གནོད་པ་ཐམས་ཅད་ལས་བདག་ལ་བསྲུང་དུ་གསོལ། ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་ཤོག་ཤིག །བདག་ལ་རིག་སྔགས་ཀྱི་ཚིག་རྣམས་གྲུབ་པར་གྱུར་ཅིག་སྭཱ་ཧཱ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་ས་རི་ཞེས་བྱ་བ་གཞོན་ནུ་ཐོར་བུ་ལང་ཚོ་ལ་བབ་པ། རབ་ཏུ་བྱུང་ནས་རིང་པོ་མ་ལོན་པ། བསྙེན་པར་རྫོགས་ནས་རིང་པོ་མ་ལོན་པ། ཆོས་འདུལ་བ་འདིར་འོངས་ནས་རིང་པོ་མ་ལོན་པ་ཞིག་གནས་པ་དེ་དགེ་འདུན་གྱི་བསྲོ་ཁང་བྱ་བའི་ཕྱིར་ཤིང་གཤགས་པ་དང་། ཤིང་རུལ་པའི་སེར་ག་ཞིག་ནས་སྦྲུལ་ནག་པོ་ཆེན་པོ་ཞིག་བྱུང་ནས་རྐང་པ་གཡས་པའི་མཐེ་བོང་ལ་ཟིན་པ་དང་། ལུས་སྦྲིད་ནས་ས་ལ་འགྱེལ་ཏེ། དབུ་བར་སྐྱུག་ཅིང་མིག་ཀྱང་གྱུར་ནས་ཉལ་བ་དང་། ཚེ་དང་ལྡན་པ་ཀུན་དགའ་བོས་དགེ་སློང་ས་རི་ནད་ཀྱིས་བཏབ་སྟེ་སྡུག་བསྔལ་ཞིང་ནད་ཚབས་ཆེ་ནས་ས་ལ་འགྱེལ་ཏེ། དབུ་བར་སྐྱུག་ཅིང་མིག་ཀྱང་གྱུར་ནས་ཉལ་ཞིང་འདུག་པ་མཐོང་ངོ་། །མཐོང་ནས་ཀྱང་རིངས་པ་རིངས་པར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་འདི་ན་དགེ་སློང་ས་རི་ཞེས་བགྱི་བ་གཞོན་ནུ་ཐོར་བུ། ལང་ཚོ་ལ་བབ་པ། རབ་ཏུ་བྱུང་ནས་རིང་པོ་མ་ལགས་པ། བསྙེན་པར་རྫོགས་ནས་རིང་པོ་མ་ལགས་པ། ཆོས་འདུལ་བ་འདིར་མཆིས་ནས་རིང་པོ་མ་ལགས་པ་ཞིག་གནས་པ་དེ་དགེ་འདུན་གྱི་བསྲོ་ཁང་བགྱི་བའི་སླད་དུ་ཤིང་གཤགས་པ་དང་། ཤིང་རུལ་པའི་སེར་ག་ཞིག་ནས་སྦྲུལ་ནག་པོ་ཆེན་པོ་ཞིག་བྱུང་ནས་རྐང་པ་གཡས་པའི་མཐེ་བོང་ལ་ཟིན་པ་དང་ལུས་སྦྲིད་ནས་དོག་ས་ལ་འགྱེལ་ཏེ། དབུ་བར་སྐྱུག་ཅིང་མིག་ཀྱང་གྱུར་ནས་ཉལ་ཞིང་མཆིས་ན། བཙུན་པ་བཅོམ་ལྡན་འདས་དེ་ལ་བདག་གིས་ཅི་ལྟར་ནན་ཏན་དུ་བགྱི།