།ལམ་སྲང་ཐམས་ཅད་ཀྱི་སྒོར་ཡང་རིན་པོ་ཆེའི་སྲོག་ཤིང་སྟོང་བཙུགས་སོ། །རིན་པོ་ཆེའི་སྲོག་ཤིང་ཐམས་ཅད་ཀྱང་རིན་པོ་ཆེའི་སྐུད་པ་དྲུག་ཁྲིས་སྤྲེལ་ཏོ། །རིན་པོ་ཆེའི་སྐུད་པ་ཐམས་ཅད་ཀྱང་ཕྱོགས་བཞི་ནས་ཤིང་ཏ་ལའི་ཕྲེང་བ་བྱེ་བས་སྦྲེལ་ཏོ། །དེ་དག་རླུང་གིས་བསྐྱོད་དེ་བསྐུལ་ན་འདི་ལྟ་སྟེ་དཔེར་ན་རོལ་མོ་སིལ་སྙན་བརྒྱ་སྟོང་གི་སྒྲ་སྙན་པ་ལྟ་བུའི་སྒྲ་འབྱུང་ངོ་། །ལམ་སྲང་གི་སྒོ་ཐམས་ཅད་ན་བུ་མོ་གླུ་མཁས་པ། གར་མཁས་པ། ལང་ཚོ་དར་ལ་བབ་པ། སྐྱེ་བོ་ཐམས་ཅད་ཀྱིས་སྤྱད་པའི་འོས་སུ་གྱུར་པ་ལྔ་བརྒྱ་ལྔ་བརྒྱ་བཀོད་དོ། །དེ་དག་ཐམས་ཅད་ལ་རྒྱལ་པོ་འོད་ཟེར་ལྡན་གྱིས་ཁྱེད་ཉིན་མཚན་དུ་གླུ་དང་། གར་དང་། རོལ་མོའི་སྒྲས་གང་དག་ཕྱོགས་བཞི་ནས་ལྷགས་པའི་སེམས་ཅན་རྣམས་ཡང་དག་པར་དགའ་བར་བྱ་ཞིང་ཅི་ནས་གཞོན་ནུ་དགའ་བར་བྱ་བའི་སེམས་བསྐྱེད་པ་མ་གཏོགས་པར་གཏམ་གཞན་མ་བྱེད་ཅིག །སེམས་ཅན་གང་ལ་ཡང་ཡིད་དུ་མི་འོང་བ་མ་སྨྲ་ཤིག་ཅེས་བསྒོའོ། །ལམ་སྲང་དེ་དག་ཐམས་ཅད་ཀྱི་སྒོར་ཡང་བཟའ་བ་འདོད་པ་རྣམས་ལ་ནི་བཟའ་བ། བཏུང་བ་འདོད་པ་རྣམས་ལ་ནི་བཏུང་བ། བཞོན་པ་འདོད་པ་རྣམས་ལ་ནི་བཞོན་པ་ནས། གོས་དང་། སྤོས་དང་། ཕྲེང་བ་དང་། བྱུག་པ་དང་། མལ་དང་། རྒྱབ་རྟེན་དང་། འཚོ་བའི་ཡོ་བྱད་རྣམས་དང་། གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་སིལ་མ་དང་། གླང་པོ་ཆེ་དང་། རྟ་དང་། ཤིང་རྟ་དང་། བ་ལང་དང་། ནོར་དང་། རྒྱན་ཐམས་ཅད་བྱིན་ཞིང་སྐྱེ་བོ་ཐམས་ཅད་ཀྱིས་ཡོངས་སུ་སྤྱོད་པའི་ཕྱིར་རིན་པོ་ཆེའི་ཕུང་པོ་ཡང་བཞག་པར་གྱུར་ཏོ། །དེའི་ཚེ་གྲོང་ཁྱེར་གྱི་དབུས་སུ་གཞོན་ནུའི་ལོངས་སྤྱོད་ཀྱི་ཕྱིར་ཁྱིམ་ཁོར་ཡུག་ཏུ་དཔག་ཚད་ཙམ་ཡོད་པ་རིན་པོ་ཆེ་སྣ་བདུན་མིག་མངས་རིས་སུ་བྲིས་པ། རྟ་བབས་བརྒྱས་རབ་ཏུ་བརྒྱན་པ་བྱས་སོ། །དེའི་ནང་དུ་ཁང་བཟངས་ཞིག་བྱས་ཏེ། དེར་གཞོན་ནུའི་ལོངས་སྤྱོད་ཀྱི་ཕྱིར་མལ་བྱེ་བ་ཕྲག་བཞི་བཤམས་སོ། །དེའི་དབུས་སུ་སྐྱེད་མོས་ཚལ་བྱས་ཏེ། མེ་ཏོག་གི་ཤིང་ལྗོན་པ་ཐམས་ཅད་དང་། འབྲས་བུའི་ཤིང་ལྗོན་པ་ཐམས་ཅད་དང་། རིན་པོ་ཆེའི་ཤིང་ལྗོན་པ་ཐམས་ཅད་ཀྱིས་ཁྱབ་པར་བཀང་ངོ་། །