ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་དེ་དག་འདི་ལྟ་བུའི་མདོ་སྡེ་མཉན་ཏེ་ཐོས་ནས་དགའ་བ་དང་། མོས་པ་རྒྱ་ཆེན་པོ་ཐོབ་པར་འགྱུར་བ་དེ་དག་ལ་དེ་དག་གི་མཁན་པོ་དང་། སློབ་དཔོན་གྱིས་ཆོས་དཀར་པོ་གཅོད་པར་བྱེད་དེ། འདི་ནི་སངས་རྒྱས་ཀྱི་ཚིག་མ་ཡིན། འདི་ནི་སངས་རྒྱས་ཀྱི་བྱང་ཆུབ་མ་ཡིན། འདི་ནི་འདུལ་བ་མ་ཡིན། འདི་ནི་སྟོན་པའི་བསྟན་པ་མ་ཡིན་ནོ་ཞེས་བཟློག་པ་དང་། དེ་དག་དད་པས་རབ་ཏུ་བརྟགས་ནས་འདི་ནི་བདག་གི་དོན་འདོད་པ་ཡང་དག་པ་ཡིན་ནོ་ཞེས་སྨྲས་ནས་སངས་རྒྱས་ཀྱི་བྱང་ཆུབ་སྤོང་བར་འགྱུར་རོ། །དགེ་སློང་གསར་བུ་དེ་དག་དད་པ་དང་། ཡིད་ཆེས་པས་རབ་ཏུ་བརྟགས་ནས་སྔོན་གྱི་དགེ་བའི་རྩ་བ་ཀུན་འཇོམས་པར་འགྱུར། ཡང་དག་པར་གཅོད་པར་འགྱུར་རོ། །དེ་དག་དགེ་བའི་རྩ་བ་ཆད་ནས་བདུད་སྡིག་ཅན་གྱིས་ཆོས་རྣམས་ལས་ཀུན་ནས་བསླངས་ནས་ཆོས་ཀྱིས་ཕོངས་པར་འགྱུར་བའི་ལས་མངོན་པར་འདུ་བྱེད་པར་འགྱུར་ཏེ། དེ་དག་འཆི་བའི་དུས་ཀྱི་ཚེ་མ་དུལ་བར་འཆི་བར་འགྱུར། འཆི་བ་ཆེན་པོར་མངོན་པར་འགྲོ་བར་འགྱུར། སེམས་ཅན་དམྱལ་བའི་ལས་མངོན་པར་འདུ་བྱེད་པར་འགྱུར་ཏེ། དེ་དག་ཀྱང་ཤཱ་རིའི་བུ་དེ་བཞིན་གཤེགས་པས་རབ་ཏུ་མཁྱེན་ཏོ། །གང་ཡོངས་སུ་སྤོང་བར་འགྱུར་བ་དང་། སེམས་ཅན་ཇི་སྙེད་ཡོངས་སུ་སྤོང་བར་འགྱུར་བ་དང་། གང་འོངས་ནས་ཡོངས་སུ་སྤོང་བར་འགྱུར་བ་དང་། སོང་ནས་ཡོངས་སུ་སྤོང་བར་འགྱུར་བ་དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་ལ་ཤཱ་རིའི་བུ་བྱང་ཆུབ་སེམས་དཔའ་བརྩོན་འགྲུས་བརྩམས་ཤིང་ཐེག་པ་ཆེན་པོ་ལ་ཞུགས་པས་འདུ་ཤེས་བཞི་བསྐྱེད་པར་བྱའོ། །བཞི་གང་ཞེ་ན། བདག་གདུལ་བའི་འདུ་ཤེས་བསྐྱེད་པར་བྱ་བ་དང་། བདག་གིས་བྱས་པ་ལ་སོ་སོར་བརྟག་པར་བྱའི། གཞན་གྱིས་བྱས་པ་ལ་མ་ཡིན་པ་དང་། སེམས་ཅན་གཞན་ལ་སྙིང་རྗེ་བའི་འདུ་ཤེས་བསྐྱེད་པར་བྱ་བ་དང་། རང་གི་སེམས་རྗེས་སུ་སྲུང་བ་དང་། གཞན་གྱི་སེམས་རྗེས་སུ་སྲུང་ཞིང་དགོན་པ་ནགས་ཀྱི་བས་མཐའི་གནས་མལ་དུ་གནས་པར་བྱ་བ་སྟེ། འདུ་ཤེས་འདི་བཞི་བསྐྱེད་པར་བྱའོ། །ཤཱ་རིའི་བུ་གཞན་ཡང་དེའི་དུས་ན་སྐྱེ་བོ་མང་པོ་ལོག་པར་ལྟ་བ་ཡོངས་སུ་འཛིན་པར་འགྱུར་རོ། །དེའི་དུས་ན་ཆོས་སྨྲ་བའི་དགེ་སློང་ཉུང་བར་འགྱུར་ཞིང་དེ་དག་ལ་ཡང་བརྙས་པར་འགྱུར། བསྟི་སྟང་མི་བྱེད།