།རིགས་ཀྱི་བུ་ཤིན་ཏུ་དང་བའི་དད་པ་དང་ལྡན་པའི་སྐྱེས་པའམ་བུད་མེད་གང་ལ་ལ་ཞིག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལས་ཀྱི་སྒྲིབ་པ་ཡོངས་སུ་སྦྱོང་བའི་ལེའུ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། དྲན་པས་མི་བརྗེད་པར་བྱས་ཏེ་གཞན་དག་ལ་རྒྱ་ཆེར་ཡང་དག་པར་སྟོན་པར་བྱེད་ན་བསོད་ནམས་ཀྱི་ཕུང་པོ་ཚད་མེད་དཔག་ཏུ་མེད་པ་སྙེད་ཐོབ་པར་འགྱུར་རོ། །འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་ཐམས་ཅད་དུས་གཅིག་ཏུ་མིའི་ལུས་མངོན་པར་གྲུབ་པར་གྱུར་ལ། མིའི་ལུས་ཐོབ་ནས་ཀྱང་ཐམས་ཅད་རང་སངས་རྒྱས་ཀྱི་ལམ་མངོན་པར་གྲུབ་པར་གྱུར་ཏེ། སྐྱེས་པའམ། བུད་མེད་གང་ལ་ལ་ཞིག་གིས་ནམ་འཚོའི་བར་དུ་བཀུར་སྟི་དང་། བླ་མར་བྱས་ཏེ་ཡོ་བྱད་རྣམ་པ་སྣ་བཞི་པོ་དག་གིས་མཆོད་པར་བྱས་ཏེ། རང་སངས་རྒྱས་རེ་རེ་ལ་ཡང་སོ་སོ་ནས་རིའི་རྒྱལ་པོ་རི་རབ་དང་མཉམ་པའི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། རང་སངས་རྒྱས་དེ་དག་ཡོངས་སུ་མྱ་ངན་ལས་འདས་པའི་འོག་ཏུ་ཡང་རིན་པོ་ཆེ་ལས་མཆོད་རྟེན་བརྩིགས་ནས་མཆོད་པ་བྱས་ཏེ་མཆོད་རྟེན་དེ་དག་ཀྱང་དཔག་ཚད་བཅུ་གཉིས་ཀྱི་ཚད་ཙམ་དུ་མཐོ་ཞིང་མེ་ཏོག་དང་སྤོས་དང་རིན་པོ་ཆེའི་རྒྱལ་མཚན་དང་བ་དན་དང་གདུགས་མང་པོ་དག་གིས་རྟག་པར་མཆོད་པ་བྱས་ན་རིགས་ཀྱི་བུ་འདི་ཇི་སྙམ་དུ་སེམས། གང་ཟག་དེ་དག་གིས་ཐོབ་པའི་བསོད་ནམས་གང་ཡིན་པ་དེ་ནི་ཅི་མང་བ་ཡིན་སྙམ་མམ། ལྷའི་དབང་པོས་གསོལ་པ། བཅོམ་ལྡན་འདས་ཤིན་ཏུ་མང་ལགས་སོ། །རིགས་ཀྱི་བུ་གལ་ཏེ་གང་ལ་ལ་ཞིག་གིས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལས་ཀྱི་སྒྲིབ་པ་ཡོངས་སུ་སྦྱོང་བའི་ལེའུ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། དྲན་པས་མི་བརྗེད་པར་བྱས་ཏེ་གཞན་དག་ལ་རྒྱ་ཆེར་ཡང་དག་པར་སྟོན་པས་འཐོབ་པའི་བསོད་ནམས་གང་ཡིན་པ་དེ་སྔར་བསྟན་པའི་མཆོད་པ་བྱས་པའི་བསོད་ནམས་གང་ཡིན་པ་དེ་དང་བསྒྲུན་ན་བརྒྱའི་ཆར་ཡང་ཉེ་བར་མི་འགྲོ །བརྒྱ་སྟོང་དང་། བྱེ་བའི་ཆར་ཡང་ཉེ་བར་མི་འགྲོ་བ་ནས།