གཞན་ཡང་ཆོས་བརྒྱད་འཐོབ་པར་འགྱུར་ཏེ་བརྒྱད་གང་ཞེ་ན། འགུམ་པའི་དུས་སུ་འཕགས་པ་སྤྱན་རས་གཟིགས་དབང་ཕྱུག་དགེ་སློང་གི་གཟུགས་སུ་མངོན་སུམ་དུ་ཞལ་སྟོན་པར་འགྱུར་རོ། །བདེ་བར་འཆི་བའི་དུས་བྱེད་པར་འགྱུར་རོ། །ལྟ་བ་འཁྲུལ་པར་མི་འགྱུར་རོ། །ལག་པ་མི་གཡོབ་པ་དང་རྐང་པ་མི་གཡོབ་པ་དང་བཤང་གཅི་མ་མཆིས་པ་དང་ཁྲིའི་སྟེང་དུ་འཆི་བའི་དུས་བྱེད་པར་འགྱུར་རོ། །དྲན་པ་ཤིན་ཏུ་ཉེ་བར་གནས་པར་འགྱུར་རོ། །ཁ་བུབ་ཏུ་འཆི་བའི་དུས་བྱེད་པར་མི་འགྱུར་རོ། །འགུམ་པའི་དུས་ན་ཡང་སྤོབས་པ་མི་བས་པར་འགྱུར་རོ། །དེ་ཡང་སངས་རྒྱས་ཀྱི་ཞིང་གང་དུ་སྨོན་པ་དེར་སྐྱེ་བར་འགྱུར་ཞིང་དགེ་བའི་བཤེས་གཉེན་དང་ཡང་འབྲལ་བར་མི་འགྱུར་རོ། །ཉིན་གཅིག་བཞིན་དུ་དུས་གསུམ་དུ་ལན་གསུམ་དུ་བཟླས་བརྗོད་བགྱིའོ། །ཆང་དང་ཤ་དང་ཀུན་དོང་དང་ཀེའུ་དང་སྒོག་སྐྱ་དང་། འདྲེས་པ་དང་། ལྷག་རོལ་དང་། །འདི་རྣམས་ཁྱད་པར་དུ་དོན་དུ་གཉེར་བས་སྤང་བར་བགྱིའོ། །དོན་ཡོད་པའི་ཞགས་པའི་སྙིང་པོའི་ཆོས་ཀྱི་རྣམ་གྲངས་འདི་ཡང་སེམས་ཅན་རྣམས་ལ་མཐུ་མཆིས་པ་དང་། མཐུ་མ་མཆིས་པར་འཚལ་བར་བགྱིས་ནས་བསྒྲག་པར་བགྱིའོ། །སློབ་དཔོན་གྱིས་དཔེ་མཁྱུད་མི་བགྱིའོ། །འདི་ལྟར་དྲི་མ་དང་བྲལ་ཞིང་ཕྲག་དོག་དང་སེར་སྣ་སྤངས་པ་ནི། བྱང་ཆུབ་སེམས་དཔའ་རྣམས་ལགས་ཏེ། སེམས་ཅན་རྣམས་ཀྱི་དོན་བགྱི་བའི་སླད་དུ་སངས་རྒྱས་ཀྱི་བྱང་ཆུབ་འཐོབ་པར་འགྱུར་བས། བྱང་ཆུབ་སེམས་དཔའ་རྣམས་ཀྱི་ཚོགས་ཀྱི་ནང་དུ་གཏོགས་སོ། །བྱང་ཆུབ་ཅེས་བགྱི་བ་ནི་ཤེས་རབ་ལགས། སེམས་དཔའ་ཞེས་བགྱི་བ་ནི་ཐབས་ལགས་ཏེ། ཆོས་འདི་གཉིས་སེམས་ཅན་རྣམས་ཀྱི་དོན་བགྱི་བའི་སླད་དུ་ཁོ་ནས་ཐོབ་པ་ལགས་སོ། །གལ་ཏེ་བཅོམ་ལྡན་འདས་ཀྱིས་བདག་ལ་རྗེས་སུ་གནང་ན། འདི་ལྟར་བདག་གིས་སྙིང་པོ་འདི་དེ་བཞིན་གཤེགས་པའི་སྤྱན་སྔར་འཁོར་བཞི་རྣམས་དང་གཞན་སྡིག་པ་སྤྱོད་པ་རྣམས་ཀྱི་དོན་དང་། སྨན་པ་དང་བདེ་བའི་སླད་དུ་བསྒྲག་པར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །