འདུས་པ་རེ་རེའི་ཚེ་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་ཚད་མེད་པ་སྙེད་ཐེག་པ་གཅིག་གི་ལམ་དུ་ཞུགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་བསྐལ་པ་དེ་ལ་འཁོར་ལོས་སྒྱུར་བའི་རྒྱལ་པོ་དཔའ་བོའི་སྡེ་ཞེས་བྱ་བ་རིན་པོ་ཆེ་བདུན་དང་ལྡན་པ། གླིང་བཞི་ལ་དབང་བྱེད་པ་ཞིག་བྱུང་ངོ་། དེའི་ཚེ་འཛམ་བུའི་གླིང་ན་གྲོང་ཁྱེར་ཆེན་པོ་དཔག་ཚད་བཅུ་དྲུག་གིས་འཁོར་བ་ཞིག་ཡོད་དེ། མི་བྱེ་བ་ཕྲག་བརྒྱད་ཁྲི་གནས་པ། རབ་ཏུ་བདེ་ཞིང་དགའ་བ། འབྱོར་པ་རྒྱས་པ། འོབས་རིམ་པ་བདུན་དང་། ལྗོན་ཤིང་དཀྲིགས་པ་རིམ་པ་བདུན་དང་། ལམ་སྲང་རིམ་པ་བདུན་དང་། དྲིལ་བུའི་དྲ་བ་རིམ་པ་བདུན་དང་། སྐྱེད་མོས་ཚལ་སྟོང་གིས་གྲོང་ཁྱེར་དེ་ཡོངས་སུ་བསྐོར་ཅིང་རབ་ཏུ་བརྒྱན་པར་གྱུར་ཏོ། །སྐྱེད་མོས་ཚལ་རེ་རེའི་ཚད་ཀྱང་ཆུ་ཞེང་འདྲ་སྟེ། དཔག་ཚད་ཉི་ཤུ་ཉི་ཤུ་ཡོད་དོ། །དེ་རེ་རེ་ཡང་ར་བ་རིམ་བདུན་དང་། དྲ་བ་རིམ་བདུན་དང་། བཀོད་པ་རྣམ་པ་སྣ་ཚོགས་དང་། རིན་པོ་ཆེ་སྣ་ཚོགས་ཤིན་ཏུ་གྱ་ནོམ་པ་དག་གིས་རབ་ཏུ་མཛེས་པར་བྱས་པས་དཔེར་ན་ལྷ་རྣམས་ཀྱི་སྐྱེད་མོས་ཚལ་ཇི་ལྟ་བ་བཞིན་ནོ། །དེ་དག་རེ་རེ་ལ་ཡང་རྫིང་དང་རྫིང་བུ་རིན་པོ་ཆེ་བཻ་དཱུརྱས་འོག་གཞི་དང་འགྲམ་བྱས་པ། རྡོའི་སྙིང་པོ་དང་རིན་པོ་ཆེ་སྣ་ཚོགས་ཀྱིས་ལམ་སྟེགས་བྱས་ཤིང་གཅལ་དུ་བཀྲམ་པ། རིན་པོ་ཆེའི་ལྗོན་ཤིང་མེ་ཏོག་སྣ་ཚོགས་རབ་ཏུ་རྒྱས་པ་ཕྲེང་དུ་དཀྲིགས་པ་བརྒྱ་བརྒྱ་ཡོད་དོ། །གྲོང་ཁྱེར་ཆེན་པོ་དེའི་ནང་ན་རྒྱལ་པོ་དེའི་ཕོ་བྲང་དཔག་ཚད་བདུན་གྱིས་འཁོར་བ་ཡོད་དེ་གསེར་དང་རིན་པོ་ཆེ་སྣ་ཚོགས་ལས་མངོན་པར་གྲུབ་པ། མཐའ་མ་རིན་པོ་ཆེས་རབ་ཏུ་བརྒྱན་པ། བཻ་དཱུརྱ་དང་། ཡིད་བཞིན་གྱི་ནོར་བུ་རིན་པོ་ཆེའི་དྲ་བས་གཡོགས་པ། ཤིང་ཏ་ལ་རྣམས་ཀྱིས་རབ་ཏུ་མཛེས་པར་བརྒྱན་པ། རྫིང་བུ་བཅུ་གཉིས་ཀྱིས་རབ་ཏུ་བསྐོར་བ། འོག་གཞི་གསེར་ཡང་དག་པས་གཅལ་དུ་བཀྲམ་པ། བཻ་དཱུརྱ་དང་རིན་པོ་ཆེ་སྣ་ཚོགས་ཀྱི་ཟམ་པ་བཏགས་པ། གསེར་ཤིན་ཏུ་གྱ་ནོམ་པ་འབའ་ཞིག་གིས་ལམ་སྟེགས་དང་ལམ་བྱས་པར་གྱུར་ཏེ། རྫིང་བུ་དེ་དག་གི་ནང་ན་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དཀར་པོ་རབ་ཏུ་རྒྱས་པ་དག་གིས་གང་བར་གྱུར་ཏོ། །འཁོར་ལོས་སྒྱུར་བའི་རྒྱལ་པོ་དེ་ལ་བཙུན་མོ་ནི་ཉིས་སྟོང་ཡོད་དོ།