Degé Kangyur volume 91, F.63.a

སྭཱ་ཧཱ། བདེན་པ་དང་། བདེན་པའི་ཚིག་གང་གིས་འཇིག་རྟེན་ན་སངས་རྒྱས་བླ་ན་མེད་པ་དང་། འཇིག་རྟེན་ན་ཆོས་དང་། དགེ་འདུན་བླ་ན་མེད་པའི་བདེན་པ་དང་། བདེན་པའི་ཚིག་དེས་བདག་གི་རིམས་ནད་སོང་ཤིག །​མ་འདུག་ཅིག་སྭཱ་ཧཱ། སིདྡྷྱནྟུ་མནྟྲ་པ་དཻ། །ཏ་ར་ཏུ། བིདྱ་ཏཾ་བྲཧྨ་ཨ་ནུ་མོ་ཏེ་སྭཱ་ཧཱ། སྐུད་པ་ནག་པོ་ལ་ལན་ཉི་ཤུ་རྩ་གཅིག་བཟླས་ཏེ། མདུད་པ་ཉི་ཤུ་རྩ་གཅིག་དོར་རོ། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །​འཕགས་པ་རིམས་ནད་རབ་ཏུ་ཞི་བར་བྱེད་པ་ཞེས་བྱ་བའི་གཟུངས་རྫོགས་སོ།​། །​།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱ་ལ་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།​། །​།༄༅། །​དཀོན་མཆོག་གསུམ་ལ་ཕྱག་འཚལ་ལོ། ཧེ་བྷ་ག་བཱ་ན་མཉྫུ་ཤྲཱི་ཀུ་མཱ་ར། སརྦ་ཏ་ཐཱ་ག་ཏ། བ་ལ་བི་དྷི་ཛྙ། སརྦ་ཏ་ཐཱ་ག་ཏཱ་ནཱཾ། ནཱ་གཻ་སྟི་ཏིཥྛ་སརྦ་སཏྭཱ་ནཱཾ་སྭཱ་ཧཱ། འབྲུམ་བུའི་ནད་ཞི་བར་བྱེད་པའི་གཟུངས་རྫོགས་སོ།​། ༄༅། །​མདངས་ཕྱིར་མི་འཕྲོག་པ་ཞེས་བྱ་བ་བཻ་ཌཱུརྱའི་འོད་ལ་ཕྱག་འཚལ་ལོ། །​ཏདྱ་ཐཱ། ཨོཾ་མ་མ་རཀྵ། སཱ་ག་རེ་མ་ཧཱ་སཱ་ག་རེ། པུ་རུ་ཙེ་པུ་རུ་ཙུ་རུ། ས་མ་ནེ་མེ། དེ་བ་བེ་ཧུ་ལུ་ཧུ་ལུ་སྭཱ་ཧཱ། གླ་རྩི་དང་། ཤུ་དག་དང་། བྷི་སུ་ནག་པོ་ལ་ལྡེ་གུ་བྱས་ཏེ། ལྐོག་མར་ཐིག་ལེ་བྱས་ཏེ་སྔགས་ལན་བདུན་བཟླས་ན། འབྱུང་པོ་རྣམས་ཀྱིས་དེའི་མདངས་འཕྲོག་པ་ལྟ་ཅི་སྨོས་ཀྱི། བལྟ་བར་ཡང་མི་ནུས་སོ་རྫོགས་སོ།​། ༄༅། །​རྒྱ་གར་སྐད་དུ། ཨཱརྱ་བཻ་ཤཱ་ལཱི་པྲ་བེ་ཤ་མ་ཧཱ་སཱུ་ཏྲཾ། བོད་སྐད་དུ། འཕགས་པ་ཡངས་པའི་གྲོང་ཁྱེར་དུ་འཇུག་པའི་མདོ་ཆེན་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འདམ་བུའི་ཁྲོད་ན་གཟིངས་པའི་འདུག་གནས་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཡངས་པའི་གྲོང་ཁྱེར་ག་ལ་བ་དེར་འདོང་ངོ་།