Degé Kangyur volume 90, F.98.a

།འཇིགས་བྱིན་ན་ནི་ཡིད་འཇིགས་པ། །​ཁ་ཆེའི་ཡུལ་ན་འོད་བྱེད་པ། །​གཏུམ་པོ་རལ་པ་ཅན་གྲོང་ན། །​ཁ་ཆེའི་ཡུལ་གྱི་ས་མཚམས་ན། །​ལྔས་རྩེན་ཞེས་ནི་བྱ་བ་གནས། །​དེ་ལ་བུ་ནི་ལྔ་བརྒྱ་སྟེ། །​སྡེ་བོ་ཆེ་ལ་སྟོབས་པོ་ཆེ། །​ལྔས་རྩེན་གྱི་ནི་བུ་ཐུ་བོ། །​རྒྱ་ཡུལ་གྱི་ནི་ས་ལ་གནས། །ཕྲག་པའི་མིག་ཅེས་བྱ་བ་ནི། །​མཛོད་ལྡན་ན་ནི་སྤུན་དང་བཅས། །​ཀ་ལིངྐ་ན་མཆེ་བ་རྐང་། །​དཀྱིལ་འཁོར་སྟན་ན་དཀྱིལ་འཁོར་རོ། །​ཀ་པུ་ཤ་ན་ལང་ཀའི་བདག །​འོད་ཅན་དགའ་བའི་ཚང་ཚིང་ན། །​ནམ་མཁའ་སྲུང་ན་ཆོས་སྐྱོང་བ། །​ལག་པ་ཆེན་པོ་ངན་པ་ན། །​རྣམ་ཐོས་བུ་ཡི་བུ་དཔལ་ལྡན། །​རྒྱལ་བ་ཁྱུ་མཆོག་རྒྱལ་པོའི་བུ། །​གནོད་སྦྱིན་བྱེ་བས་ཡོངས་བསྐོར་ཅིང་། །​ཐོ་གར་གྱི་ནི་ཡུལ་ན་གནས། །​འགྲོར་བཅས་རི་དང་གངས་ཅན་དག །​སིན་དྷུ་ཡི་ནི་རྒྱ་མཚོར་གནས། །​གྲོང་ཁྱེར་གསུམ་ན་རྩེ་གསུམ་ལག །​ཀ་ལིངྐ་ན་རབ་འཇོམས་པ། །​ཚིགས་ལྔ་སེར་པོ་འགྲོ་ལྡིང་ན། །​སིང་ཧ་ལ་ན་ནོར་གྱི་བདག །​ནེ་ཙོའི་བཞིན་ནི་འབྲོག་ན་སྟེ། །​འགྲོ་འམ་ཅི་ནི་འོག་ན་གནས། །​པདྨ་དཀར་པོའི་འོད་གསལ་བ། །​གྲོང་ཁྱེར་ཆེ་ན་བརྩེ་བ་ཅན། །​འཇིགས་པ་སྦྱིན་ན་རབ་འཇིགས་པ། །​ཆུ་དང་ལྡན་ན་དམར་སེར་གནས། །​བབྦ་ད་བསྐྱེད་བབྦ་ཌ། །​འདོད་པ་སྦྱིན་ན་མ་དང་ལྡན། །​བུ་མོ་འཇུག་ན་རབ་སད་པ། །​ཀ་པུ་ཤ་ན་ནལ་ཀུ་བར། །​ཕ་རོལ་མཐའ་མེད་དངུལ་ཆུ་ན། །​ནུས་པའི་གནས་ན་ཞི་བྱེད་པ། །​པ་ལྷ་པ་ན་ཐགས་བཟངས་རིས། །​ཀེ་ཏ་ཀ་ན་དམར་སེར་པོ། །​འཕྲལ་རིས་འཕེལ་ན་བཞིན་རྒྱས་པ། །​ཨུ་ཊྱན་ཡུལ་ན་མ་རུངས་པ། །ཐོང་ཤོལ་ངན་ན་བུམ་ལྟོ་བོ། །​ཆུ་སྲིན་རྒྱལ་མཚན་མྱ་ངམ་ན། །​སྣ་ཚོགས་སྡེ་ནི་པོ་ཀ་ན། །​དགའ་དང་ལྡན་ན་སྒྲ་སྒྲོགས་བུ། །​ཕུང་པོའི་བདག་པོར་དམར་སེར་པོ། །​ཆུང་མ་ཅན་ན་མཐོང་དགའ་བོ། །​གནོད་སྦྱིན་ཆུ་སྲིན་རྒྱལ་པོའི་ཁབ། །​ཡངས་པ་ན་ནི་གནས་པ་སྟེ། །​བརྒྱ་སྟོང་ཕྲག་ནི་མང་པོ་ཡི། །​གནོད་སྦྱིན་རྣམས་ཀྱིས་བསྙེན་བཀུར་བྱས། །​བ་ལང་སྐྱོང་བ་སྦྲུལ་གདུག་ཅན། །​ལྕང་ལོའི་གྲོང་ན་ལྕང་ལོ་པ། །​དགའ་བའི་གྲོང་ན་དགའ་བ་ཅན། །​གྲོང་གི་ལྷས་ན་སྟོབས་ཆེན་གནས། །​ལྷ་ལས་བབས་ན་རྣམ་ཐོས་བུ། །​རང་གི་སྡེ་ནི་ཡོངས་སུ་སྐྱོང་། །​ལྕང་ལོ་ཅན་ན་གནས་པ་སྟེ། །