དེ་ལ་ཀུན་དུ་ཆགས་པ་སྐྱེད། །ཇི་ལྟར་སྒྱུ་མའི་བུད་མེད་ལ། །འདོད་ཆགས་ལྡན་པའི་སེམས་བསྐྱེད་ཀྱང་། །དེ་ལ་བུད་མེད་ཡོད་མ་ཡིན། །ཕྱིན་ཅི་ལོག་གི་སེམས་ཀྱིས་ནི། །བསྐལ་པ་བྱེ་བ་གྲངས་མེད་དུ། །བློ་གྲོས་ཆུང་རྣམས་འཁོར་བར་བྱེད། །དེ་ནས་དངོས་པོ་མེད་ཤེས་ན། །བུད་མེད་ཐམས་ཅད་མཚན་ཉིད་མེད། །ཏིང་འཛིན་ཞི་བ་བརྗོད་པ་ནི། །བུད་མེད་གཟུགས་ཀྱིས་རབ་ཏུ་བསྟན། །འཇམ་དཔལ་དེ་ལྟར་ན་བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འདི་ནི་བུད་མེད་བདག་སྐྱེས་པར། །ཇི་ལྟར་སྐྱེས་པས་བརྗོད་པ་ལས། །དེ་ཡི་ཚེ་ན་དེ་ཡི་སེམས། །འདོད་ཆགས་ལྡན་པ་བརྫུན་པ་འབྱུང་། །སེམས་ནི་གཟུགས་མེད་གཟུང་བ་མེད། །བུད་མེད་སྐྱེས་པར་བསྟན་པ་མེད། །ཀུན་ཏུ་རྟོག་པས་སྒྲོ་བཏགས་ནས། །སྐྱེས་པའི་འདུ་ཤེས་འབྱུང་བར་འགྱུར། །འདི་ནི་བུད་མེད་བདག་དཔའ་ཞེས། །འདུ་ཤེས་གང་གིས་རྣམ་བརྟགས་པ། །དེ་ངས་སྨིག་རྒྱུ་འདྲར་གསུངས་ཏེ། །དེ་ལ་སྐྱེས་པ་ཡོད་མ་ཡིན། །སྐྱེས་པ་ཉིད་ནི་བརྫུན་པས་ན། །དེ་ནི་མེད་ལས་བྱུང་བ་ཡིན། །ཏིང་འཛིན་ཞི་བ་བརྗོད་པ་ནི། །དཔའ་བོའི་གཟུགས་ཀྱིས་རབ་ཏུ་བསྟན། །འཇམ་དཔལ་དེ་ལྟར་ན་སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་ཁྱེའུའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ལྗོན་པའི་མྱུ་གུ་ཡོད་མིན་ན། །མེ་ཏོག་འབྱུང་བར་ག་ལ་འགྱུར། །མེ་ཏོག་ཡོད་པ་མ་ཡིན་ན། །འབྲས་བུ་འཐོབ་པའང་མེད་པ་ལྟར། །བུད་མེད་ཡོད་པ་མ་ཡིན་པས། །ཁྱེའུ་ཡང་དམིགས་པར་མི་འགྱུར་ཏེ། །བརྟགས་པའི་དབང་དུ་སོང་རྣམས་ཀྱིས། །ཁྱེའུ་ཞེས་བྱ་བར་བཏགས་པ་ཡིན། །བུད་མེད་སྐྱེ་བ་མེད་ཤེས་ན། །ཁྱེའུ་ཡང་འབྱུང་བ་ཡོད་མིན་ཏེ། །དངོས་པོ་ཐམས་ཅད་མེད་རྟོགས་པས། །དེས་ན་ཁྱེའུ་ནི་ཏིང་འཛིན་བསྟན། །འཇམ་དཔལ་དེ་ལྟར་ན་ཁྱེའུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན་བྱང་ཆུབ་སེམས་དཔས་བུ་མོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན།