Degé Kangyur volume 40, F.122.a

བཞིན་རྗེས་འཐུན་གནས་པ་དང་། །​ཚུལ་བཞིན་རྣམ་པར་མི་གཡོ་དང་། །​མི་གཡོ་གནས་ནི་གང་ཐོབ་པ། །​གནས་མེད་ལ་ནི་རྟག་ཏུ་གནས། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཡང་འདི་སྐད་ཅེས་གསོལ་ཏོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་ཚུལ་འཆིང་བ་མ་མཆིས་པ་དང་། གྲོལ་བ་མ་མཆིས་པ་ལ་རབ་ཏུ་འགོད་པར་མཛད་པ་ཤིན་ཏུ་ངོ་མཚར་ཆེ་ལགས་སོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ནི་ཆོས་ཅུང་ཟད་ཙམ་ཡང་མཚུངས་པར་ལྡན་པའམ། མཚུངས་པར་མི་ལྡན་པ་འམ། འཐུན་པར་གྱུར་པ་འམ། ཡོངས་སུ་བསྡུས་པ་འམ། ཡོངས་སུ་མ་བསྡུས་པ་འམ། སྐྱབས་སུ་འགྲོ་བ་དང་མི་ལྡན་པ་འམ། འདོད་ཆགས་དང་བཅས་པ་འམ་འདོད་ཆགས་དང་བྲལ་བ་འམ། ཞེ་སྡང་དང་བཅས་པ་འམ། ཞེ་སྡང་དང་བྲལ་བ་ཞེས་བགྱི་བ་ཡང་དག་པར་རྗེས་སུ་མི་དམིགས་ལགས་སོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་ཚུལ་ཐམས་ཅད་རྣམ་པར་གཞག་པ་ལ་རབ་ཏུ་མཁས་པ་ནི་གལ་ཏེ་སེམས་ཅན་རྣམས་ཀྱིས་གུས་པས་མཆོད་པ་བགྱིས་པ་ན་ཡང་འདོད་ཆགས་ཀྱི་སྲེད་པ་སྐྱེ་བར་མི་འགྱུར་ལ། །​སྨོད་ཅིང་གནོད་པར་བགྱིད་ན་ཡང་ཞེ་སྡང་སྐྱེ་བར་མི་འགྱུར་ཏེ། འདུ་ཤེས་སྣ་ཚོགས་མ་མཆིས་ཤིང་ཆོས་སུ་ལྟ་བ་ཐམས་ཅད་ཡོངས་སུ་སྤངས་པས་ཆོས་འགའ་ཙམ་ཡང་ཆོས་འགའ་ཙམ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་དག་པར་རྗེས་སུ་མི་དམིགས་ལགས་སོ། །​མཚུངས་པར་ལྡན་པ་དང་། མཚུངས་པར་མི་ལྡན་པ་ལས་ཀྱང་ཡང་དག་པར་འདས་པའི་སླད་དུ་མཚུངས་པར་ལྡན་པ་དང་། མཚུངས་པར་མི་ལྡན་པའི་འདུ་ཤེས་སྤོང་ཞིང་མཚུངས་པར་ལྡན་པ་དང་། མཚུངས་པར་མི་ལྡན་པའི་འདུ་ཤེས་ཀྱང་ཡང་དག་པར་ཁོང་དུ་ཆུད་པར་འགྱུར་ལགས་སོ། །​ཁོང་དུ་ཆུད་པ་ལས་ཡང་དག་པར་འདས་ནས་ཀྱང་ཆོས་འགའ་ཙམ་ལ་ཡང་རྩོལ་བ་འམ། ལྡོག་པ་འམ། བགྲོད་པར་བགྱི་བ་དང་



The English translation of this folio by 84000 Translating the words of the Buddha can be found at:
https://read.84000.co/translation/toh51.html?part=UT22084-040-002-1000#UT22084-040-002-1000