།བརྒྱ་བྱིན་དེ་གན་འདྲིར་འོང་ཞིང་། །གཞལ་མེད་ཁང་ཡང་ཡིད་འོང་བཟང་། །ལྷ་ཡི་འཇིག་རྟེན་གནས་འཕོས་ཏེ། །མི་ཡི་སྲིད་པར་འོངས་གྱུར་ནས། །འཁོར་ལོས་སྒྱུར་བ་སེར་སྣ་མེད། །རྒྱལ་པོ་རྫུ་འཕྲུལ་ཆེན་པོར་འགྱུར། །མི་ཡི་འཇིག་རྟེན་འཕོས་ནས་ཀྱང་། །ལྷ་ཡི་ནང་དུ་ཡང་འགྲོ་སྟེ། །བླ་མ་དག་ལ་གུས་བྱས་པས། །ནམ་ཡང་སྡུག་བསྔལ་མི་འགྱུར་རོ། །ཞུམ་པ་མེད་པའི་སེམས་ཀྱིས་སུ། །བླ་མ་དག་ལ་གུས་བྱས་པས། །གནས་བཞི་པོ་ནི་དེ་དག་རྣམས། །རྒྱ་ཆེར་རྟག་ཏུ་རྙེད་པར་འགྱུར། །དགའ་བ་དང་ནི་གུས་པ་ཡིས། །སྣོད་གང་ཙམ་གྱི་ཆུ་བྱིན་ན། །ལྷ་དང་མི་དང་ཀླུ་རྣམས་ཀྱིས། །མཆོད་པ་དག་ཏུ་འོས་པ་ཡིན།། །།བམ་པོ་བཅུ་པ། དེ་ལྟར་གྱུར་ན་གཞན་ཡང་ཆོས་བཞི་འཐོབ་པར་འགྱུར་ཏེ། ཆོས་བཞི་གང་ཞེ་ན། སྔོན་གྱི་ལས་མངོན་པར་འདུས་བྱས་པའི་དགེ་བའི་རྩ་བ་གང་གིས་སྐྱེས་པ་རབ་ཏུ་ཤེས་པ་དང་། དེ་ན་དགེ་བའི་ཆོས་རྣམས་ཡོངས་སུ་འདྲི་བ་ཡང་རབ་ཏུ་ཤེས་པ་དང་། དེ་ནས་ཤི་འཕོས་ནས་གང་དུ་སྐྱེ་བར་འགྱུར་བ་དེ་ཡང་རབ་ཏུ་ཤེས་པ་དང་། ལྷའི་འཁོར་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ལྷའི་འཇིག་རྟེན་ནས་འཆི་འཕོ་བར་འགྱུར་བ་སྟེ། ཤཱ་རིའི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་འཐོབ་པར་འགྱུར་རོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། དེ་ལྷའི་གནས་ནས། ཤི་འཕོས་ནས་མི་རྣམས་དང་སྐལ་བ་མཉམ་པར་སྐྱེ་བ་དང་། དེ་མིར་གྱུར་ན་བཙུན་པར་བྱེད་པ་ལྔ་འཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། དེ་རིགས་བཙུན་པར་སྐྱེ་བར་འགྱུར་བ་དང་། གཟུགས་བཙུན་པར་འགྱུར་བ་དང་། ཚུལ་ཁྲིམས་བཙུན་པར་འགྱུར་བ་དང་། དེའི་འཁོར་བཙུན་པར་འགྱུར་བ་དང་། དེའི་སེམས་ཅན་བཙུན་པ་རྣམས་ལ་བྱམས་པ་སྒོམ་པར་འགྱུར་བ་སྟེ། ཤཱ་རིའི་བུ་བཙུན་པར་བྱེད་པའི་ཆོས་ལྔ་པོ་དེ་དག་འཐོབ་པར་འགྱུར་རོ། །གཞན་ཡང་མི་ཕྱེད་པར་བྱེད་པའི་ཆོས་ལྔ་འཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ།