།དེ་ནས་བཅོམ་ལྡན་འདས་ཀྱིས་ཁྱིམ་བདག་ཚོང་དཔོན་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་གཙེ་བ་བཅུས་གཙེས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་གཙེ་བ་དང་། སྡུག་བསྔལ་གྱིས་གཙེ་བ་དང་། ཡིད་མི་བདེ་བས་གཙེ་བ་དང་། འཁྲུག་པས་གཙེ་བ་དང་། འཁོར་བས་གཙེ་བ་དང་བཅུ་སྟེ། ཁྱིམ་བདག་འཇིག་རྟེན་གནས་པ་གཙེ་བ་འདི་བཅུས་གཙེས་པར་མཐོང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཁོར་བའི་སྒྲོམ་དུ་ཆུད་པ་ཡི། །བྱིས་པ་སོ་སོའི་སྐྱེ་བོ་ཀུན། །སྐྱེ་བས་ཉེ་བར་གཙེ་བ་དང་། །ན་དང་རྒ་བས་རབ་ཏུ་གཟིར། །མྱ་ངན་བྱེད་ཅིང་སྨྲེ་སྔགས་འདོན། །འཆི་བའི་དབང་དུ་སོང་མཐོང་ནས། །སྲིད་པའི་སྒྲོམ་ལས་ཐར་བྱ་ཞེས། །བསྐྱབ་པའི་ཕྱིར་ནི་མངོན་པར་བྱུང་། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ཞེ་སྡང་ཞིང་ཀུན་ནས་མནར་སེམས་ཀྱི་དངོས་པོ་བཅུས་གཅིག་ལ་གཅིག་མནར་སེམས་སུ་བྱེད་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། བདག་ཉིད་ལ་གནོད་པ་བྱས་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱས་སོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང་བདག་གི་མཛའ་བོ་ལ་གནོད་པ་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང་བདག་དང་མི་མཛའ་བའི་དོན་བྱས་སོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པའི་རབ་ཏུ་སྡང་བ་ཉིད་དང་བཅུའོ།