།གཟུགས་མེད་པའི་ཁམས་ནས་འབྱུང་བ་མ་ཡིན་ནོ། །ཉན་ཐོས་ཀྱི་ས་ནས་འབྱུང་བ་མ་ཡིན་ནོ། །རང་སངས་རྒྱས་ཀྱིས་ནས་འབྱུང་བ་མ་ཡིན་ནོ། །དེ་དག་ནི་ཡིད་མི་ཆེས་པ་སྟེ། ཇི་ལྟར་ཡིད་མི་ཆེས་ཞེ་ན། གཟུགས་གཟུགས་ཀྱིས་སྟོང་ཞེས་བྱ་བར་ཡིད་མི་ཆེས་སོ། །ཚོར་བ་ཚོར་བས་སྟོང་ཞེས་བྱ་བར་ཡིད་མི་ཆེས་སོ། །འདུ་ཤེས་འདུ་ཤེས་ཀྱིས་སྟོང་ཞེས་བྱ་བར་ཡིད་མི་ཆེས་སོ། །འདུ་བྱེད་འདུ་བྱེད་ཀྱིས་སྟོང་ཞེས་བྱ་བར་ཡིད་མི་ཆེས་སོ། །རྣམ་པར་ཤེས་པ་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །མིག་མིག་གིས་སྟོང་ཞེས་བྱ་བར་ཡིད་མི་ཆེས་སོ། །རྣ་བ་རྣ་བས་སྟོང་ཞེས་བྱ་བར་ཡིད་མི་ཆེས་སོ། །སྣ་སྣས་སྟོང་ཞེས་བྱ་བར་ཡིད་མི་ཆེས་སོ། །ལྕེ་ལྕེས་སྟོང་ཞེས་བྱ་བར་ཡིད་མི་ཆེས་སོ། ལུས་ལུས་ཀྱིས་སྟོང་ཞེས་བྱ་བར་ཡིད་མི་ཆེས་སོ། །ཡིད་ཡིད་ཀྱིས་སྟོང་ཞེས་བྱ་བར་ཡིད་མི་ཆེས་སོ། །གཟུགས་གཟུགས་ཀྱིས་སྟོང་ཞེས་བྱ་བར་ཡིད་མི་ཆེས་སོ། །སྒྲ་སྒྲས་སྟོང་ཞེས་བྱ་བར་ཡིད་མི་ཆེས་སོ། །དྲི་དྲིས་སྟོང་ཞེས་བྱ་བར་ཡིད་མི་ཆེས་སོ། །རོ་རོས་སྟོང་ཞེས་བྱ་བར་ཡིད་མི་ཆེས་སོ། །རེག་རེག་གིས་སྟོང་ཞེས་བྱ་བར་ཡིད་མི་ཆེས་སོ། །ཆོས་ཆོས་ཀྱིས་སྟོང་ཞེས་བྱ་བར་ཡིད་མི་ཆེས་སོ། །མིག་གི་རྣམ་པར་ཤེས་པ་མིག་གི་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །རྣ་བའི་རྣམ་པར་ཤེས་པ་རྣ་བའི་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །སྣའི་རྣམ་པར་ཤེས་པ་སྣའི་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །ལྕེའི་རྣམ་པར་ཤེས་པ་ལྕེའི་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །ལུས་ཀྱི་རྣམ་པར་ཤེས་པ་ལུས་ཀྱི་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །ཡིད་ཀྱི་རྣམ་པར་ཤེས་པ་ཡིད་ཀྱི་རྣམ་པར་ཤེས་པས་སྟོང་ཞེས་བྱ་བར་ཡིད་མི་ཆེས་སོ། །མིག་གི་འདུས་ཏེ་རེག་པ་མིག་གི་འདུས་ཏེ་རེག་པས་སྟོང་ཞེས་བྱ་བར་ཡིད་མི་ཆེས་སོ། །རྣ་བའི་འདུས་ཏེ་རེག་པ་རྣ་བའི་འདུས་ཏེ་རེག་པས་སྟོང་ཞེས་བྱ་བར་ཡིད་མི་ཆེས་སོ།