།དེས་ནི་མདོ་སྡེ་འདི་ལ་མོས་པར་འགྱུར། །གང་ཞིག་མིག་ཟད་ངོ་བོ་མ་རྟོགས་པ། །མིག་སྟོང་ཉིད་ལ་རྟག་ཏུ་རྨོངས་པར་འགྱུར། །དེས་ནི་ཀུན་འཛིན་ཡེ་ཤེས་མི་སྐྱེད་པས། །མདོ་སྡེ་འདི་ལ་རབ་ཏུ་མོས་མི་འགྱུར། །གང་ཞིག་མིག་ཟད་ངོ་བོ་རབ་རྟོགས་པ། །མིག་སྟོང་ཉིད་ནི་རྟག་པར་རྟོགས་པར་འགྱུར། །དེས་ནི་ཀུན་འཛིན་ཡེ་ཤེས་རབ་བསྐྱེད་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མིག་ཟད་ངོ་བོ་ཉིད་རྟོགས་པ། །དེས་ནི་ཀུན་འཛིན་ཡེ་ཤེས་བསྒྲུབ་པ་ན། །བླ་མེད་མ་ཆགས་ཡེ་ཤེས་རབ་བསྒྲུབས་པས། །མདོ་སྡེ་འདི་ལ་རབ་ཏུ་མོས་པར་འགྱུར། །གང་ཞིག་མདོ་སྡེ་འདི་ལ་མ་མོས་པ། །མིག་ཟད་ངོ་བོ་ཉིད་ལ་རྟག་ཏུ་རྨོངས། །དེས་ནི་ཏིང་འཛིན་རྣམས་ལས་ཉམས་པས་ན། །བླ་མེད་ཡེ་ཤེས་ཐོབ་པར་ཤིན་ཏུ་དཀའ། །གང་ཞིག་མདོ་སྡེ་འདི་ལ་རབ་མོས་ཤིང་། །མིག་ཟད་ངོ་བོ་ཉིད་ནི་མངོན་རྟོགས་པ། །དེས་ནི་ཏིང་འཛིན་མངོན་པར་བསྒྲུབས་པས་ན། །བླ་མེད་ཡེ་ཤེས་མངོན་བྱེད་དཀའ་བ་མེད། །གང་ཞིག་མིག་ཟད་ངོ་བོ་ཉིད་རྟོགས་ཤིང་། །བདག་མེད་པ་ཡི་མཚན་ཉིད་རབ་ཤེས་པ། །དེས་ནི་རྟག་ཏུ་ཆོས་འདི་ཐོས་པས་ན། །མངོན་པར་ཡིད་ཆེས་ཐེ་ཙོམ་མེད་པ་འཐོབ། །གང་ཞིག་མིག་ཟད་ངོ་བོ་ཉིད་སེམས་ཤིང་། །ཉིན་མཚན་རབ་བརྩོན་ལེ་ལོ་མེད་གྱུར་པ། །དེས་ནི་ཀུན་འཛིན་སྤོབས་པ་མངོན་བསྒྲུབས་ནས། །མདོ་སྡེ་འདི་ནི་རྟག་ཏུ་སྟོན་པར་འགྱུར། །གང་ཞིག་མདོ་སྡེ་འདི་ནི་སེམས་བྱེད་པ། །འོད་ཟེར་འབྱིན་པའི་ཡེ་ཤེས་རྫོགས་པར་འགྱུར། །དེས་ནི་དེ་བཞིན་གཤེགས་པ་རབ་སྟོན་ཅིང་། །མིག་སྟོང་ཉིད་ནི་རབ་ཏུ་རྟོགས་པར་འགྱུར། །གང་ཞིག་མཆོད་རྟེན་བརྒྱ་སྟོང་རབ་བྱས་ཤིང་། །སངས་རྒྱས་ཐམས་ཅད་མཆོད་པ་བྱས་པ་བས། །གང་ཞིག་མདོ་སྡེ་འདི་ནི་སེམས་བྱེད་ན། །འདི་ཡི་ཡོན་ཏན་དེ་བས་ཁྱད་པར་འཕགས། །གང་གིས་རོལ་མོ་བརྒྱ་སྟོང་རབ་བྱས་ནས། །དེ་བཞིན་གཤེགས་པའི་རིང་བསྲེལ་མཆོད་པ་བྱས། །གང་ཞིག་མདོ་སྡེ་འདི་ནི་ཐོས་གྱུར་ན། །འདི་ཡི་ཡོན་ཏན་དེ་བས་ཁྱད་པར་འཕགས། །སངས་རྒྱས་སྤྱན་གྱིས་གཟིགས་པའི་སེམས་ཅན་རྣམས། །བསྐལ་པ་དག་ནི་བྱེ་བ་ཚད་མེད་པར། །དེ་བཞིན་གཤེགས་དང་མཚུངས་པར་མཆོད་པ་བས། །མདོ་སྡེ་འདི་བཟུང་བསོད་ནམས་ཁྱད་པར་འཕགས།