།གཞན་ཡང་སེམས་ཅན་རྣམས་ལ་ཆོས་ཡང་དག་པར་རྣམ་པར་ཕྱེ་སྟེ་བསྟན་པས་ལྷ་དང་། མི་བྱེ་བ་ཕྲག་ཉི་ཤུ་རྩ་བཞི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །བྱང་ཆུབ་སེམས་དཔའ་དེ་གཉིས་ཇི་སྲིད་འཚོའི་བར་དུ་ནན་ཏན་གྱིས་ཚངས་པར་སྤྱོད་པ་ཡང་དག་པར་སྤྱད་ནས་དེ་བཞིན་གཤེགས་པ་དེས་དུས་བར་མར་གསུངས་པའི་ཡང་དག་པའི་ཆོས་དང་། དུས་ཐ་མར་གསུངས་པའི་ཡང་དག་པའི་ཆོས་རྣམས་རབ་ཏུ་བསྲུངས་ཤིང་ཡོངས་སུ་བཟུང་ངོ་། །གཞན་ཡང་དེའི་ཚེ་དེ་དག་གིས་སེམས་ཅན་བྱེ་བ་ཕྲག་བཞིའི་བར་དུ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱས་སོ། །བྱང་ཆུབ་སེམས་དཔའ་དེ་གཉིས་རིམ་གྱིས་སངས་རྒྱས་བརྒྱ་སྟོང་མང་པོ་ལ་རིམ་གྲོ་དང་། མཆོད་པ་བྱས་ནས་དེ་བཞིན་གཤེགས་པ་རྣམས་ཀྱི་ཏིང་ངེ་འཛིན་དང་། ཡང་དག་པའི་ཆོས་རྣམས་མ་ལུས་པར་ཡོངས་སུ་བཟུང་བས་བསྐལ་པ་ཉི་ཁྲི་འདས་ནས་དེ་བཞིན་གཤེགས་པ་རིན་པོ་ཆེའི་ཏོག་ཅེས་བྱ་བ་ཆོས་ཀྱི་འཁོར་ལོ་རྗེས་སུ་བསྐོར་བ་དང་ཕྲད་པར་གྱུར་པས་སེམས་ཅན་ཚད་མེད་པ་སྙེད་བཏུལ་ཏེ། །ཡོངས་སུ་སྨིན་པར་བྱས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་དེའི་ཞིང་ནི་ཤིན་ཏུ་རྣམ་པར་དག་ཅིང་ཉན་ཐོས་ཀྱི་མིང་ཡང་མེད་པས་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་འབའ་ཞིག་གིས་གང་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་ཡོངས་སུ་མྱ་ངན་ལས་འདས་པའི་ཚེ་འདི་སྐད་དུ་ང་ཡོངས་སུ་མྱ་ངན་ལས་འདས་པའི་འོག་ཏུ་བྱང་ཆུབ་སེམས་དཔའ་སྤྲིན་གྱི་དབྱངས་ཞེས་བྱ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མཚན་ཡང་དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཞེས་བྱ་བར་འགྱུར་རོ། །སངས་རྒྱས་དེའི་ཞིང་ནི་བཀོད་པ་ཕུན་སུམ་ཚོགས་པ། ཡོན་ཏན་དཔག་ཏུ་མེད་པ་ལས་མངོན་པར་གྲུབ་པ། བྱང་ཆུབ་སེམས་དཔའ་དང་། ཉན་ཐོས་ཀྱི་འཁོར་ཕུན་སུམ་ཚོགས་པར་མ་གྱུར་པ་མེད་དོ། །དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཡོངས་སུ་མྱ་ངན་ལས་འདས་པའི་འོག་ཏུ་བྱང་ཆུབ་སེམས་དཔའ་དཔག་ཏུ་མེད་པའི་དབྱངས་ཞེས་བྱ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།