།ཡུལ་འཁོར་སྐྱོང་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་བློས་ཕྱག་གཡས་པ་བརྐྱང་སྟེ་འོད་ཕྱུང་ནས། འོད་དེས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་རེག་གོ །འོད་དེ་ལས་ཀྱང་པད་མ་འདབ་མ་བརྒྱ་སྟོང་ཡོད་པ་ཤིང་རྟའི་འཕང་ལོ་ཙམ་བྱུང་བར་གྱུར་ཏོ། །པད་མ་དེ་ལས་ཀྱང་འོད་ཟེར་བརྒྱ་སྟོང་བྱུང་སྟེ་སྣང་བ་ཆེན་པོར་གྱུར་ནས། སྣང་བ་དེས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཁྱབ་པར་གྱུར་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་པད་མ་དེ་ལ་འདུག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་བློ་དེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། སངས་རྒྱས་ལ་ཕྱག་འཚལ་ལོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡུལ་འཁོར་སྐྱོང་དེ་ནས་དེ་བཞིན་གཤེགས་པ་དོན་གྲུབ་བློ་དེས་འོད་དེ་བརྟུལ་བ་དང་གཞོན་ནུ་དེ་སྡོང་པོ་བཅད་པ་འགྱེལ་བ་བཞིན་དུ་དེ་བཞིན་གཤེགས་པའི་ཞབས་ཀྱི་དྲུང་དུ་བབས་ཏེ། དེ་བཞིན་གཤེགས་པ་དེ་ལ་ལན་བརྒྱ་སྟོང་དུ་ཕྱག་འཚལ་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་ལ་ཚིགས་སུ་བཅད་དེ་གསོལ་པ། བདག་ནི་རིང་ནས་ན་སྟེ་རིང་ནས་ལྡོངས། །ཚེགས་ཆེས་སྨན་པའི་རྒྱལ་པོ་ཁྱོད་རྙེད་དོ། །ཇི་ལྟར་བདེ་གཤེགས་བསྟན་ལ་གནས་ནས་ནི། །བདག་གིས་འཐོབ་འགྱུར་མགོན་པོ་བསྟན་དུ་གསོལ། །འདྲེན་པ་བདག་གིས་བག་མཆིས་ཐོས་པ་ནི། །མཚན་མོ་བར་སྣང་ལྷ་ལས་ཐོས་ལགས་ཏེ། །ཐོས་ནས་སྐྱོ་སྟེ་བདག་ནི་འདིར་མཆིས་ན། །མི་རྣམས་བག་མཆིས་འགྱུར་བ་ཇི་ལྟ་བུ། །ལམ་ཉམས་པ་ལ་དེ་རིང་སྟོན་གྱུར་ཅིག །ལྡོངས་པར་གྱུར་པའི་མིག་ཏུ་དེང་གྱུར་ཅིག །དད་པའི་འབྱུང་གནས་གསོ་མཛད་ཐུགས་རྗེ་ལྡན། །གཡང་ས་ཆེན་པོ་འདི་ལས་བདག་ཕྱུང་ཤིང་། །དབུལ་པོར་གྱུར་པ་བདག་ནི་བསྡུ་བར་མཛོད། །མགོན་པོ་བཅིངས་པ་བདག་ནི་དེང་དགྲོལ་མཛོད། །སོམ་ཉིར་བཅས་པའི་ཡིད་གཉིས་གཅད་དུ་གསོལ། །བྱང་ཆུབ་ལམ་ལ་སྤྱོད་པ་བདག་ལུང་སྟོན།