།པུས་མོ་གཉིས་སུ་ཕྱག་གིས་རབ་ཏུ་རེག །སྐུ་ཡི་རོ་སྟོད་སེང་གེ་བཞིན་དུ་འཕགས། །སྐུ་ནི་སྲེད་མེད་བུ་ལྟར་རབ་ཏུ་བརྟན། །ནྱ་གྲོ་དྷ་བཞིན་ཆུ་ཞེང་གབ་པའི་སྐུ། །བཟོད་པའི་སྟོབས་དང་ལྡན་པ་སྟོབས་པོ་ཆེ། །སྐུ་ཡི་སྤུ་རྣམས་གཡས་འཁྱིལ་གྱེན་དུ་ཕྱོགས། །རེ་རེར་སྐྱེས་ཤིང་ཤིན་ཏུ་འཇམ་པ་སྟེ། །ཇི་ལྟར་པད་མ་ཆུ་དང་འདམ་མི་གོས། །དེ་བཞིན་རྡུལ་དང་དུ་བས་མི་གོས་སོ། །རྟ་མཆོག་དུལ་བ་ཡི་ནི་ཇི་ལྟ་བར། །འདོམས་ཀྱི་སྦ་བ་སྦུབས་སུ་ནུབ་ཅེས་གདའ། །བརླ་ནི་རབ་ཟླུམ་སྨྱིག་མའི་སྙིང་པོ་བཞིན། །ཁྱོད་ཀྱི་རྗེ་ངར་བྱིན་གྱིས་རིམ་བཞིན་མཆིས། །ཞབས་གོང་དུང་ལྟར་མཐོ་ཞིང་རྟིང་པ་ཆེ། །ཁྱོད་ཀྱི་ཕྱག་དང་ཞབས་ནི་དྲ་བས་འབྲེལ། །སོར་མོ་རིང་ཞིང་སོར་མོ་ཉི་ཤུ་མཉམ། །སེན་མོ་ཟངས་འདྲ་སོར་སེན་མེ་ཏོག་ཅན། །ཁྱོད་ཀྱི་ཞབས་མཐིལ་འཁོར་ལོ་རབ་ཀྱིས་མཚན། །རྩིབ་མ་སྟོང་ལྡན་རབ་ཏུ་འོད་གསལ་བ། །ལོང་བུས་ལོང་བུ་འཐབ་པར་མི་འགྱུར་ཞིང་། །གོམ་པས་གོམ་པ་ས་ལ་ཡོང་མི་འདོར། །ས་ལ་ཀུན་ཏུ་སོར་བཞིས་མི་རེག་པར། །འཇིག་རྟེན་རྣམས་ཀྱི་གཙོ་བོ་རབ་གཤེགས་ཏེ། །ཁྱོད་ནི་གང་དུ་གོམ་པ་བོར་བ་ཡང་། །རིན་ཆེན་པད་མ་སྐྱེས་པ་ངོ་མཚར་ཏོ། །རྒོད་པར་མ་གྱུར་དལ་ཞིང་བརྟན་པར་གཤེགས། །སྟག་དང་ལྷ་དབང་འགྲོས་ཀྱིས་གཞན་གནོན་ཅིང་། །བག་ཚ་མེད་པར་སྟབས་ནི་བསྒྱིངས་ཏེ་གཤེགས། །དཔའ་བོ་ཁྱོད་ཀྱི་འགྲོས་འདྲ་སུ་ལའང་མེད། །མི་མ་ལགས་པ་རྣམས་ཀྱིས་བར་སྣང་ལས། །ལྷ་ཡི་མེ་ཏོག་ཆར་ནི་རབ་འབེབས་ཤིང་། །གླུ་དབྱངས་སྒྲས་ནི་ཁྱོད་ལ་མཆོད་པར་བགྱིད། །ཆོ་འཕྲུལ་འདི་འདྲ་འདི་དག་རྨད་དུ་བྱུང་། །ཁྱོད་ཀྱི་གཟུགས་ནི་རྣམ་ཐོས་བུ་བས་ལྷག །གཟི་བརྗིད་དག་ནི་ཉི་མ་བརྒྱ་བས་འཕགས། །ཚངས་བཅས་ལྷ་མིར་བཅས་པའི་འཇིག་རྟེན་ན། །ཁྱོད་འདྲའང་མེད་ན་ལྷག་པ་ག་ལ་མཆིས། །བདག་གིས་ཁྱོད་ཀྱི་ཆོ་འཕྲུལ་མཆོག་མཐོང་ནས། །ཡོན་ཏན་ལྷག་པ་གང་དག་གཟིགས་གྱུར་ན། །དེ་བཞེད་པས་ན་མི་དབང་རབ་བྱུང་སྙམ། །བདག་ནི་དེ་ལ་ཐེ་ཚོམ་འཚལ་བར་གྱུར། །དེ་ནས་བཅོམ་ལྡན་འདས་ཀྱིས་ཁྱིམ་བདག་ཚོང་དཔོན་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ།