།བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་འགའ་ཙམ་ཡང་རྣམ་པར་གཞག་པ་མི་མཐོང་ལ། ཆོས་ཐམས་ཅད་ཀྱི་གནས་མཆོག་ཏུ་རྣམ་པར་གཞག་ཏུ་ཡོད་པར་ཡང་མི་མཐོང་ཞིང་རྣམ་པར་རྟོག་པ་མེད་པ་དང་། མཆོག་ཏུ་རྣམ་པར་རྟོག་པ་མེད་པ་དང་། ཀུན་ཏུ་རྣམ་པར་རྟོག་པ་མེད་པར་གྱུར་ན། གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་ཡང་འདུག་པ་འམ། འགྲོ་བ་ཞེས་བྱ་བ་ཡང་དག་པར་མི་མཐོང་ལ་རྣམ་པར་རྟོག་པ་ཡང་མེད། ཁྱད་པར་དུ་རྣམ་པར་རྟོག་པ་ཡང་མེད། ཀུན་དུ་རྣམ་པར་རྟོག་པ་ཡང་མེད་དེ། ཆོས་ཐམས་ཅད་ནམ་མཁའ་ཡོངས་སུ་དག་པ་ལྟར་མཐོང་ཞིང་འོད་ཀྱིས་རབ་ཏུ་གསལ་བར་གྱུར་བས་ཉོན་མོངས་པ་ཡོངས་སུ་སྤོང་བ་དང་། ཆོས་ཐམས་ཅད་འོད་ཀྱིས་རབ་ཏུ་སྣང་བར་བྱེད་པའི་ཕྱིར་གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་ལ་ཐབས་མཁས་པ་ཐོབ་པ་ཞེས་བྱ་སྟེ། རྣམ་པར་གཞག་པས་ཆོས་ཀྱི་དབྱིངས་ལ་སོ་སོར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ལ་རྣམ་པར་གཞག་པ་ཅུང་ཟད་ཙམ་ཡང་མེད་པའི་ཕྱིར་རོ། །འདི་ལྟ་སྟེ། དཔེར་ན་ནམ་མཁའ་དང་། རླུང་གི་ཁམས་ལ་ནི་གནས་ཀྱང་མེད། བལྟར་ཡང་མི་མཐོང་རྣམ་པར་གཞག་པའི་གནས་ཀྱང་མེད། རྟེན་པའི་གནས་ཀྱང་མེད། བསྟན་དུ་ཡང་མེད་དོ། །དེ་བཞིན་དུ་ཆོས་ཀྱི་དབྱིངས་ཀྱང་འཇུག་པར་བྱ་བའི་གནས་ཀྱང་མེད། བལྟ་བར་བྱ་བའི་གནས་ཀྱང་མེད། རྣམ་པར་གཞག་པའི་གནས་ཀྱང་མེད། རྟེན་པའི་གནས་ཀྱང་མེད། ཁོང་དུ་ཆུད་པར་བྱ་བ་ཡང་མེད། བསྟན་དུ་ཡང་མེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བསྟན་པར་བྱ་བ་མེད་པའི་ཕྱིར། དེ་བཞིན་ཉིད་ཀྱི་དབྱིངས་དང་མཚུངས་པར་ལྡན་པར་གནས་སོ། །བློ་གྲོས་མཐའ་ཡས་ཆོས་ཐམས་ཅད་ཀྱི་དབྱིངས་ནི་སྐྱེ་བ་མེད་པ། སྲོག་མེད་པ། རྒ་བ་མེད་པ། འཆི་བ་མེད་པ། རྒོད་པ་མེད་པ། བྱིང་བ་མེད་པ། བསྟན་དུ་མེད་པའི་དབྱིངས་ཡིན་པས་ཆོས་ཀྱི་དབྱིངས་ཤེས་བྱའོ། །རྣམ་པར་འགྱུར་བ་མེད་པའི་དབྱིངས་ཡིན་པས་ཆོས་ཀྱི་དབྱིངས་ཤེས་བྱ་སྟེ།