རྣམ་པར་རྣགས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་སྔོས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་པའི་འདུ་ཤེས་དང་། རྣམ་པར་ཚིག་པའི་འདུ་ཤེས་དང་། འཇིག་རྟེན་པའི་བསམ་གཏན་བཞི་དང་། ཚད་མྱེད་པ་བཞི་དང་། གཟུགས་མྱེད་པའི་སྙོམས་པར་འཇུག་པ་བཞི་དང་། མངོན་པར་ཤེས་པ་ལྔ་དང་། འཇིག་རྟེན་པའི་རྗེས་སུ་དྲན་པ་བཅུ་སྟེ་འདི་ལྟར་སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། གཏོང་བ་རྗེས་སུ་དྲན་པ་དང་། ལྷ་རྗེས་སུ་དྲན་པ་དང་། དབུགས་ཕྱི་ནང་དུ་རྒྱུ་བ་རྗེས་སུ་དྲན་པ་དང་། ལུས་ཀྱི་རྣམ་པ་རྗེས་སུ་དྲན་པ་དང་། སྐྱེ་བ་རྗེས་སུ་དྲན་པ་དང་། འཆི་བ་རྗེས་སུ་དྲན་པ་དག་སྟེ། དེ་དག་ནི་འཇིག་རྟེན་པའི་ཆོས་དགེ་བ་ཞེས་བྱའོ། །གསོལ་པ། བཅོམ་ལྡན་འདས་འཇིག་རྟེན་པའི་ཆོས་མྱི་དགེ་བ་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། མྱི་དགེ་བ་བཅུའི་ལས་ཀྱི་ལམ་དག་སྟེ། འདི་ལྟར་རབ་འབྱོར་སྲོག་གཅོད་པ་ནི། འཇིག་རྟེན་པའི་ཆོས་མྱི་དགེ་བའོ། །རབ་འབྱོར་མ་བྱིན་པར་ལེན་པ་ནི་འཇིག་རྟེན་པའི་ཆོས་མྱི་དགེ་བའོ། །རབ་འབྱོར་འདོད་པས་ལོག་པར་གཡེམ་པ་ནི། འཇིག་རྟེན་པའི་ཆོས་མྱི་དགེ་བའོ། །རབ་འབྱོར་བརྫུན་དུ་སྨྲ་བ་ནི། འཇིག་རྟེན་པའི་ཆོས་མྱི་དགེ་བའོ། །རབ་འབྱོར་ཕྲ་མ་ནི་འཇིག་རྟེན་པའི་ཆོས་མི་དགེ་བའོ། །རབ་འབྱོར་ཞེ་གཅོད་པ་ནི་འཇིག་རྟེན་པའི་ཆོས་མྱི་དགེ་བའོ། །རབ་འབྱོར་ཚིག་ཀྱལ་པ་ནི་འཇིག་རྟེན་པའི་ཆོས་མྱི་དགེ་བའོ། །རབ་འབྱོར་ཆགས་སེམས་ནི་འཇིག་རྟེན་པའི་ཆོས་མྱི་དགེ་བའོ། །རབ་འབྱོར་གནོད་སེམས་ནི་འཇིག་རྟེན་པའི་ཆོས་མྱི་དགེ་བའོ། །རབ་འབྱོར་ལོག་པར་ལྟ་བ་ནི། འཇིག་རྟེན་པའི་ཆོས་མྱི་དགེ་བའོ། །ཁྲོ་བ་དང་། མདུད་པར་འཛིན་པ་དང་། འཆབ་པ་དང་། འཚིག་པ་དང་། འཚེ་བ་དང་། ཕྲག་དོག་དང་། སེར་སྣ་དང་། ང་རྒྱལ་དང་།