བརྩོན་འགྲུས་ཀྱང་ཡིན་ལ། ལྷུན་གྱིས་གྲུབ་པའི་སེམས་ཉིད་ཀྱང་ཡིན། དྲན་པ་ཡང་ཡིན་ལ། རང་བྱུང་གི་སེམས་ཉིད་ཀྱང་ཡིན། ཏིང་ངེ་འཛིན་ཀྱང་ཡིན་ལ། མཉམ་པ་ཉིད་ཤེས་པའི་སེམས་ཉིད་ཀྱང་ཡིན། ཤེས་རབ་ཀྱི་དབང་པོ་ཡང་ཡིན་ལ། དབང་པོ་མེད་པའི་སེམས་ཉིད་ཀྱང་ཡིན། དབང་པོ་རྣམས་ཀྱང་ཡིན་ལ། ཆོས་ཐམས་ཅད་ལ་དབང་པོ་མེད་པའི་སེམས་ཉིད་ཀྱང་ཡིན། སྟོབས་རྣམས་ཀྱང་ཡིན་ལ། མི་རྫི་བའི་སེམས་ཉིད་ཀྱང་ཡིན། བྱང་ཆུབ་ཀྱི་ཡན་ལག་རྣམས་ཀྱང་ཡིན་ལ། བློས་རབ་ཏུ་འབྱེད་པའི་སེམས་ཉིད་ཀྱང་ཡིན། ལམ་སྒོམ་པ་ཉིད་ཀྱང་ཡིན་ལ། སྒོམ་པ་མེད་པའི་སེམས་ཉིད་ཀྱང་ཡིན། ཞི་གནས་ཀྱང་ཡིན་ལ། སེམས་ཉེ་བར་ཞི་བ་ཉིད་ཀྱང་ཡིན། ལྷག་མཐོང་ཡང་ཡིན་ལ། རྗེས་སུ་མི་མཐོང་བའི་སེམས་ཉིད་ཀྱང་ཡིན། འཕགས་པའི་བདེན་པ་སྒོམ་པ་ཡང་ཡིན་ལ། ཤིན་ཏུ་ཡོངས་སུ་ཤེས་པའི་སེམས་ཉིད་ཀྱང་ཡིན། སངས་རྒྱས་ཡིད་ལ་བྱེད་པ་ཡང་ཡིན་ལ། ཡིད་ལ་བྱེད་པ་མེད་པའི་སེམས་ཉིད་ཀྱང་ཡིན། ཆོས་ཡིད་ལ་བྱེད་པ་ཡང་ཡིན་ལ། །ཆོས་ཀྱི་དབྱིངས་སུ་མཉམ་པའི་སེམས་ཉིད་ཀྱང་ཡིན། དགེ་འདུན་ཡིད་ལ་བྱེད་པ་ཡང་ཡིན་ལ། མི་གནས་པའི་སེམས་ཉིད་ཀྱང་ཡིན། སེམས་ཅན་ཡོངས་སུ་སྨིན་པར་ཡང་བྱེད་ལ། གཟོད་མ་ནས་དག་པའི་སེམས་ཉིད་ཀྱང་ཡིན། དམ་པའི་ཆོས་ཡོངས་སུ་འཛིན་པ་ཡང་ཡིན་ལ། ཆོས་ཀྱི་དབྱིངས་དང་དབྱེར་མེད་པའི་སེམས་ཉིད་ཀྱང་ཡིན། སངས་རྒྱས་ཀྱི་ཞིང་ཡོངས་སུ་དག་པ་ཡང་ཡིན་ལ། སེམས་ནམ་མཁའ་དང་མཉམ་པ་ཉིད་ཀྱང་ཡིན། མི་སྐྱེ་བའི་ཆོས་ལ་བཟོད་པ་ཡང་ཡིན་ལ། མི་དམིགས་པའི་སེམས་ཉིད་ཀྱང་ཡིན། ཕྱིར་མི་ལྡོག་པའི་ས་ཡང་ཡིན་ལ། ལྡོག་པ་དང་འཇུག་པ་མེད་པའི་སེམས་ཉིད་ཀྱང་ཡིན། མཚན་རབ་ཏུ་ཐོབ་པ་ཡང་ཡིན་ལ། མཚན་མ་མེད་པའི་སེམས་ཉིད་ཀྱང་ཡིན། བྱང་ཆུབ་ཀྱི་སྙིང་པོའི་རྒྱན་ཉིད་ཀྱང་ཡིན་ལ། ཁམས་གསུམ་གྱི་སྙིང་པོའི་སེམས་ཉིད་ཀྱང་ཡིན། བདུད་ཚར་གཅོད་པ་ཡང་ཡིན་ལ། སེམས་ཅན་ཐམས་ཅད་ལ་ཕན་འདོགས་པའི་སེམས་ཉིད་ཀྱང་ཡིན། བྱང་ཆུབ་ཀྱང་ཡིན་ལ། ཆོས་ཐམས་ཅད་ནི་དངོས་པོ་མེད་པར་ཁོང་དུ་ཆུད་པའི་སེམས་ཉིད་ཀྱང་ཡིན།