གལ་ཏེ་དེ་བཞིན་གཤེགས་པའི་སྐུ་ཚེའི་ཚད་བསྐལ་པ་བརྒྱ་སྟོང་དུ་བཞུགས་པས། སེམས་ཅན་རྣམས་ལ་ཆོས་བསྟན་པ་གཞན་གྱི་སྐབས་མི་དབྱེ་བར་སེམས་ཅན་གྱི་སྤྱོད་པ་ཉིད་བསྟན་ཀྱང་དེ་བཞིན་གཤེགས་པའི་སྐུ་ཚེ་མཐར་ཐུག་པར་འགྱུར་གྱི། སེམས་ཅན་གྱི་སྤྱོད་པ་ལ་མཐར་ཐུག་པ་གང་ཡང་མེད་དོ། །སེམས་ཅན་རྣམས་མགོ་རྨོངས་སུ་འོང་ཞེས་སེམས་ཅན་གྱི་སྤྱོད་པ་དེ་ཙམ་དུ་ཚད་མེད་པ་དེ་ཡང་དེ་བཞིན་གཤེགས་པས་ཚད་དང་ལྡན་པར་སྟོན་ཏོ། །ཞི་བའི་བློ་གྲོས། དེ་ལ་དེ་བཞིན་གཤེགས་པའི་གསུང་ནི་ཇི་ལྟར་སྤྱོད་པ་ཁོང་དུ་ཆུད་པར་འགྱུར་བ་དེ་བཞིན་དུ། སེམས་ཅན་གྱི་སྤྱོད་པ་ཐམས་ཅད་ལ་འབྱུང་སྟེ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་བའོ། །ཞི་བའི་བློ་གྲོས། སེམས་ཅན་གང་དག་དེ་བཞིན་གཤེགས་པའི་གསུང་གི་གསང་བའི་ཡེ་ཤེས་ཀྱི་རྗེས་སུ་ཞུགས་པ་དེ་དག་ནི་དེ་བཞིན་གཤེགས་པའི་གསུང་ཞལ་གྱི་སྒོ་ནས་འབྱུང་བར་མི་ཤེས་ཀྱི་ནམ་མཁའ་ལས་འབྱུང་བར་ཤེས་སོ། །ཞི་བའི་བློ་གྲོས། སེམས་ཅན་རྣམས་ཀྱིས་དེ་བཞིན་གཤེགས་པའི་གསུང་ཞལ་གྱི་སྒོ་ནས་འབྱུང་བར་ཤེས་སོ་སྙམ་དུ་ཁྱོད་སེམས་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས། སེམས་ཅན་གང་དག་དེ་བཞིན་གཤེགས་པའི་གསུང་གཙུག་ཏོར་ནས་བྱུང་བར་ཤེས་པ་དང་། སྤྱི་གཙུག་ནས་བྱུང་བར་ཤེས་པ་དང་། དབུ་སྐྲ་རྣམས་ལས་བྱུང་བར་ཤེས་པ་དང་། ཕྲག་པ་ནས་བྱུང་བར་ཤེས་པ་དང་། འཕྲལ་བ་དང་། སྨིན་མཚམས་དང་། མཛོད་སྤུ་དང་། སྤྱན་དང་། སྙན་དང་། ཤངས་དང་། འགྲམ་པ་དང་། ཞལ་དང་། མགུར་ནས་བྱུང་བར་ཤེས་པ་དང་། དེ་བཞིན་དུ་དཔུང་པ་དང་། ཕྱག་དང་། སོར་མོ་དང་། རྩིབ་ལོགས་དང་། བྲང་དང་། རྒྱབ་དང་། ལྟེ་བ་དང་། གསང་བའི་གནས་དང་། བརླ་དང་། པུས་མོའི་ལྷ་ང་དང་། བྱིན་པ་དང་། ལོང་བུ་དང་། ཞབས་ཀྱི་མཐིལ་དང་། མཚན་རྣམས་དང་། དཔེ་བྱད་བཟང་པོ་རྣམས་དང་། སྤུའི་ཁུང་བུ་ཐམས་ཅད་ནས་དེ་བཞིན་གཤེགས་པའི་གསུང་འབྱུང་བར་ཤེས་པའི་སེམས་ཅན་ཁ་ཅིག་ཡོད་དེ། ཞི་བའི་བློ་གྲོས་འདི་ཡང་དེ་བཞིན་གཤེགས་པའི་གསུང་གི་གསང་བའོ།