འཇམ་དཔལ་གྱིས་སྨྲས་པ། གང་སུས་ཀྱང་མ་ཐོབ་མ་བཤིག་ཅིང་གང་ལ་ཡོད་པ་འམ་མེད་པར་ཆགས་པ་དམིགས་སུ་མེད་པའོ། །བྱང་ཆུབ་སེམས་དཔའ་ཡེ་ཤེས་བླ་མས་སྨྲས་པ། འཇམ་དཔལ་བྱང་ཆུབ་དེ་ཇི་ཙམ་དུ་ཡོད་པས་ཀྱང་མི་འཐོབ། མེད་པས་ཀྱང་མི་འཐོབ་བམ། སྨྲས་པ། རིགས་ཀྱི་བུ་དེ་དེ་བཞིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་གཟོད་མ་ནས་མ་སྐྱེས་པ་སྟེ། ཡོད་པར་མ་གྱུར་མི་འགྱུར་བས་དེའི་ཕྱིར་འཐོབ་པར་འགྱུར་བ་མེད་དོ། །སྨྲས་པ། འཇམ་དཔལ་ཚུལ་གཅིག་པའི་ཆོས་བསྟན་པས་དེ་སྐད་དུ་སྟོན་ཏམ། འཇམ་དཔལ་གྱིས་སྨྲས་པ། རིགས་ཀྱི་བུ་ཚུལ་གཅིག་པའི་ཆོས་བསྟན་པ་ཞེས་བྱ་བ་གང་ཡིན། སྨྲས་པ། འཇམ་དཔལ་གང་ཕུང་པོ་རྣམས་ཀྱང་མི་མཐོང་། ཁམས་དང་སྐྱེ་མཆེད་རྣམས་ཀྱང་མི་མཐོང་ལ་དམུས་ལོང་ཡང་མ་ཡིན། ཤའི་མིག་ཅན་ཡང་མ་ཡིན་ཞིང་ཆོས་གང་ལ་ཡང་མི་རྟོག །རྣམ་པར་མི་རྟོག་པ་དང་། ཆོས་གང་ལ་ཡང་འཕེལ་བ་དང་། འགྲིབ་པར་མི་མཐོང་བ་འདི་ནི་ཆོས་ཀྱི་ཚུལ་གཅིག་ཏུ་བསྟན་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེང་གེའི་རྩལ་གྱིས་མངོན་པར་བསྒྲགས་པའི་སྒྲས་སྨྲས་པ། གང་དེ་བཞིན་ཉིད་དང་མི་འགལ་ཞིང་ཆོས་ཉིད་དང་འགལ་བར་མི་བྱེད་དེ། འདི་དག་ནི་སོ་སོའི་སྐྱེ་བོའི་ཆོས་སོ། །འདི་དག་ནི་ཉན་ཐོས་ཀྱི་ཆོས་སོ། །འདི་དག་ནི་རང་སངས་རྒྱས་ཀྱི་ཆོས་སོ། །འདི་དག་ནི་སངས་རྒྱས་ཀྱི་ཆོས་སོ་ཞེས་བྱ་བར་ཐ་དད་དུ་མི་འབྱེད་ཅིང་གང་འདི་དབེན་པའི་ཚུལ་དུ་ཚུལ་གཅིག་པ་ལ་འཇུག་པ་འདི་ནི་ཆོས་ཀྱི་ཚུལ་གཅིག་ཏུ་བསྟན་པའོ། །བྱང་ཆུབ་སེམས་དཔའ་མཐོང་དགས་སྨྲས་པ། གང་དེ་བཞིན་ཉིད་ལ་ཡང་ཞུགས་ལ་དེ་བཞིན་ཉིད་ཀྱིས་ཀྱང་རློམ་སེམས་སུ་མི་བྱེད་ཅིང་འདི་ནི་ཟབ་པོ་ཞེས་བྱ་བར་མི་རྟོག །རྣམ་པར་མི་རྟོག་པ་དེ་ལྟར་བསྟན་པ་གང་ཡིན་པ་དེ་ནི་ཆོས་ཀྱི་ཚུལ་གཅིག་ཏུ་བསྟན་པའོ། །བྱང་ཆུབ་སེམས་དཔའ་སྤོབས་པ་མི་ཟད་པས་སྨྲས་པ། ཆོས་ཐམས་ཅད་མི་ཟད་པ་གང་ཡིན་པ་དེ་ནི་ཤིན་ཏུ་ཟད་པ་སྟེ། གང་ཆོས་ཐམས་ཅད་མི་ཟད་པར་ཆོས་བསྟན་པ་དེ་ནི་ཆོས་ཉིད་ལས་འགལ་བར་མི་བྱེད་པ་སྟེ། དེ་ལྟར་བསྟན་པ་གང་ཡིན་པ་དེ་ནི་ཆོས་ཀྱི་ཚུལ་གཅིག་ཏུ་བསྟན་པའོ། །བྱང་ཆུབ་སེམས་དཔའ་བསམ་པ་ལེགས་པར་སེམས་པས་སྨྲས་པ།