Degé Kangyur volume 94, F.224.a

ཤུད་དྷེ་བི་ཤུ་ད་དྷེ། ཤོ་དྷ་ཡ་བི་ཤོ་དྷ་ཡ་ཧཱུྃ་ཕཊ་སྭཱ་ཧཱ། དེ་ནས་སངས་རྒྱས་ཉིད་ཀྱིས་སུ། །​ལྷ་མོ་ཉིད་ལ་རབ་ཏུ་བསྟོད། །​ཐུགས་རྗེ་ཤིན་ཏུ་ཆེ་བས་འགྲོ་བའི་དོན་མཛད་མ། །​མཚན་དང་དཔེ་བྱད་རྫོགས་ཤིང་རིན་ཆེན་རྒྱན་གྱིས་སྤྲས། །​ཤིན་ཏུ་མཛེས་ཚུལ་འཛུམ་ཞིང་བཞད་པའི་བཞིན། །​སྤྱན་གྱི་སྐྱེ་མཆེད་ཟར་མའི་པདྨ་འདྲ། །​སྙན་གྱི་སྐྱེ་མཆེད་ཨུག་ཅོས་བྱེ་བ་འདྲ། །​ཤངས་ཀྱི་སྐྱེ་མཆེད་ཨུཏྤལ་བུམ་བུ་འདྲ། །​ཞལ་གྱི་མཆེད་ཧ་ལོ་རྒྱས་པ་འདྲ། །​སྣ་ཚོགས་སྐུ་མངའ་ན་ཆུང་མཚན་ལྡན་སྐུ། །​ཆོས་ཀྱི་སྒྲ་སྒྲོགས་ཀ་ལ་པིང་ཀའི་གསུང་། །​སེམས་ཅན་ཀུན་ལ་བྱམས་མགོན་ཐུགས་རྗེའི་ཐུགས། །​འཁོར་བའི་སྐྱོན་གྱིས་མ་གོས་པདྨ་གཡོན། །​སེམས་ཅན་དོན་རྣམས་མཛད་ཕྱིར་སྐྱབས་སྦྱིན་གཡས། །​ཐབས་དང་ཤེས་རབ་ཉི་ཟླའི་གདན་ལ་བཞུགས། །​རྗེ་བཙུན་སྒྲོལ་མ་ལ་ནི་སྐྱབས་སུ་མཆི། །​འཁོར་བའི་གཡང་ས་ཆེ་ལས་བདག་སྐྱོབས་ཤིག །​འགྲོ་དྲུག་རང་ཁའི་གནས་སུ་འཁོར་ར་རེ། །​ཐུགས་རྗེ་ཆེན་མོའི་ཞགས་པས་བདག་ཟུང་ཤིག །​ངན་སོང་གསུམ་གྱི་གནས་སུ་ཤོར་ར་རེ། །​འཁྱམས་མེད་པ་ཡི་ལམ་དུ་བདག་ཆུག་ཤིག །​ལོག་པར་ལྟ་བའི་རིགས་སུ་སྐྱེས་ས་རེ། །​བླ་མ་བྱང་སེམས་མངའ་དང་བདག་སྤྲོད་ཅིག །​བཤེས་གཉེན་ངན་པ་དག་དང་ཕྲད་ཏ་རེའོ། །​སེང་གེ་གླང་ཆེན་མེ་དང་སྦྲུལ། །​མི་རྒོད་ཆུ་དང་རིམས་རྣམས་དང་། །​ཤ་ཟས་འཇིགས་པ་བརྒྱད་པོ་ལས། །​སྐྱོབ་མཛད་ཁྱེད་ལ་ཕྱག་འཚལ་ལོ། །​འཇིག་རྟེན་འདི་དང་གཞན་དག་ཏུ། །​འཇིགས་པ་བརྒྱད་ལས་བསྐྱབ་ཏུ་གསོལ། །​ཕ་རོལ་འབྲས་བུ་མ་ཐོབ་བར་དག་ཏུ། །​སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་དང་། །​བསམ་གཏན་ཤེས་རབ་ཐབས་དང་སྨོན་ལམ་དང་། །​སྟོབས་དང་དེ་བཞིན་ཡེ་ཤེས་ཕ་རོལ་ཕྱིན། །​བཅུ་པོ་དེ་དང་མི་འབྲལ་འགྲོགས་པར་ཤོག །​རིགས་ཀྱི་བུའམ་རིགས་ཀྱི་བུ་མོ་གང་ལ་ལས་ཆོས་འདི་བྲི་བ་དང་། བཀླག་པ་དང་། ཁ་ཏོན་དང་། ཀུན་ཆུབ་པ་དང་། ཚུལ་བཞིན་དུ་ཡིད་ལ་བྱ་བ་དང་། གཞན་དག་ལ་ཡང་རྒྱ་ཆེར་བསྟན་པར་བྱའོ་ཞེས་བཀའ་སྩལ་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh731.html?part=UT22084-094-008-116#UT22084-094-008-116