།ཀུན་ཀྱང་གོ་འཕང་དམ་པ་བླ་མེད་པ། །ཚོལ་བའི་ཚེ་ན་སྤྱོད་ཡུལ་དགོན་པར་དགའ། །ཁྱོད་ཀྱང་དེ་དག་སྤྱོད་པའི་ལམ་དུ་ཕྱོགས། །དགོན་པར་གནས་ལ་རྟག་ཏུ་དགའ་བར་གྱིས། །ཕ་དང་མ་དང་བུ་དང་སྡུག་པའི་གཉེན། །སྐྱེ་བོ་སྙིང་དུ་སྡུག་པ་ཀུན་སྤོངས་ལ། །ལུས་དང་སྲོག་ལ་སྲེད་པར་མ་བྱེད་པར། །བདེ་གཤེགས་ཡེ་ཤེས་རྒྱ་ཆེན་བཙལ་བར་གྱིས། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་དེ་ནི་བཟུང་སྟེ། ལོ་བཅུའི་བར་དུ་ནམ་ཡང་རྨུགས་པ་དང་གཉིད་ཀྱིས་ནོན་པར་མ་གྱུར། ནམ་ཡང་རྒོད་པར་མ་གྱུར། རྩེས་པར་མ་གྱུར། དགའ་བ་བྱེད་པར་མ་གྱུར། ཡོངས་སུ་སྤྱད་པར་མ་གྱུར། ནམ་ཡང་སྐྱེད་མོས་ཚལ་དུ་མ་སོང་། ནམ་ཡང་གྲོགས་པོ་མཐོང་ནས་ངོ་མཚར་དུ་མི་འཛིན། ནམ་ཡང་གླུ་ལ་དགའ་བར་མ་གྱུར། རྒྱལ་སྲིད་དང་། ནོར་དང་། ཁྱིམ་དང་། གྲོང་ཁྱེར་རྣམས་ལ་འདོད་པ་བསྐྱེད་པར་མ་གྱུར་ཏེ། དེ་ལྟར་དངོས་པོ་ཐམས་ཅད་ལ་མི་ལྟ་བར་གཅིག་པུར་སེམས་ཤིང་གནས་པར་གྱུར་ཏོ། །ནང་དུ་ཡང་དག་འཇོག་ལྷུར་ལེན་ཅིང་འཇིག་རྟེན་ལ་སྙིང་པོ་མེད་པ་དང་། འཇིག་པ་དང་། དབུགས་འབྱིན་པ་མེད་པ་དང་། མི་སྡུག་པ་དང་ཕྲད་པ་དང་། སྡུག་པ་དང་འབྲལ་བ་དང་། བྱིས་པ་འདྲིད་པ་དང་། འཁོར་བ་ལ་དགའ་བ་རོ་བྲོ་བ་མེད་པ་དང་། རྒྱལ་སྲིད་ཀྱི་བདེ་བ་སླུ་བའི་ཆོས་ཅན་དང་། སྲིད་པ་ལ་མངོན་པར་དགའ་བས་ཆོག་མི་ཤེས་པ་དང་། སོ་སོའི་སྐྱེ་བོ་ཉིད་རྟག་ཏུ་མི་འཐུན་པར་རྣམ་པར་སེམས་ཤིང་བདག་ནི་བྱིས་པའི་སྐྱེ་བོ་མི་བརྩོན་པའི་ནང་ན་གནས་ཀྱིས་བདག་གིས་ཅང་མི་སྨྲ་བར་འདའ་བར་བྱའོ་སྙམ་ནས་དེ་ཕྱོགས་གཅིག་ཏུ་ཅང་མི་སྨྲ་བར་གྱུར་ཏེ། བག་ཡོད་པ་ལ་སེམས་ཤིང་སྡུག་པ་དང་བྲལ་བར་གཅིག་པུ་གནས་པར་གྱུར་ཏོ། །ཡུལ་འཁོར་སྐྱོང་དེ་ནས་རྒྱལ་པོ་འོད་ཟེར་ལྡན་གྱིས་གཞོན་ནུའི་ལོངས་སྤྱོད་ཀྱི་ཕྱིར་ས་ཕྱོགས་ཤིན་ཏུ་གྲོང་ཁྱེར་དགའ་མཆོག་ཅེས་བྱ་བ་བྱས་ཏེ། ལྷོ་དང་བྱང་གི་ངོས་སུ་ལམ་སྲང་བདུན་བརྒྱ་བདུན་བརྒྱ་བྱས་སོ། །རིན་པོ་ཆེ་སྣ་བདུན་གྱི་ཕྱིར་དྲིལ་བུ་གཡེར་ཀའི་དྲ་བས་བྲེས་པ། མུ་ཏིག་གི་དྲ་བ་དང་། རིན་པོ་ཆེའི་སྲོག་ཤིང་དང་། བླ་རེ་དང་ལྡན་པ་རིམ་བདུན་གྱིས་ཀུན་ནས་བསྐོར་ཏོ། །ལམ་སྲང་ཐམས་ཅད་ཀྱི་སྒོར་ཡང་རིན་པོ་ཆེའི་སྲོག་ཤིང་སྟོང་བཙུགས་སོ།