ཁྱེད་ཀྱིས་འདི་དག་ནི་ཡོངས་སུ་མྱ་ངན་ལས་འདས་པའི་ཡང་དག་པའི་མཚན་ཉིད་ཡིན་པར་རིག་པར་བྱའོ། །རེས་འགའ་ཡོངས་སུ་མྱ་ངན་ལས་འདས་པ་ཡོད་པར་མཐོང་བ་གང་ཡིན་པ་དེ་ཡང་ཐབས་མཁྱེན་པས་བསྟན་པ་ཡིན་ལ་རིང་བསྲེལ་བཞག་ནས་སེམས་ཅན་རྣམས་ཀྱིས་བཀུར་སྟི་དང་རིམ་གྲོ་བྱས་ཏེ་མཆོད་པ་བྱེད་པར་འགྱུར་བ་ཡང་དེ་བཞིན་གཤེགས་པའི་བྱམས་པའི་དགེ་བའི་རྩ་བའི་མཐུ་ལས་གྱུར་པ་ཡིན་པས་གང་གིས་མཆོད་པ་བྱས་པ་དེ་དག་མ་འོངས་པའི་དུས་ན་མི་ཁོམ་པ་བརྒྱད་དང་བྲལ་ཞིང་དེ་བཞིན་གཤེགས་པ་རྣམས་ལ་བསྙེན་བཀུར་བྱེད་པ་དང་། དགེ་བའི་བཤེས་གཉེན་དང་ཕྲད་ནས་དགེ་བའི་སེམས་སྟོར་བར་མི་འགྱུར་བ་དང་། བསོད་ནམས་ཀྱི་རྣམ་པར་སྨིན་པ་དཔག་ཏུ་མེད་པ་དང་ལྡན་ཞིང་མྱུར་དུ་ངེས་པར་བྱུང་ནས་འཁོར་བ་དག་གིས་བླངས་ཤིང་འཆིང་བར་མི་འགྱུར་བས་འདི་ལྟ་བུའི་སྤྱོད་པ་གྱ་ནོམ་པ་གང་ཡིན་པ་དེ་ཁྱོད་ཀྱིས་ནན་ཏན་གྱིས་བསྒྲུབ་པར་བྱ་ཞིང་བག་མེད་པར་མི་བྱའོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་ལ་མངོན་སུམ་དུ་ཡོངས་སུ་མྱ་ངན་ལས་མི་འདའ་བ་དང་། ཤིན་ཏུ་ཟབ་པའི་མཛད་པ་བཀས་བཤད་པ་ཐོས་ནས་གུས་པས་ཐལ་མོ་སྦྱར་ནས་འདི་སྐད་ཅེས་བདག་ནི་དེང་གདོད་དེ་བཞིན་གཤེགས་པ་སྟོན་པ་ཆེན་པོ་ཡོངས་སུ་མྱ་ངན་ལས་མི་འདའ་བ་དང་། རིང་བསྲེལ་བཞག་པ་ཡང་སེམས་ཅན་རྣམས་ལ་སྨན་པར་བགྱི་བ་ལགས་པར་ཁོང་དུ་ཆུད་པས་ལུས་དང་སེམས་དགའ་མགུ་རངས་ཤིང་ངོ་མཚར་རྨད་དུ་གྱུར་ཏོ་ཞེས་གསོལ་ཏོ། །དེ་བཞིན་གཤེགས་པའི་སྐུ་ཚེའི་ཚད་བསྟན་པའི་ལེའུ་འདི་བསྟན་པ་ན་སེམས་ཅན་ཚད་མེད་གྲངས་མེད་དཔག་ཏུ་མེད་པ་སྙེད་མི་མཉམ་པ་དང་མཉམ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་གཤེགས་པ་བཞི་པོ་ཡང་དེ་ཉིད་དུ་མི་སྣང་བར་གྱུར་ཏོ། །བྱང་ཆུབ་སེམས་དཔའ་མཛེས་པའི་ཏོག་ཀྱང་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་འདུག་པའི་སྟན་ལས་ལངས་ཏེ་སླར་སྔོན་གྱི་གནས་སུ་སོང་ངོ་། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་དེ་བཞིན་གཤེགས་པའི་སྐུ་ཚེའི་ཚད་བསྟན་པའི་ལེའུ་སྟེ་གཉིས་པའོ།།