Degé Kangyur volume 94, F.223.a

།འཇིག་རྟེན་ཕ་རོལ་ཐུར་དུ་འབབ་འགྱུར་ཏེ། །​དུད་འགྲོ་གླེན་ལྐུགས་གཅིག་ལ་གཅིག་ཟ་དང་། །​གྱེན་ཐུར་འབབ་འཛེག་གཡང་ས་ངལ་བའི་ལམ། །​འཇིགས་ཤིང་དངངས་སྐྲག་ཤིན་ཏུ་སྐྱི་གཡའ་བ། །​ཟོན་དང་བཅས་པའི་སྡུག་བསྔལ་བསམ་མི་ཁྱབ། །ཡི་དགས་ལྟོགས་ཤིང་སྐོམ་དང་ལུས་མི་འཚམ། །​བཟའ་བཏུང་སྣང་ཡང་གཞན་གྱིས་བསྲུངས་པ་དང་། །​ཁ་ཅིག་ཟོས་ཀྱང་མེ་དང་མཚོན་དུ་འགྱུར། །​ལྟོགས་ཤིང་སྐོམ་པའི་སྡུག་བསྔལ་བསམ་མི་ཁྱབ། །​དམྱལ་བར་སྐྱེས་པའི་སེམས་ཅན་དེ་དག་ནི། །​རང་དབང་མེད་པར་གཤིན་རྗེ་གདུག་པས་ཁྲིད། །​བསྲེགས་ཤིང་བཙོས་ཏི་མཚོན་གྱིས་རབ་ཏུ་འཐུབ། །​བསྲན་གླགས་མེད་པའི་སྡུག་བསྔལ་ཚ་དང་གྲང་། །​དེས་ན་ཚེ་འདིར་སྡིག་པའི་ལས་བྱེད་པ། །​རང་གིས་རང་ལ་མངན་ནི་ཆེར་བྱས་ཡིན། །​བསྐལ་པ་མང་པོར་སྡུག་བསྔལ་དྲག་པོས་གདུངས། །​ཐར་པའི་དུས་མེད་བསྲན་པའི་གླགས་ཀྱང་མེད། །​དྲན་པ་གསལ་བས་ལས་ཀྱི་འབྲས་བུར་ཤེས། །​སྡུག་བསྔལ་མ་བཟོད་སྨྲེ་སྔགས་རང་ལ་རྨོ། །​སྐད་ངན་དྲག་པོའི་ཀུ་སྒྲས་གཞན་ཡང་སྐྲག །​དེ་ལ་སོགས་ཏེ་སྡུག་བསྔལ་བསམ་མི་ཁྱབ། །​གང་དག་ཉེས་དམིགས་རབ་ཏུ་ཤེས་གྱིས་ལ། །​ངན་སོང་གསུམ་གྱི་རྒྱུ་རྣམས་རབ་ཏུ་སྤངས། །​སྡིག་པའི་རྣམ་པ་ཕྲ་རགས་གང་ལ་ཡང་། །​ལུས་ངག་ཡིད་ཀྱི་སྒོ་ནས་སྤྱད་ཏ་རེ། །​རང་ཡང་བདེ་ལ་འགྲོ་རྣམས་ཡོངས་ལ་ཕན། །​ཆགས་སྡང་རྨོངས་སྤངས་སྙིང་རྗེའི་རྩ་བ་བརྟན། །​སྒོ་གསུམ་དང་བས་འབད་དེ་དགེ་བ་སྤྱད། །​ཤིན་ཏུ་ཟབ་པའི་སྙིང་པོ་འདི་ལ་འབད། །​མེ་ཏོག་སད་ཀྱིས་ཁྱེར་བའི་འབྲས་བུ་ལ། །​སོ་ནམ་བྱས་ཀྱང་མྱུ་གུ་མི་སྐྱེ་ལྟར། །​སྡོམ་ཉམས་ཐེ་ཚོམ་ཟོས་པའི་གང་ཟག་གིས། །​ཤིན་ཏུ་ཟབ་པའི་རིག་སྔགས་བསྒྲུབ་གྱུར་ཀྱང་། །​བྱིན་བརླབས་འབྱུང་ངོ་སྙམ་ཡང་འབྱུང་མི་སྲིད། །​རྩོལ་བ་དེ་དག་ངལ་བ་དོན་མེད་འགྱུར། །​རིག་སྔགས་དེ་ཡང་སྐྱེ་བོའི་ཚིག་དང་མཚུངས། །​ཏིང་འཛིན་རྣམས་ཀྱང་བྱིས་པའི་བསམ་པ་འདྲ། །​སྐྱོན་མེད་སྐྱེས་བུས་རིག་སྔགས་དེ་བསྒྲུབས་ན། །​ཇི་ལྟར་འདོད་པ་བཞིན་དུ་མྱུར་དུ་འགྲུབ།