Degé Kangyur volume 90, F.75.b

དེ་ལྟ་བུའི་གྲགས་པ་དང་བཀུར་སྟི་དང་། བརྙེས་པར་བྱ་བ་བརྙེས་ནས། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་བྱ་རྒོད་ཕུང་པོའི་རི་ལས་ཤོད་དུ་བབས་ཏེ། ཡངས་པ་ཅན་གྱི་གྲོང་ཁྱེར་ཆེན་པོ་ག་ལ་བ་དེར་གཤེགས་པ་དང་། ཡངས་པ་ཅན་གྱི་ལིཙྪ་བཱི་རྣམས་ཀྱིས་བཅོམ་ལྡན་འདས་ཤིན་ཏུ་མཛེས་པ། དད་པར་འོས་པ། དབང་པོ་ཞི་བ། ཐུགས་ཞི་བ། དབང་པོ་དུལ་བ། ཐུགས་དུལ་བ། དུལ་བ་དང་། ཞི་གནས་ཀྱི་དམ་པའི་ཕ་རོལ་ཏུ་ཕྱིན་པ་བརྙེས་པ། དབང་པོ་དབེན་ཞིང་ཁུགས་པ། གླང་པོ་ཆེན་པོ་ལྟ་བུ་ཤིན་ཏུ་དུལ་བ། མཚོ་ལྟར་དང་ཞིང་རྙོག་པ་མེད་ལ་རྣམ་པར་གསལ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུས་ཤིན་ཏུ་བརྒྱན་པ། ཤིང་སཱ་ལའི་རྒྱལ་པོ་ལྟར་དེ་བཞིན་གཤེགས་པའི་སྐུ་རྣམ་པར་སྤྲས་པ། ཉི་མ་ལྟར་འོད་ཟེར་གྱི་དྲ་བ་ཀུན་ཏུ་འགྱེད་པ། མཚན་མོ་མུན་པའི་ནང་ན་རི་བོའི་སྤོ་ལ་མེའི་ཕུང་པོ་རབ་ཏུ་འབར་བ་དང་འདྲ་ཞིང་བཅོམ་ལྡན་འདས་གསེར་གྱི་རི་བོ་ཆེན་པོ་དམ་པ་ལྟར་ལྷམ་མེ་ལྷན་ནེ་ལྷང་ངེ་རྒྱང་རིང་པོ་ནས་གནས་དེར་གཤེགས་པ་མཐོང་ངོ་། །​མཐོང་མ་ཐག་ཏུ་ཡངས་པ་ཅན་གྱི་ལི་ཙྪ་བཱི་རྣམས་བཅོམ་ལྡན་འདས་ལ་སེམས་དད་པར་གྱུར་ནས། སེམས་དད་པར་གྱུར་པ་དེ་དག་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་ཆེན་པོར་ལམ་གང་ནས་གཤེགས་པའི་ལམ་དེ་ཕྱགས་ཤིང་ཆག་ཆག་འདེབས། བྱི་དོར་བྱེད། མེ་ཏོག་འཐོར། དར་གྱི་ལྡ་ལྡི་དང་། དྲིལ་བུ་དང་། གདུགས་དང་། རྒྱལ་མཚན་དང་། བ་དན་སྣ་ཚོགས་ཀྱིས་བརྒྱན་ཏེ་བདུག་སྤོས་སྣ་ཚོགས་ཀྱིས་བདུགས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ལོ། །​དེ་ནས་བཅོམ་ལྡན་འདས་ཀྱི་ཕྱག་གི་མཐིལ་འཁོར་ལོ་རྩིབས་སྟོང་དང་ལྡན་པའི་རི་མོ་ཅན་མེ་ཏོག་པདྨའི་སྙིང་པོ་ལྟར་འཇམ་པ། སྔོན་ལེགས་པར་སྤྱད་པའི་མཚན་གྱིས་བརྒྱན་པ། གཞོན་ཤ་ཆགས་ཤིང་འཇམ་པ། ཉི་མའི་འོད་ཟེར་བས་ལྷག་པའི་འོད་དང་ལྡན་པ། འོད་ཟེར་བརྒྱ་ཕྲག་མང་པོ་ཀུན་ཏུ་འཕྲོ་བ། དྲི་མ་མེད་པའི་ཕྱག་གིས་ལིཙྪ་བཱི་དག་གི་མགོ་ལ་བྱུགས་ཏེ་རྗེས་སུ་བསྟན་པ་མཛད་དོ། །​དེ་ནས་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་ཆེན་པོའི་ནང་དུ་གཤེགས་ནས་ནམ་གྱི་གུང་ཐུན་ལ་སྒོ་སྐྱེས་ཀྱི་གཞི་ཞབས་ཀྱིས་མནན་ནས་ཕྱོགས་བཞིར་གཟིགས་ཏེ་ཕྱག་གསེར་གྱི་མདོག་ཅན་བརྐྱང་ནས་ན་བཟའ་བླ་གོས་གསོལ་ཏེ་བཀའ་སྩལ་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh558.html?part=UT22084-090-002-817#UT22084-090-002-817