མ་བཏུལ་བར་ཡང་ཕས་ཀྱི་རྒོལ་བ་རྣམས་རང་གི་ངང་གིས་འདུད་པ་ལྷུར་ལེན་པ་དང་། མངའ་ཞབས་ཀྱི་འབངས་རྣམས་ཀྱང་རྨ་མེད་པར་སྐྱོང་བཞིན་པ་ནས། དུས་ཕྱིས་གནམ་བསྐོས་འཇམ་དབྱངས་གོང་མ་ཆེན་པོས་བོད་ཡུལ་གྱི་ལྗོངས་འདི་ཉིད་བདག་གིར་མངའ་བསྒྱུར་བ་ནའང་། མིའི་དབང་པོ་འདི་ཉིད་ཀྱི་ཡོན་ཏན་གྱི་ཁྱད་པར་རྣམས་སྙན་ལ་དེངས་པས་བསྔགས་བརྗོད་དང་བཅས་ཏེ་འབངས་ཀྱི་སྐྱེ་བོ་མི་ཁྱིམ་མང་པོ་ས་རིས་དང་བཅས་པ་གསར་དུ་སྦྱོར་འཇག་གི་བཀའ་དྲིན་མཛད་པ་སོགས་མཆོག་དམན་ཐམས་ཅད་ཀྱི་ཡིད་དམ་པའི་ངང་ཚུལ་གྱིས་ཕྲོགས་པར་མཛད་པ་སྟེ་མདོར་ན་སྙིགས་མའི་མུན་ཀློང་སྟུག་པོར་གཡོ་བའི་དུས་འདི་ལྟ་བུར་ཆོས་ཀྱི་རྒྱལ་པོ་མྱ་ངན་མེད་སླར་ཡང་འོངས་པ་ལྟ་བུའི་ཕྲིན་ལས་ཅན་ཞིག་གོ། །མིའི་དབང་ཕྱུག་འདིའི་སྲས་གཉིས་པ་དང་གསུམ་པ་རབ་ཏུ་བྱུང་བའི་བརྟུལ་ཞུགས་ཡང་དག་པར་ལེན་པར་མཛད་ལ། དང་པོས་སྲིད་འཛིན་པར་མཛད་པ་སྟེ་གསུམ་གའང་རང་བཞིན་གྱིས་དགེ་བ་ལ་འདུན་ཞིང་མི་འཕྲོག་བའི་བརྟན་པ་ཅན། །དཀྱེལ་ཆེ་ཞིང་གཟུ་བོར་གནས་པ། གཙུག་ལག་ལུགས་གཉིས་ཀྱི་མཁྱེན་པ་རྣམ་པར་རྒྱས་པ་སོགས། མ་སུ་རཀྵས་བྱས་པའི་ལུགས་ཀྱི་བསྟན་བཅོས་ལས། བརྟན་ཞིང་ཟབ་མོའི་བློ་དང་ལྡན། །མདངས་ལྡན་ཆོས་དང་བསྟན་བཅོས་རིག །དུལ་ཞིང་བདེན་པར་སྨྲ་བ་དང་། །རྒྱལ་པོའི་འཁོར་ལ་ཕན་པར་སེམས། །རིགས་བཙུན་རྒྱུད་ནི་མཉེན་པ་དང་། །བླ་མ་ལ་ནི་གུས་ཉན་དང་། །སྐྱེ་དགུ་རྗེས་བརྩེར་ལྡན་པ་ཡི། །རྒྱུད་བྱུང་དེ་ནི་རྒྱལ་སྲས་ཡིན། །ཞེས་བཤད་པ་ལྟ་བུའི་ཡོན་ཏན་དང་ལྡན་ཞིང་། བཙུན་མོ་དམ་པ་དག་ཀྱང་། རྒྱ་ཆེ་རོལ་པ་ལས། རྒྱགས་པ་མ་མཆིས་མི་གཡེང་ཟུངས་ཐུབ་ཚུལ་འཆང་ཞིང་། །ང་རྒྱལ་མ་མཆིས་འགྱིང་དང་བྲལ་བས་བྲན་མོ་བཞིན། །སྒྲ་དྲི་རོ་ལ་མ་ཆགས་ཆང་ལ་མ་ཆགས་ཏེ། །འདོད་བྲལ་བརྣབ་སེམས་མ་མཆིས་རང་གི་ནོར་གྱིས་འཚལ། །བདེན་ལ་གནས་ཤིང་མི་འཕྱར་གཡེང་བ་མ་ལགས་པ། །ངོ་ཚའི་གོས་འཚལ་རྒོད་དང་ཁེངས་པ་མ་མཆིས་གནས། །