན་ཐོས་ཀྱི་སེམས་མྱེད་དོ། །རང་སངས་རྒྱས་ཀྱི་སེམས་མྱེད་དོ། །བྱང་ཆུབ་སེམས་དཔའི་སེམས་མྱེད་དོ། །ཡང་དག་པར་རྫོགས་པའི་སངས་རྒྱས་ཀྱི་སེམས་མྱེད་དོ། །ཚེ་དང་ལྡན་པ་ཤ་ར་དྭ་ཏིའི་བུ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མྱི་མཉམ་པ་དང་མཉམ་པ་སྟེ། ཉན་ཐོས་དང་། རང་སངས་རྒྱས་ཐམས་ཅད་དང་། ཐུན་མོང་མ་ཡིན་པའི་སེམས་སོ། །སྨྲས་པ། ཚེ་དང་ལྡན་པ་རབ་འབྱོར་གང་ཁྱོད་ཀྱིས་འདི་སྐད་དུ། ཐམས་ཅད་མཁྱེན་པ་ཉིད་ཀྱི་སེམས་ཟག་པ་མྱེད་པ། ཁོངས་སུ་ཆུད་པ་མྱེད་པ། དེ་ལྟ་བུའི་སེམས་ལ་ཡང་ཆགས་པ་མྱེད་དོ། །ཞེས་སྨྲས་པ་དེ་ནི་དེ་ལྟ་ཡིན་ཏེ། ཚེ་དང་ལྡན་པ་རབ་འབྱོར་དེ་བས་གཟུགས་ཀྱང་ཆགས་པ་མྱེད་དོ། །ཚོར་བ་ཡང་ཆགས་པ་མྱེད་དོ། །འདུ་ཤེས་ཀྱང་ཆགས་པ་མྱེད་དོ། །འདུ་བྱེད་ཀྱང་ཆགས་པ་མྱེད་དོ། །རྣམ་པར་ཤེས་པ་ཡང་ཆགས་པ་མྱེད་དོ། །མྱིག་ཀྱང་ཆགས་པ་མྱེད་དོ། །རྣ་བ་ཡང་ཆགས་པ་མྱེད་དོ། །སྣ་ཡང་ཆགས་པ་མྱེད་དོ། །ལྕེ་ཡང་ཆགས་པ་མྱེད་དོ། །ལུས་ཀྱང་ཆགས་པ་མྱེད་དོ། །ཡིད་ཀྱང་ཆགས་པ་མྱེད་དོ། །གཟུགས་ཀྱང་ཆགས་པ་མྱེད་དོ། །སྒྲ་ཡང་ཆགས་པ་མྱེད་དོ། །དྲི་ཡང་ཆགས་པ་མྱིད་དོ། །རོ་ཡང་ཆགས་པ་མྱེད་དོ། །རེག་ཀྱང་ཆགས་པ་མྱེད་དོ། །ཆོས་ཀྱང་ཆགས་པ་མྱེད་དོ། །ཆོས་ཀྱང་ཆགས་པ་མྱེད་དོ། །མྱིག་གི་རྣམ་པར་ཤེས་པ་ཡང་ཆགས་པ་མྱེད་དོ། །རྣ་བའི་རྣམ་པར་ཤེས་པ་ཡང་ཆགས་པ་མྱེད་དོ། །སྣའི་རྣམ་པར་ཤེས་པ་ཡང་ཆགས་པ་མྱེད་དོ། །ལྕེའི་རྣམ་པར་ཤེས་པ་ཡང་ཆགས་པ་མྱེད་དོ། །ལུས་ཀྱི་རྣམ་པར་ཤེས་པ་ཡང་ཆགས་པ་མྱེད་དོ། །ཡིད་ཀྱི་རྣམ་པར་ཤེས་པ་ཡང་ཆགས་པ་མྱེད་དོ། །མྱིག་འདིས་ཏེ་རེག་པ་ཡང་ཆགས་པ་མྱེད་དོ། །རྣ་བའི་འདུས་ཏེ་རེག་པ་ཡང་ཆགས་པ་མྱེད་དོ། །སྣའི་འདུས་ཏེ་རེག་པ་ཡང་ཆགས་པ་མྱེད་དོ། །ལྕེའི་འདུས་ཏེ་རེག་པ་ཡང་ཆགས་པ་མྱེད་དོ། །ལུས་ཀྱི་འདུས་ཏེ་རེག་པ་ཡང་ཆགས་པ་མྱེད་དོ།