དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དགེ་སློང་ཉེ་བར་འཁོར་འདི་འདུལ་བ་ལ་མཁས་པ་ཉན་པར་འདོད་ཀྱིས་ཤིན་ཏུ་དུལ་བ་ལས་རྩོམས་ཏེ་ཁྱོད་སློབས་པར་གྱིས་ཤིག །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཉེ་བར་འཁོར་ལ་འདི་སྐད་ཅེས་སྨྲས་སོ། །བཙུན་པ་ཉེ་བར་འཁོར་ཆོས་ཐམས་ཅད་ནི་ཤིན་ཏུ་དུལ་བ་སྟེ། རང་གི་སེམས་གདུལ་བའི་ཕྱིར་ཤིན་ཏུ་དུལ་བ་ཀུན་ཏུ་སྟོན་ཏོ། །ཆོས་ཐམས་ཅད་ནི་ཀུན་ནས་ཉོན་མོངས་པ་ཅན་མ་ཡིན་པ་སྟེ་བདག་མི་དམིགས་པའི་ཕྱིར་འགྱོད་པ་འདུལ་བ་ཀུན་ཏུ་སྟོན་ཏོ། །ཆོས་ཐམས་ཅད་ནི་ཕྱིན་ཅི་མ་ལོག་པ་སྟེ། རང་བཞིན་གྱིས་ཡོངས་སུ་དག་པའི་ཕྱིར་ཤིན་ཏུ་དུལ་བ་ཀུན་ཏུ་སྟོན་ཏོ། །ཆོས་ཐམས་ཅད་ནི་དེ་བཞིན་ཉིད་ཀྱི་མཐའི་སྒོ་ཡིན་ཏེ། བསླབ་པ་ལ་རློམ་སེམས་མེད་པར་བྱ་བའི་ཕྱིར་བསླབ་པ་ཡོངས་སུ་དག་པ་ཀུན་ཏུ་སྟོན་ཏོ། །ཆོས་ཐམས་ཅད་ནི་རྣམ་པར་མི་རྟོག་པ་དང་། བླང་བ་མེད་པ་དང་། དོར་བ་མེད་པ་སྟེ་བསམ་གྱིས་མི་ཁྱབ་པས་ཆགས་པ་མེད་པ་ཉིད་ཀུན་ཏུ་སྟོན་ཏོ། །ཆོས་ཐམས་ཅད་ནི་ཆགས་པ་མེད་པ་དང་། གནས་པ་མེད་པ་སྟེ། །ཡུན་རིང་དུ་མི་གནས་པའི་ཕྱིར་འགྲོ་བ་ཐམས་ཅད་ཡོངས་སུ་དག་པ་ཀུན་ཏུ་སྟོན་ཏོ། །ཆོས་ཐམས་ཅད་ནི་ནམ་མཁའི་མཐའ་ལ་གནས་པ་སྟེ། དངོས་པོ་དང་བྲལ་བའི་ཕྱིར་རང་བཞིན་མེད་པ་ཉིད་ཀུན་ཏུ་སྟོན་ཏོ། །ཆོས་ཐམས་ཅད་ནི་ཐ་དད་དུ་བྱ་བ་མེད་པར་གྱུར་པ་སྟེ། སྔོན་གྱི་མཐའ་དང་ཕྱི་མའི་མཐའ་དང་ད་ལྟར་བྱུང་བ་མི་དམིགས་པའི་ཕྱིར་དུས་གསུམ་མཉམ་པ་ཉིད་ཀུན་ཏུ་སྟོན་ཏོ། །ཆོས་ཐམས་ཅད་ནི་གདགས་པ་དང་བྲལ་བ་སྟེ། སེམས་མཉམ་པ་ཉིད་དུ་སྤྱོད་པའི་ཕྱིར་ཐེ་ཚོམ་སྤང་བ་ཀུན་ཏུ་སྟོན་ཏོ། །བཙུན་པ་ཉེ་བར་འཁོར་དེ་ནི་སངས་རྒྱས་བཅོམ་ལྡན་འདས་རྣམས་ཀྱིས་རྗེས་སུ་རྟོགས་པ་ཆོས་ཀྱི་དབྱིངས་ཤིན་ཏུ་དུལ་བ་ཡིན་ཏེ། རིགས་ཀྱི་བུ་དང་། རིགས་ཀྱི་བུ་མོ་གང་དག་ཆོས་ཉིད་འདི་ལ་མ་མོས་པ་དེ་དག་ནི་དེ་བཞིན་གཤེགས་པའི་བསླབ་པ་ལས་རིང་དུ་གྱུར་པ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་འདི་སྐད་ཅེས་གསོལ་ཏོ།