།ཞོ་དང་འོ་མ་ནི་ལྷ་རྣམས་ལའོ། །སྙིང་པོ་གསུམ་གྱི་མར་ནི་གནོད་སྦྱིན་རྣམས་ལའོ། །འབྲས་ཀྱི་ཕྱེ་མ་བུ་རམ་དང་བསྲེས་ཏེ་གོང་བུ་བྱས་པ་ནི་ཚོགས་ཀྱི་བདག་པོ་ལའོ། །ཁུར་བ་ནི་ཤ་ཟ་རྣམས་ལའོ། །འབྲས་དང་མ་ཤམ་བསྲེས་པ་ནི་འབྱུང་པོ་རྣམས་ལའོ། །ཤ་ནི་སྲིན་པོ་རྣམས་ལའོ། །ཉ་ནི་ཡི་དགས་རྣམས་ལའོ། །ཨོཾ་བྷཱ་བ་ཁཱ་ཧི་ཁཱ་ཧི་གྲྀཧྞ་གྲྀཧྞ་ཧཱུཾ་སརྦ་བྷཱུ་ཏ་བ་ལིཾ་སྭཱ་ཧཱ། ཡང་ལྷའི་ཁང་པར་བཞུགས་ཏེ། སྔགས་བརྒྱད་བརྒྱ་བཟླས་ཏེ་བུམ་པ་ཆུས་བཀང་བ་ཁྱུ་མཆོག་ལ་གཏོར་བར་བྱའོ། །དེས་ནི་ཅེ་སྤྱང་གི་ཉེ་བར་འཚེ་བ་ཞི་བར་འགྱུར་རོ། །དེ་ལྟར་བྱས་ཏེ་དུས་གསུམ་དུ་ཞི་བའི་བཟླས་པས་སྦྱིན་སྲེག་ཞག་བདུན་དུ་བྱས་ན་ཞི་བར་འགྱུར་རོ། །ཨོཾ་མཱ་རཱི་ཙྱཻ་སྭཱ་ཧཱ། ལག་པ་གཉིས་མཉམ་པར་བྱས་ལ་ཐལ་མོ་གཉིས་སྦྱར་བ་འམ། རྩེ་མོ་ཁ་ཕྱེ་ཡང་རུང་སྟེ་མཐེ་བོང་གཉིས་བཀུག་ལ། གུང་མོ་ལ་སྡིགས་མཛུབ་གཉིས་འཁྲིལ་བའི་ཚུལ་དུ་སྦྱར་བའི་རྣམ་པས་མཚན་པའོ། །སྐྱིལ་ཀྲུང་དུ་འདུག་སྟེ་ལྟེ་བའི་ཕྱོགས་སུ་བདུག་པར་བྱའོ། །ཕྱག་རྒྱ་འདི་ནི་མཆོག་ཡིན་ཏེ། །ལས་རྣམས་ཀུན་ལ་སྦྱར་བར་བྱ། །གླང་པོ་ཆེ་དང་རྟ་དང་ཕྱུགས་དང་། མ་ཧེ་དང་མི་དང་མི་མོ་དང་། རྒྱལ་པོ་དང་བྱིས་པ་རྣམས་ནི་འདིས་ཐེ་ཚོམ་མེད་པར་ཞི་བར་འགྱུར་རོ། །དེ་ནས་སྦྱིན་སྲེག་གི་ཐབ་ཁུང་གི་མཚན་ཉིད་ཡིན་ཏེ་ཞི་བ་ལ་ནི་པདྨ་དཀར་པོའི་རྣམ་པ་སྡོང་བུ་བཅས་པ་ཟླུམ་པོ་ཡིན་ནོ། །དབུས་ཀྱི་པདྨ་ལ་རྡོ་རྗེས་མཚན་པ་ཁ་ཁྱེར་ཟླུམ་པོ་ལ་རྡོ་རྗེའི་ཕྲེང་བས་བརྒྱན་ཅིང་བསྐོར་བའོ། །ཁྲུ་གང་ཙམ་བརྐོས་པའི་ཐབ་ཁུང་དུ་པ་ལ་ཤ་དང་། ནྱ་གྲོ་དྷའི་ཡམ་ཤིང་བྱས་ལ་དཱུར་བ་ཉག་མ་རེ་རེའི་སྦྱིན་སྲེག་བྱའོ། །ཚེ་འདོད་པ་དང་ཞི་བར་འདོད་པས་མང་ས་བེ་དའོ་ཞེས་བྱ་བའི་མེ་ལྷ་ཐམས་ཅད་དཀར་བའི་རང་བཞིན་ནི་ཞི་བ་ལ་བསྲེག་པར་བྱའོ། །རྒྱས་པ་ལ་ནི་གྲུ་བཞི་པ་ཁ་ཁྱེར་སོར་བཞི་པ་ལ་རྡོ་རྗེའི་ཕྲེང་བས་བརྒྱན་ཅིང་པདྨ་དང་འཁོར་ལོ་དང་། རིན་པོ་ཆེས་ཡང་དག་པར་བརྒྱན་པ་ཐབ་ཁུང་གི་མཚམས་སུ་སྣ་ཚོགས་རྡོ་རྗེས་མཚན་པ་ལ་ཨརྒ་དང་། ཨུ་དུམ་བཱ་རའི་ཡམ་ཤིང་གིས་ཀུ་མུ་ད་དང་ཨུཏྤ་ལ་དང་པདྨ་དཀར་པོ་དང་ཞོ་དང་མར་དང་། སྦྲང་རྩི་དང་བསྲེས་པའི་རྫས་ཀྱིས་གསེར་ལྟ་བུ་བྱུགས་ཤིང་སེར་བའི་མེའི་ལྷ་ལེགས་པར་བརྒྱན་པའི་གནས་པར་བསམས་ལ་ཉེ་བར་མཁོ་བ་ཐམས་ཅད་སེར་པོ་ནི་རྒྱས་པ་ལ་དྲན་པར་བྱའོ།