Degé Kangyur volume 43, F.141.b

།བྱམས་པ་དེ་ལྟ་བས་ན་རྣམ་གྲངས་འདིས་ཀྱང་འདི་ལྟར་བྱང་ཆུབ་སེམས་དཔའ་ཤེས་རབ་སྤྱོད་པ་རྣམས་ཀྱི་སྤྱོད་པ་ནི་འཇིག་རྟེན་ཐམས་ཅད་དང་མི་འཐུན་པར་རིག་པར་བྱའོ། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །​བཅོམ་ལྡན་འདས་ལས་དང་པོ་པའི་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཤེས་རབ་ཀྱི་སྟོབས་བསྐྱེད་པ་ཐོབ་པར་འཚལ་བས་ཆོས་གང་དག་ནི་ཡོངས་སུ་སྤང་བར་བགྱི། ཆོས་གང་དག་ནི་ཀུན་ཏུ་བསྟེན་པར་བགྱི། ཆོས་གང་དག་ཡོངས་སུ་སྤོང་ཞིང་ཀུན་ཏུ་སྟེན་པར་བགྱིད་ན་ཤེས་རབ་ཀྱི་སྟོབས་བསྐྱེད་པ་མ་སྐྱེས་པ་ནི་སྐྱེ་བར་འགྱུར་ལ། སྐྱེས་པ་ཡང་རྣམ་པར་འཕེལ་ཞིང་ཡོངས་སུ་འགྲིབ་པར་མི་འགྱུར་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །​བྱམས་པ་བྱང་ཆུབ་སེམས་དཔའ་ལས་དང་པོ་པས་ཁྱིམ་གྱི་གནས་ནས་མངོན་པར་འབྱུང་བ་དང་། ཤེས་རབ་ཀྱི་སྟོབས་བསྐྱེད་པ་ཐོབ་པ་དང་། རྙེད་པ་དང་། བཀུར་སྟི་ཡོངས་སུ་སྤང་བ་དང་། རྙེད་པ་དང་། བཀུར་སྟིའི་ཉེས་པ་མཐོང་བར་བྱའོ། །​འདུ་འཛི་ལ་དགའ་བ་ཡོངས་སུ་སྤང་བ་དང་། འདུ་འཛི་ལ་དགའ་བའི་ཉེས་པ་མཐོང་བར་བྱའོ། །​སྨྲ་བ་ལ་དགའ་བ་ཡོངས་སུ་སྤང་བ་དང་སྨྲ་བ་ལ་དགའ་བའི་ཉེས་པ་མཐོང་བར་བྱའོ། །​གཉིད་ལ་དགའ་བ་ཡོངས་སུ་སྤང་བ་དང་གཉིད་ལ་དགའ་བའི་ཉེས་པ་མཐོང་བར་བྱའོ། །​ལས་ལ་དགའ་བ་ཡོངས་སུ་སྤང་བ་དང་ལས་ལ་དགའ་བའི་ཉེས་པ་མཐོང་བར་བྱའོ། །​སྤྲོས་པ་ལ་དགའ་བ་ཡོངས་སུ་སྤང་བ་དང་སྤྲོས་པ་ལ་དགའ་བའི་ཉེས་པ་མཐོང་བར་བྱའོ། །​རྙེད་པ་དང་། བཀུར་སྟི་དང་ཚིགས་སུ་བཅད་པ་ཡོངས་སུ་སྤངས་པ་དེས་ནི་འདོད་པ་ཆུང་བ་བསྒོམ་པར་བྱའོ། །​འདུ་འཛི་ལ་དགའ་བ་ཡོངས་སུ་སྤངས་པས་ནི་གཅིག་པུར་དགའ་བ་ཀུན་ཏུ་བསྟེན་པར་བྱའོ། །​སྨྲ་བ་ལ་དགའ་བ་ཡོངས་སུ་སྤངས་པས་ནི་དོན་ལ་རྟོག་པ་ཀུན་ཏུ་བསྟེན་པར་བྱའོ། །​གཉིད་ལ་དགའ་བ་ཡོངས་སུ་སྤངས་པས་ནི་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བ་ཀུན་ཏུ་བསྟེན་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh69.html?part=UT22084-043-006-432#UT22084-043-006-432