འདི་ལྟ་སྟེ། དེའི་མཛའ་བོ་མི་ཕྱེད་པ་དང་། ལུས་མྱུར་དུ་འཇིག་པར་མི་འགྱུར་བ་དང་། དེའི་ལོངས་སྤྱོད་ཡོངས་སུ་ཉམས་པར་མི་འགྱུར་བ་དང་། བྱང་ཆུབ་ཀྱི་སེམས་དང་འབྲལ་བར་མི་ནུས་པ་དང་། ཆོས་ཀྱི་མུ་གེ་འབྱུང་བ་ན་དེ་ལ་ཆོས་ཀྱི་ལོ་ལེགས་པར་འགྱུར་ཏེ། ཤཱ་རིའི་བུ་མི་ཕྱེད་པར་བྱེད་པའི་ཆོས་ལྔ་པོ་དེ་དག་འཐོབ་པར་འགྱུར་རོ། །གཞན་ཡང་ངོ་མཚར་ཡོངས་སུ་རྫོགས་པའི་ཆོས་ལྔ་འཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། གང་སྣོད་སྟོང་པ་གསོག་བཞག་པར་གྱུར་པ་རྣམས་སུ་དེའི་ལག་པ་གང་དུ་བཅུག་པ་དེ་དག་ཐམས་ཅད་རིན་པོ་ཆེས་ཡོངས་སུ་གང་བར་འགྱུར་ཏེ། ངོ་མཚར་ཡོངས་སུ་རྫོགས་པ་དང་པོ་འདི་འཐོབ་པར་འགྱུར་རོ། །དེ་སྐོམ་པར་གྱུར་ན་ཡན་ལག་བརྒྱད་དང་ལྡན་པའི་ཆུའི་རྫིང་བུ་འབྱུང་སྟེ། ངོ་མཚར་ཡོངས་སུ་རྫོགས་པ་གཉིས་པ་འདི་འཐོབ་པར་འགྱུར་རོ། །གཞན་ཡང་དེའི་ལུས་ལ་གཞན་གྱིས་གནོད་པར་བྱ་བར་མི་འགྱུར་ཏེ། འདི་ལྟ་སྟེ། དུག་དང་། མཚོན་དང་། མེ་དང་། ཆུ་དང་། མདངས་འཕྲོག་པའི་གནོད་སྦྱིན་གྱིས་གཙེ་བ་མེད་པ་སྟེ། ངོ་མཚར་ཡོངས་སུ་རྫོགས་པ་གསུམ་པ་འདི་འཐོབ་པར་འགྱུར་རོ། །གཞན་ཡང་མཚོན་གྱི་བསྐལ་པ་བར་མ་བྱུང་བ་འམ། ནད་ཀྱི་བསྐལ་པ་བར་མ་བྱུང་བའམ། མུ་གེའི་བསྐལ་པ་བར་མ་བྱུང་བའམ། མེའི་བསྐལ་པ་བར་མ་བྱུང་བ་འམ། ཆུའི་བསྐལ་པ་བར་མ་བྱུང་བ་འམ། རླུང་གི་བསྐལ་པ་བར་མ་བྱུང་བའམ། སྐོམ་པའི་བསྐལ་པ་བར་མ་འམ། ཀུན་དུ་གདུང་བའི་བསྐལ་པ་བར་མའམ། གནོད་སྦྱིན་གྱི་བསྐལ་པ་བར་མ་བྱུང་བ་ན་འཛམ་བུའི་གླིང་དུ་སྐྱེ་བར་མི་འགྱུར་གྱི། དེ་ལྷར་སྐྱེ་སྟེ། དེ་བདེ་བ་དང་། མཐུ་དང་ལྡན་པར་འགྱུར་ཞིང་བདེ་བ་དང་། མཐུ་མང་བར་འགྱུར་ཏེ། ངོ་མཚར་ཡོངས་སུ་རྫོགས་པ་བཞི་པོ་འདི་འཐོབ་པར་འགྱུར་རོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་ཀྱིས་མི་དལ་བར་མི་སྐྱེ། ངན་འགྲོར་མི་སྐྱེ། སེམས་ལ་འགྱོད་པས་ཀུན་ཏུ་དཀྲི་བར་མི་ནུས་ཤིང་ངེས་པར་འབྱུང་བ་མྱུར་དུ་མཐོང་བར་འགྱུར་ཏེ། ངོ་མཚར་ཡོངས་སུ་རྫོགས་པ་ལྔ་པ་འདི་འཐོབ་པར་འགྱུར་རོ།