འོན་ཀྱང་སྔོན་གྱི་བྱམས་པའི་དགེ་བའི་མཐུས་ཕྱི་མའི་མཐར་ཐུག་པའི་བར་དུ་སེམས་ཅན་དེ་དག་ལ་རྒྱ་ཆེར་བསྟན་པ་མཛད་པ་ལ་མཐར་ཐུག་པ་མེད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་ངས་དེང་གྲོང་དང་གྲོང་ཁྱེར་དང་། གྲོང་རྡལ་དེ་དག་ཏུ་སོང་སྟེ་རྒྱལ་པོ་དང་བློན་པོ་དང་བྲམ་ཟེ་དང་། རྒྱལ་རིགས་དང་། དམངས་རིགས་ལ་སོགས་པའི་ཕོ་བྲང་དང་། ཁྱིམ་དག་ཏུ་བསོད་སྙོམས་བསླང་བར་བྱའོ། །སྙམ་པའི་དགོངས་པ་མི་མངའ་མོད་ཀྱི། འོན་ཀྱང་སྔོན་སྐུ་དང་གསུང་དང་ཐུགས་ཀྱི་སྤྱོད་པ་གོམས་པར་གྱུར་པའི་མཐུས་རང་གི་ངང་གིས་དེ་དག་ཏུ་གཤེགས་ནས་ཕན་པའི་དངོས་པོ་མཛད་ཅིང་བསོད་སྙོམས་སློང་བ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པའི་སྐུ་ལ་བཀྲེས་པ་དང་། སྐོམ་པ་དང་། བཤང་གཅི་དང་། ཉམ་ཆུང་བའི་མཚན་མ་ཡང་མི་མངའ་ལ་བསོད་སྙོམས་སློང་བར་མཛད་ཀྱང་བཤོས་གསོལ་བ་མི་མངའ་ཞིང་རྣམ་པར་རྟོག་པ་ཡང་མི་མངའ་མོད་ཀྱི། འོན་ཀྱང་རང་གི་ངང་གིས་སེམས་ཅན་རྣམས་ལ་ཕན་གདགས་པའི་ཕྱིར་བཤོས་གསོལ་བ་མངའ་བའི་མཚན་མ་སྟོན་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་སེམས་ཅན་མང་པོ་འདི་དག་ལ་རབ་དང་། འབྲིང་དང་། ཐ་མ་ཡོད་པ་དེ་དག་གི་དབང་པོ་དང་རང་བཞིན་ཇི་ལྟ་བ་བཞིན་དུ་ཆོས་བསྟན་པར་བྱའོ་སྙམ་པའི་དགོངས་པ་མི་མངའ་མོད་ཀྱི། འོན་ཀྱང་སངས་རྒྱས་བཅོམ་ལྡན་འདས་རྣམ་པར་རྟོག་པ་མི་མངའ་བར་ཡང་དེ་དག་གི་སྣོད་དང་དབང་པོའི་སྐྱོན་ཇི་ལྟ་བ་བཞིན་དུ་ཤིན་ཏུ་འཚམ་པར་དེ་དག་ལ་ཆོས་སྟོན་པར་མཛད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་སེམས་ཅན་འདི་དག་ནི་ང་ལ་བཀུར་སྟི་དང་རིམ་གྲོ་མི་བྱེད་ཅིང་རྟག་པར་ང་ལ་སྨོད་པའི་ཚིག་འབྱིན་པར་བྱེད་པས་དེ་དག་དང་ལྷན་ཅིག་ཏུ་གཏམ་སྨྲ་བར་མི་བྱའོ། །སེམས་ཅན་འདི་དག་ནི་ང་ལ་བཀུར་སྟི་དང་རིམ་གྲོ་བྱེད་ཅིང་རྟག་པར་ངའི་བསྔགས་པ་རྗོད་པར་བྱེད་པས་ངས་དེ་དག་དང་ལྷན་ཅིག་ཏུ་གཏམ་སྨྲ་བར་བྱའོ་སྙམ་པའི་དགོངས་པ་མི་མངའ་མོད་ཀྱི། འོན་ཀྱང་དེ་བཞིན་གཤེགས་པས་བྱམས་པ་དང་ཐུགས་རྗེའི་དགོངས་པ་མཉམ་པ་བསྐྱེད་ནས་གཉིས་སུ་མེད་པར་གྱུར་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ།