།རྡོ་རྗེ་དེ་འཕངས་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །མེ་ཏོག་གི་ཆར་ཡང་བབ་བོ། །རོལ་མོ་སིལ་སྙན་བརྒྱའི་སྒྲ་ཡང་བྱུང་ངོ་། །འཁོར་ཐམས་ཅད་ཀྱི་ལག་པ་གཡས་པར་ཡང་མེ་ཏོག་ཁ་དོག་སྣ་ཚོགས་ཀྱི་ཕྲེང་བ་དག་བྱུང་ངོ་། །དེ་ནས་གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཆོས་ཀྱི་དབང་ཕྱུག་རྒྱ་ཆེན་མི་ཟད་ཆོས་ཀྱི་མཛོད། །ཆོས་རྣམས་རབ་ཏུ་འབྱེད་ལ་མཁས་པ་འགྲོ་དོན་བཞེད། །ཆོས་ལ་ཐུགས་མ་ཞུམ་ཞིང་རྟག་ཏུ་ལྷུག་པར་བཏང་། །ཆོས་ཀྱི་རྗེས་འཐུན་ཆོས་སྒྲུབ་གནས་ལ་ཕྱག་འཚལ་ལོ། །སེམས་ཅན་དག་པ་ཁྱོད་ཀྱི་ཡེ་ཤེས་སྤྱོད་རྣམ་དག །ཡོན་ཏན་རྒྱལ་གྲགས་སྙན་པ་འཇིག་རྟེན་གསུམ་དུ་གྲགས། །ཡེ་ཤེས་རྒྱུན་ནི་དུས་གསུམ་རྟག་ཏུ་བས་མ་འཚལ། །ཆགས་འདས་ཞབས་མཉམ་ལེགས་པ་ཁྱོད་ལ་ཕྱག་འཚལ་ལོ། །ཟླ་བ་ལས་ལྷག་ཡོངས་དག་ཚུལ་ཁྲིམས་རྣམ་པར་དག །ཉི་མ་ལས་ལྷག་འོད་མཛེས་འོད་མངའ་གཟི་བརྗིད་མཆོག །ཚངས་པ་ལས་ལྷག་གསུང་སྙན་ཚངས་པའི་གསུང་མངའ་བ། །དཀོན་མཆོག་གསུམ་ལྡན་གསེར་འདྲ་ཁྱོད་ལ་ཕྱག་འཚལ་ལོ། །ཁྱོད་ནི་སྐུ་ཡང་སྟོན་ལ་སྐུ་དང་ལྡན་མ་ལགས། །ཁྱོད་ནི་གསུང་ཡང་རྗོད་ལ་སྒྲ་སྐད་རྟོག་མི་མངའ། །ཁྱོད་ནི་ཆོས་ཀྱང་གསུང་ལ་ཆོས་ཀྱི་འདུ་ཤེས་བྲལ། །སེམས་ཅན་ཐར་བར་མཛད་ལ་སེམས་ཅན་འདུ་ཤེས་བྲལ། གང་དག་ཁྱོད་བསྟན་ཐོས་ནས་ཇི་ལྟར་བསྟན་པ་ལྟར། །བསྒྲུབ་པ་སྙིང་པོར་གནས་པ་དག་ནི་མ་གཏོགས་པར། འགྲོ་བ་ཐམས་ཅད་རྟག་ཏུ་རབ་ཏུ་བྱུང་ཡང་ནི། །ཁྱོད་ཀྱི་བཀའ་དྲིན་ལན་ལོན་ནམ་ཡང་རྔོ་མི་ཐོག །དེ་ནས་གསང་བ་པའི་བདག་པོ་ལག་ན་རྡོ་རྗེ་དང་ཐམས་ཅད་དང་ལྡན་པའི་འཁོར་དེས་ཇི་ལྟར་ཐོགས་ཐོགས་པའི་རིན་པོ་ཆེ་སྣ་ཚོགས་ཀྱི་མེ་ཏོག་གི་ཕྲེང་བ་རྣམས་བཅོམ་ལྡན་འདས་ལ་མངོན་པར་གཏོར་ཏོ། །མེ་ཏོག་གི་ཕྲེང་བ་དེ་དག་གཏོར་མ་ཐག་ཏུ་དེ་ནས་དེའི་ཚེ་འདི་ལྟ་སྟེ། སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་མེ་ཏོག་སྣ་ཚོགས་ཀྱི་ཕྲེང་བས་ལེགས་པར་བརྒྱན་པར་གྱུར་ཅིང་མིག་མངས་རིས་སུ་གནས་པར་ཀུན་ཏུ་སྣང་ངོ་།