།ཤཱ་རིའི་བུ་གཞན་ཡང་དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན་གནས་ལ་མི་དགའ་བར་འགྱུར་ཞིང་འགྲོ་བའི་སེམས་སྐྱེད་པར་འགྱུར་བ་དེ་ནི་བར་དུ་གཅོད་པ་བཞི་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ་གཞན་ཡང་དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན་ཕན་ཚུན་དུ་ཁྲོ་བ་སྐྱེད་པར་འགྱུར་ཞིང་ཁྲོ་བའི་ཟིལ་གྱིས་ནོན་པས་གཅིག་ལ་གཅིག་གནོད་པའི་སེམས་ཀྱིས་འདི་ལྟ་བུའི་མདོ་སྡེ་ལ་གནས་པར་མི་འགྱུར་བ་དེ་ནི་བར་དུ་གཅོད་པ་ལྔ་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་མི་འགྲོ་བར་བྱའོ། །ཤཱ་རིའི་བུ་གཞན་ཡང་དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན་རྩོད་པའི་གཞི་འབྱུང་ཞིང་གནས་པར་འགྱུར། ཐབ་མོ་འབྱུང་བ་དང་། མཚང་འདྲུ་བ་འབྱུང་བ་དང་། འགྱེད་པ་དང་། ངན་སེམས་དང་ལྡན་པར་གྱུར་པས་གཅིག་ལ་གཅིག་ངག་གི་མདུང་ཐུང་བརྒྱས་མངོན་པར་རྩོད་ཅིང་འཚེ་བ་ལ་གནས་པར་འགྱུར་རོ། །དེ་དག་རྩོད་པའི་གཞི་བྱུང་བ་དང་། མཚང་འདྲུ་བ་འབྱུང་བ་དང་། འགྱེད་པ་དང་། གནོད་སེམས་དང་ལྡན་ཞིང་ཕན་ཚུན་ངག་གི་མདུང་ཐུང་བརྒྱས་རྩོད་ཅིང་གཙེ་བ་ལ་གནས་པས་བར་དུ་གཅོད་པར་འགྱུར་ཏེ། སྨོད་པའི་ལས་ཀྱི་ཕྱིར་འདི་ལྟ་བུའི་མདོ་སྡེ་མི་བརྗོད་པ་བྱ་བ་ལ་བརྩོན་པར་འགྱུར་བ་དེ་ནི་བར་དུ་གཅོད་པ་དྲུག་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ་གཞན་ཡང་དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན་ཁྱིམ་པ་དང་རབ་ཏུ་བྱུང་བ་ལ་བདུད་སྡིག་ཅན་ཀུན་ནས་སློང་བར་འགྱུར་རོ། །དེ་དག་བདུད་སྡིག་ཅན་གྱིས་ཀུན་ནས་བསླངས་ནས་འདི་ལྟ་བུའི་མདོ་སྡེ་ལ་ནན་ཏན་མི་བྱེད་པ་དང་། རབ་ཏུ་སྨོད་ཅིང་སྤོང་བའི་ལས་ལ་སྤྲོ་བར་འགྱུར་བ་དེ་ནི་བར་དུ་གཅོད་པ་བདུན་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ་གཞན་ཡང་དགེ་སློང་རྣམས་དེའི་ཚེ་དེའི་དུས་ན་དམ་པའི་ཆོས་ནུབ་པའི་དུས་ཀྱི་ཚེ་འདི་ལྟ་བུའི་མདོ་སྡེ་དང་། ཆོས་འདུལ་བ་ལ་བརྩོན་པའི་དགེ་སློང་གཞོན་ནུ་རིང་པོར་མ་ལོན་པ་འབྱུང་བར་འགྱུར་ཏེ། དེ་དག་དེས་པ་དང་། དད་པ་དང་། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་དེ་དག་འདི་ལྟ་བུའི་མདོ་སྡེ་མཉན་ཏེ་ཐོས་ནས་དགའ་བ་དང་།