དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་དེ་ཐོས་པས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེའི་འོག་ཏུ་ལོ་ཉི་ཁྲིའི་བར་དུ་གཉིད་ཀྱང་མེད། འདོད་པ་དང་། ཁོང་ཁྲོ་བ་དང་། རྣམ་པར་འཚེ་བའི་བསམ་པ་ཡང་མེད། ཟས་ཀྱི་འདུ་ཤེས་ཀྱང་མེད། ཉལ་བའི་འདུ་ཤེས་ཀྱང་མེད། ན་བའི་རྐྱེན་ཡང་མེད། སྨན་ལ་སོགས་པ་ཡོངས་སུ་ཚོལ་བའི་འདུ་ཤེས་ཀྱང་མེད། འཇིག་རྟེན་པའི་ལྟད་མོ་དང་། གཏམ་དང་། རྩེད་མོ་ལ་ཡང་དགའ་བ་མེད་པར་དེ་བཞིན་གཤེགས་པ་དེས་ཆོས་བསྟན་པ་རྩེ་གཅིག་ཏུ་མཉན་པས་སྟན་ལས་མ་ལངས་པར་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་དེ་བཞིན་གཤེགས་པ་དེས་བཀའ་སྩལ་པ། རིགས་ཀྱི་བུ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་ལ་འདི་ལྟར་ཐབས་མཁས་པར་གྱུར་པ་དེ་དེང་ཁྱེད་ཡོངས་སུ་ཚོལ་བར་བྱེད་དམ། བྱང་ཆུབ་སེམས་དཔའ་དེ་གཉིས་ཀྱིས་གསོལ་པ། བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པའི་མིང་ཡང་ཡང་དག་པར་རྗེས་སུ་མི་མཐོང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པའི་ཆོས་མཆིས་པར་ཡང་ཡང་དག་པར་རྗེས་སུ་མི་མཐོང་ན་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་ལྟ་སྨོས་ཀྱང་ཅི་འཚལ་ལགས། བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱང་ཡང་དག་པར་མི་དམིགས། །ཆོས་རྣམས་ཀྱི་རྣམ་པར་གཞག་པ་ཡང་ཡང་དག་པར་མི་དམིགས་པས་ཆོས་ཐམས་ཅད་ལ་གནས་པ་ཡང་མ་ལགས། མི་གནས་པ་ཡང་མ་ལགས་སོ། །བཅོམ་ལྡན་འདས་བདག་ཅག་དེ་ལྟར་མཐོང་བ་ལ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་འདི་ལྟར་ཐབས་མཁས་པ་དེ་ཡོངས་སུ་ཚོལ་བར་བགྱིད་པ་འམ། ཡོངས་སུ་ཚོལ་བར་མི་བགྱིད་པ་ལྟ་མཆིས་པར་ག་ལ་འགྱུར། །བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱི་ཚུལ་རྣམ་པར་གཞག་པ་ལ་དེ་ལྟར་ཐབས་མཁས་པ་ཡོངས་སུ་ཚོལ་བར་བགྱིད་པ་ཡང་ཡང་དག་པར་རྗེས་སུ་མི་མཐོང་། ནང་ངམ། ཕྱི་རོལ་ལམ། དེ་གཉིས་ཀྱི་བར་རམ། ཆོས་ཐམས་ཅད་ཅེས་བགྱི་བ་འམ། ཆོས་ཀྱི་ཚུལ་ལ་དེ་ལྟར་ཐབས་མཁས་པ་རྣམ་པར་གཞག་པ་ཞེས་བགྱི་བ་ཡང་དག་པར་རྗེས་སུ་མི་མཐོང་།