Degé Kangyur volume 90, F.65.b

ཚོལ་དུ་ཕྱོགས་བཅུ་ཀུན་ཏུ་འབྱེར་ཞིང་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། བཙས་མ་ཐག་པ་དང་། དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་རྣམས་ཀྱི་མདངས་འཕྲོག །​འཚེ་བར་བགྱིད། བགེགས་བགྱིད། གསོད་པར་བགྱིད། སྲོག་དང་བྲལ་བར་བགྱིད་དེ། བཙུན་པ་བཅོམ་ལྡན་འདས་ཀྱི་སྤྱན་སྔར་བདག་ཅག་གིས་འཁོར་བཞིའི་མདུན་དུ་བདག་ཅག་གི་འཁོར་གྱི་ཚུལ་གྱི་མཚན་མ་བསྟན་པར་བགྱིའོ། །​གང་གིས་འཁོར་གྱི་གདོན་བྱུང་བ་དེར་རྒྱལ་པོ་ཆེན་པོ་དེའི་གཟུགས་མཆོད་རྟེན་དང་བཅས་པ་ཆེན་པོ་བགྱིས་ཏེ། ནད་པས་རྒྱལ་པོ་ཆེན་པོ་དེའི་མིང་ནས་དབྱུང་ཞིང་དྲི་སྣ་ཚོགས་ཀྱིས་རང་གི་ལག་ནས་བདུག་པར་བགྱིའོ། །​དོག་ས་ལ་མེ་ཏོག་སིལ་མ་བཀྲམ་སྟེ། ཞུགས་མར་བུས་ལ་མཆོད་རྟེན་དེ་ལ་མཆོད་པར་བགྱིའོ། །​བཙུན་པ་བཅོམ་ལྡན་འདས་བདག་གི་འཁོར་གནོད་སྦྱིན་གྱི་གདོན་གྱིས་བཏབ་པའི་ཚུལ་གྱི་མཚན་མ་ནི་འདི་ལྟ་བུ་ལགས་ཏེ། ཕྱི་ཕྱིར་རྒོད་ཅིང་འཇིགས་པར་འགྱུར། །​སྨྲ་བར་བགྱིད་ཅིང་ཁྲོ་བར་འགྱུར། །​དེ་ནི་གཉིད་ཀྱང་ལོག་པར་འགྱུར། །​ཡང་ན་ཤིན་ཏུ་ན་བར་འགྱུར། །​རྟག་ཏུ་གྱེན་དུ་ལྟ་བར་འགྱུར། །​སྐར་མ་དག་ལ་སྙེགས་པར་བགྱིད། །​ནུབ་མོ་ཤིན་ཏུ་དགའ་བར་འགྱུར། །​རྟག་ཏུ་འདར་ཞིང་སྒྲ་འབྱིན་ཏེ། །​དེ་ལ་སྔགས་ཀྱི་ཚིག་མཆིས་ཀྱིས། །​འཇིག་རྟེན་མགོན་པོ་བདག་ལ་གསོན། །​སྱཱད་ཡ་ཐེ་དན། སིད་དྷེ་སུ་སིད་དྷེ། ས་ཏྭེ་ཨ་རེ། ཨ་ར་ཎེ། བ་ལེ། མ་ཧཱ་བ་ལེ། ཛམ་བྷེ། ཛ་ཊི་ལེ། ཨ་ཁ་ནེ། མ་ཁ་ནེ། ཁ་ཁ་ནེ། ཁ་རཊྚེ། ཁ་རརྒེ་ཧ་རི་པིངྒ་ལེ། ཏེ་མིངྒི་ལེ། ཏེ་མིངྒི་ལེ། ཏེ་མིངྒི་ལེ། ཏི་མིངྒི་ལི་ནི་མཾ་ག་ལྱེ་སྭཱ་ཧཱ། བདག་གི་སྔགས་ཀྱི་ཚིག་རྣམས་གྲུབ་པར་གྱུར་ཅིག །​རྒྱལ་པོ་ཆེན་པོ་རྣམ་ཐོས་ཀྱི་བུའི་མིང་དང་། སྟོབས་དང་། དབང་ཕྱུག་དང་། བྱིན་གྱིས་བདག་དགེ་བར་གྱུར་ཅིག་སྭཱ་ཧཱ། དེ་ནས་རྒྱལ་པོ་ཆེན་པོ་ཡུལ་འཁོར་སྲུང་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་བདག་གི་འཁོར་དྲི་ཟའི་གདོན་གྱིས་བཏབ་པའི་ཚུལ་གྱི་མཚན་མ་ནི་འདི་ལྟ་བུ་



The English translation of this folio by 84000 Translating the words of the Buddha can be found at:
https://read.84000.co/translation/toh558.html?part=UT22084-090-002-797#UT22084-090-002-797