Degé Kangyur volume 39, F.74.a

གང་ལ་ཡང་དད་པས་འགྲོ་བར་ནི་མི་བྱའོ། །​བྱང་ཆུབ་སེམས་དཔའ་ནི་གཞན་ལ་རག་མ་ལས་པའི་ཤེས་རབ་འདོད་པར་བྱ་ཞིང་སེམས་ཅན་ཐམས་ཅད་ལ་ཕན་པ་དང་བདེ་བར་བྱ་བའི་ཕྱིར་ཆོས་འདི་ལ་རྗེས་སུ་འཐུན་པའི་བཟོད་པ་བསྐྱེད་པར་བྱ་སྟེ། གང་དག་དེ་ལ་རྗེས་སུ་འཐུན་པའི་བཟོད་པ་སྐྱེད་པར་འགྱུར་བ་དེ་དག་ནི་མི་འཐུན་པར་གནས་པར་མི་འགྱུར་རོ། །​བཀོད་པ་མཐའ་ཡས་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་མི་འཐུན་པར་གནས་པ་ནི་ཆོས་འདུལ་བ་འདི་ཀུན་ཤེས་པར་མི་འགྱུར་རོ། །​གཞན་ཡང་ཆོས་ཀྱི་ཚུལ་འདི་ནི་གང་དག་ལྟ་བས་གཞན་གྱི་སྤྱོད་ཡུལ་བ། ལམ་གཞན་ལ་ཞུགས་པ། ལམ་ལོག་པ་དང་ལྡན་པ། དགེ་བ་མ་སྤྱད་པ། སྤྱོད་ཡུལ་གཞན་སྟེན་པ་དེ་དག་གི་རྣ་ལམ་དུ་གྲག་པའི་གོ་སྐབས་མེད་དོ། །​བཀོད་པ་མཐའ་ཡས་ཆོས་ཀྱི་གཏེར་ཆོས་ཀྱི་གཏེར་ཆོས་ཀྱི་སྣང་བ་སྒྲིབ་པ་མེད་པ་འདི་བཤད་པ་ན་བྱིས་པ་ཐོས་པ་དང་མི་ལྡན་པ་རྣམས་མ་རབས་ཀྱི་སེམས་མ་དུལ་བ་ཡང་དག་པར་མ་བསྡམས་པ་རྣམས་རིང་དུ་སྤོང་བར་འགྱུར་བ་ལ་ལ་ལྟོས། བྱིས་པ་སོ་སོའི་སྐྱེ་བོ་ལུས་རབ་ཏུ་མ་བསྒོམས་པ། ཆོས་འདུལ་བ་འདི་ལས་རིང་དུ་གྱུར་པ་དེ་དག་ཐམས་ཅད་ལ་ཆོས་འདི་ལྟ་བུ་ལ་རྗེས་སུ་འཐུན་པའི་བཟོད་པ་སྐྱེ་བ་ཡང་མེད་ན། ཟག་པ་མེད་པའི་བཟོད་པ་ཐབས་དང་ལྡན་པ་སྐྱེ་བར་འགྱུར་བ་ལྟ་སྨོས་ཀྱང་ཅི་དགོས། བཀོད་པ་མཐའ་ཡས་འཁོར་འདིའི་ནང་དུ་ཆོས་བསྟན་པ་འདིའི་འཇུག་པ་ནི་གང་དུ་ཡང་ཆགས་པ་མེད་ཅིང་ཉམས་པ་མེད་པ་དང་། དོན་ཡོད་པ་ཡིན་ནོ། །​དེ་ཅིའི་ཕྱིར་ཞེ་ན། འདི་དག་ཐམས་ཅད་ནི་སྒྲིབ་པ་མེད་པའི་ས་ལ་གནས་པ་ཡིན་ནོ། །​བཀོད་པ་མཐའ་ཡས་དེ་བཞིན་གཤེགས་པ་ནི་སྒྲིབ་པ་མེད་པའི་ཆོས་སྟོན་པ་ལ་མཁས་པ་རྣམ་པར་དག་པར་བྱ་བ་དང་། སེམས་ཅན་ཐམས་ཅད་ལ་ཐུགས་བརྩེ་བའི་ཕྱིར་དེ་དག་གི་དགེ་བའི་རྩ་བ་དང་། དེ་བཞིན་གཤེགས་པའི་བྱིན་གྱི་རླབས་ཀྱིས་གཟུངས་ཀྱི་སྒོའི་མདོ་འདི་སྟོན་པར་མཛད་དོ། །བཀོད་པ་མཐའ་ཡས་གང་ལ་ལ་ཞིག་དམ་པའི་ཆོས་བསྟན་པ་འདི་ལ་འཇུག་པར་འགྱུར་བ་དེ་ནི་ཡང་དག་པར་འཇུག་པ་ཡིན་པར་རིག་པར་བྱ་སྟེ། དེ་ནི་བྱང་ཆུབ་སེམས་དཔའི་ས་ལ་གནས་ཤིང་རིང་པོ་མི་ཐོགས་པར་ལེན་པ་མེད་པའི་བཟོད་པ་ཡང་ཐོབ་པར་འགྱུར། རིང་པོ་མི་ཐོགས་པར་ལུང་བསྟན་པ་ཡང་ཐོབ་པར་འགྱུར་རོ།



The English translation of this folio by 84000 - Translating the words of the Buddha can be found at:
https://read.84000.co/translation/toh46.html?part=UT22084-039-002-528#UT22084-039-002-528