Degé Kangyur volume 90, F.83.b

སྐེམ་བྱེད་པ་ནི་གཞོན་ནུའི་གཟུགས། །​བརྗེད་བྱེད་པ་ནི་ཝ་འདྲའོ། །​ཁུ་ཚུར་ཅན་ནི་བྱ་རོག་གཟུགས། །​མ་མོ་དེ་ནི་མི་ཡི་གཟུགས། །​ཛ་མི་ཀ་ནི་རྟ་ཡི་གཟུགས། །​འདོད་པ་ཅན་ནི་རྡོ་རྗེའི་གཟུགས། །​ནམ་གྲུ་ཁྱི་ཡི་གཟུགས་ཀྱིས་ཏེ། །​སྲུལ་པོ་ཕག་གི་གཟུགས་ཀྱིས་སོ། །​མ་དགའ་བྱེད་པ་བྱི་ལའི་གཟུགས། །​བྱ་ནི་འདབ་ཆགས་གཟུགས་ཀྱིས་སོ། །​གཉའ་ལག་ཅན་ནི་བྱ་གག་གཟུགས། །​བཞིན་རྒྱན་འུག་པའི་གཟུགས་སུ་སྟེ། །​མིག་འཕྱང་བ་ནི་ཕ་བང་གཟུགས། །​འདི་དག་བྱིས་པ་སྐྲག་པར་བགྱིད། །​འདི་དག་བུ་འཕྲོག་མ་རུངས་པ། །​བྱིས་པ་རྣམས་ལ་འཇིགས་བགྱིད་པ། །​མདོ་སྡེའི་ཞགས་པས་དྲངས་ནས་ནི། །​འདི་དག་ཤིན་ཏུ་དགུག་པར་བགྱིད། །​གནོད་སྦྱིན་སྡེ་དཔོན་ཆེན་པོ་ནི། །​དྲི་ཟ་ཙནྡན་ཞེས་བགྱི་བ། །​ཡི་གེ་ཕྱག་རྒྱ་དེ་སྩལ་ཏེ། །​སོང་ལ་གདོན་ནི་དྲག་པོ་པ། །​བཅྭ་ལྔ་དེ་དག་ཁུག་ཤིག་ཅེས། །​ཕོ་ཉར་ཡང་ནི་བཏང་བར་བགྱི། །​དེ་དག་རྣམས་ནི་ཏྭ་སྐད་ཅིག་གིས། །བཅིང་བ་ལྔ་ཡིས་བཅིང་བཞིན་བཀུག །​དེ་ནས་འཇིག་རྟེན་མགོན་པོ་ལ། །​ཚངས་ཆེན་ཐལ་སྦྱར་འདི་སྐད་གསོལ། །​སྲོག་ཆགས་ས་བོན་འཇིག་བགྱིད་པ། །​འབྱུང་པོ་འདི་དག་རྣམས་ལྷགས་ཏེ། །​མགོན་པོ་ཡི་ནི་སྤྱན་སྔ་རུ། །​འདི་དག་ཆད་པས་བཤད་པར་བགྱི། །​བུད་མེད་གང་དག་བུ་མི་འཚལ། །​གང་ཞིག་བཙས་པ་འཛིན་འཚལ་བ་ས། །​ཚེས་བརྒྱད་དང་ནི་བཅུ་བཞི་ལ། །​བསླབ་བཟུང་དམ་ཆོས་སྐྱབས་མཆིས་ལ། །​མཆོད་རྟེན་ལེགས་པར་མཆོད་པར་བགྱི། །​ཁྲུས་བགྱིས་ཤིན་ཏུ་བརྒྱན་ནས་ནི། །​ས་གཞིར་ཡུངས་ཀར་གཏོར་ནས་སུ། །​མེ་ཏོག་སྤོས་ཀྱིས་བརྒྱན་པར་བགྱི། །​སྣ་ལྔའི་ཚོན་གྱི་སྐུད་པས་ནི། །​ཁོར་ཡུག་ཏུ་ནི་བསྐོར་བར་བགྱི། །​ནམ་ཕྱེད་བར་དུ་མཆིས་ནས་ནི། །​སྤྱི་བོར་ཡུངས་ཀར་བཞག་ནས་སུ། །​ཚངས་པས་རབ་ཏུ་བྱས་པ་སྟེ། །​ཚངས་པས་སྤྲུལ་ཅེས་བརྗོད་པར་བགྱི། །​ལོ་གྲངས་བཅུ་གཉིས་བར་དུ་ནི། །​གཞོན་ནུ་རྣམས་ལ་ཕན་བགྱིད་པ། །​ཚངས་པས་སྤྲུལ་པའི་མདོ་སྡེ་ཡི། །​རིག་སྔགས་འདི་ལ་གང་འདའ་བ། །​ཨ་རྫ་ཀ་ཡི་དོག་པ་བཞིན། །​མགོ་བོ་ཚལ་པ་བདུན་དུ་འགས། །​སྱཱད་ཡ་ཐེ་དན། ཨཾ་གེ །​བཾ་གེ །​བཾ་གི་ནི། བྷ་བ་ནེ། ཨི་ནནྡེ། བི་ནནྡེ། ས་ར་ལི། གི་རི་གི་རི། ཤ་བ་རི། ག་རུ་ཎི། ཤ་རུ་ཎི། གི་རི། ག་བ་རེ། ལོ་ཙ་ནི། རོ་ཥ་ཎི། ལ་ས་ནི།



The English translation of this folio by 84000 - Translating the words of the Buddha can be found at:
https://read.84000.co/translation/toh558.html?part=UT22084-090-002-833#UT22084-090-002-833