Degé Kangyur volume 90, F.132.b

།གལ་ཏེ་བདག་འགྲུབ་འདོད་ན་ནི། །​བྲམ་ཟེ་དེ་ལྟར་བྱས་ནས་བྲི། །​ཁ་ཟས་དཀར་པོ་ཟོས་ནས་སུ། །​ཕན་པར་འདོད་པས་བྲི་བར་བྱ། །​དར་རམ་རས་སམ་གྲོ་ག་འམ། །​ཅི་ཡང་རུང་བ་གཞན་ལ་བྲི། །​བུད་མེད་དག་ལ་བུ་འདོད་ན། །​གིའུ་ཝང་གིས་ནི་ལེགས་པར་བྲི། །​དབུས་སུ་ཁྱེའུ་ཞིག་བྲིས་ནས་ནི། །​རྒྱན་རྣམས་ཀུན་གྱིས་རྣམ་པར་བརྒྱན། །​དེ་བཞིན་རིན་ཆེན་གང་བའི་སྣོད། །​ལག་པ་གཡོན་ན་ཐོགས་པར་བྱ། །​པདྨ་རབ་ཏུ་རྒྱས་གྱུར་ཅིང་། །​བརྒྱན་པ་ལ་ནི་དེ་འདུག་བྱ། །​ནོར་བུ་དོ་ཤལ་གསེར་དག་དང་། །​རིན་ཆེན་སྣ་ཚོགས་རྣམས་ཀྱིས་བརྒྱན། །​གདུལ་བར་ཤིན་ཏུ་དཀའ་བ་བྲི། །​གྲྭ་བཞི་དག་ཏུ་རི་བོ་བྲི། །​གལ་ཏེ་བདེ་བར་འཚོ་འདོད་ན། །​རབ་ཏུ་བསྒྲིམས་ཏེ་དེ་ལྟར་བྲི། །​བྱེ་བྲག་ཏུ་ནི་སྐྱེས་པ་རྣམས། །​གུར་གུམ་གྱིས་ནི་བྲི་བར་བྱ། །​དེ་ཡི་དགོས་པ་འདོད་པ་རྣམས། །​འགྲུབ་འགྱུར་འདི་ལ་ཐེ་ཙོམ་མེད། །​པདྨ་གཉིས་སམ་ཡང་ན་གསུམ། །​བཞི་འམ་ཡང་ན་ལྔ་བྲིས་ཏེ། །​པདྨ་ལ་ནི་ཕྱག་རྒྱའི་མཚན། །​རྣམ་པ་སྣ་ཚོགས་གཟུགས་སུ་བྲི། །​དེ་བཞིན་དུ་ནི་པདྨ་རྣམས། །​ཟེ་བས་ཀུན་ཏུ་འཁོར་བར་བྲི། །​པདྨ་འདབ་མ་རབ་རྒྱས་ལ། །སྡོང་བུ་དར་གྱིས་བཅིངས་པར་བྲི། །​པདྨ་ལ་ནི་རྩེ་གསུམ་པ། །​ཟུར་བརྒྱད་ལ་ནི་དར་དཔྱངས་བྲི། །​དེ་བཞིན་པདྨ་དགྲ་སྟར་བཅས། །​འདབ་མ་བརྒྱད་དང་ལྡན་པར་བྲི། །​པདྨ་བཅས་པའི་རལ་གྲི་བྲི། །​པདྨ་དེ་ནི་དཀར་པོར་བྱ། །​པདྨའི་སྟེང་དུ་དུང་ཡང་བྲི། །​ཐམས་ཅད་དུ་ཡང་རྒྱས་པར་བྱ། །​ཀུན་ཏུ་ཆོ་གའི་མཚན་མ་རྣམས། །​མཁས་པ་དག་གིས་བྲི་བར་བྱ། །​གང་ལ་གནོད་པའི་སེམས་འབྱུང་བ། །​བྱིས་པའི་གཟུགས་རྣམས་མི་བྲིའོ། །​སྣ་ཚོགས་རྒྱན་གྱིས་བརྒྱན་པ་ཡི། །​ལྷ་ཡི་གཟུགས་ནི་བྲི་བར་བྱ། །​དགེ་སློང་ཕྱིར་ནི་རྡོ་རྗེ་འཆང་། །​གནོད་སྦྱིན་བསྡིགས་པར་བརྩོན་པར་བྲི། །​རྒྱལ་པོ་ཆེན་པོ་བཞི་རྣམས་ཀྱང་། །​ངོས་བཞི་རྣམས་སུ་བྲི་བར་བྱ། །​བྲམ་ཟེའི་ཕྱིར་ནི་དབང་ལྡན་ནོ། །​རྒྱལ་རིགས་ལ་ནི་དབང་ཕྱུག་ཆེ། །​དམངས་རིགས་ཕྱིར་ནི་རྟག་ཞི་བ། །​ཁྱབ་འཇུག་ལེགས་པར་བྲི་བར་བྱ། །