།འཇིག་རྟེན་གྱི་ཁམས་དེ་ནང་ཡི་བ་མེད་ཅིང་ཡོངས་སུ་འཛིན་པ་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི་ང་ཡི་བ་མེད་ཅིང་ཡོངས་སུ་འཛིན་པ་མེད་པར་འགྱུར་རོ། །ཞི་བའི་བློ་གྲོས་དེ་བཞིན་གཤེགས་པ་རྡོ་རྗེས་རྣམ་པར་གནོན་པ་དེ་ལྷའི་བུའམ། མིར་གྱུར་པ་གང་ལ་བསོད་སྙོམས་བླང་བར་བཞེད་པར་གྱུར་པའི་ལྷའི་བུའམ། མིར་གྱུར་པ་དེའི་མདུན་དུ་དེ་བཞིན་གཤེགས་པའི་གཟུགས་ལྷུང་བཟེད་ཐོགས་པ་ཉེ་བར་གནས་པ་དང་། དེར་ལྷའི་བུའམ། མིར་གྱུར་པ་དེས་དེ་བཞིན་གཤེགས་པའི་གཟུགས་མཐོང་ནས་འདི་སྙམ་དུ་སེམས་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་རྡོ་རྗེས་རྣམ་པར་གནོན་པ་བདག་ལས་བཤོས་གསོལ་བར་བཞེད་དོ་སྙམ་ནས་ཡིད་ཀྱིས་བསམས་པས་འཁོར་གྱི་ཁྱམས་སུ་སྟན་དང་། ཟས་དང་། སྐོམ་དང་། རོ་བརྒྱ་པའི་ཟས་སྦྱར་ནས་བཅོམ་ལྡན་འདས་དེ་ལ་གདུགས་ཚོད་ལ་བབ་ཅེས་གསོལ་པ་དང་། དེར་དེ་བཞིན་གཤེགས་པ་དེ་བཤོས་གསོལ་ལོ། །བཤོས་གསོལ་ནས་སླར་བཞུད་པར་འགྱུར་རོ། །དེ་བཞིན་གཤེགས་པ་དེ་གང་གི་ཚེ། ནང་དུ་ཡང་དག་འཇོག་ལ་འཇུག་པར་འགྱུར་བ་དེ་ན། བྱང་ཆུབ་སེམས་དཔའ་དེ་དག་ཏིང་ངེ་འཛིན་གྱི་བཀོད་པས་གནས་པར་འགྱུར་རོ། །འཇིག་རྟེན་གྱི་ཁམས་དེ་ནི་ཡོན་ཏན་གྱི་རྒྱུའི་ཁྱད་པར་འདི་དག་དང་། གཞན་ཡང་ཚད་མེད་པ་དག་དང་ལྡན་པར་འགྱུར་ཏེ། དེའི་ཕྱིར་འཇིག་རྟེན་གྱི་ཁམས་དེ་ཀུན་ནས་ཡོངས་སུ་དག་པ་ཞེས་བྱའོ། །གསང་བ་པའི་བདག་པོ་ལག་ན་རྡོ་རྗེའི་ལུང་བསྟན་པ་བཤད་པ་འདི་བསྟན་པ་ན་སྲོག་ཆགས་ཉི་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། །སངས་རྒྱས་ཀྱི་ཞིང་དེར་སྐྱེ་བར་ཤོག་ཤིག་ཅེས་སྨོན་ལམ་ཡང་བཏབ་བོ། །དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་རྡོ་རྗེས་རྣམ་པར་གནོན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཀུན་ནས་ཡོངས་སུ་དག་པ་དེར་སྐྱེ་བར་བཅོམ་ལྡན་འདས་ཀྱིས་ལུང་བསྟན་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་རང་གི་ལུང་བསྟན་པ་འདི་ཐོས་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། རྡོ་རྗེ་དེ་ནམ་མཁའི་དཀྱིལ་དུ་འཕངས་སོ། །རྡོ་རྗེ་དེ་འཕངས་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ།