འགྲོ་བའི་མགོན་པོ་ས་སྐྱ་པ་གོང་མ་རྣམ་ལྔའི་བཀའ་འབུམ་སྐུ་པོད་དངོས་གཙང་བཅུ་དྲུག །རིན་ཆེན་གཉིས་པ་ལས་གྲུབ་པའི་བསྟན་བཅོས་འགྱུར་རོ་འཚལ་གླེགས་བམ་ཉིས་བརྒྱ་དང་བདུན་ཡོད་པ་ཤིན་ཏུ་དངོས་གཙང་། རྒྱལ་བའི་བཀའ་འགྱུར་རོ་ཅོག་མཚལ་པར་མ་དང་། ཡང་རིན་ཆེན་དང་པོ་ཁོ་ན་ལས་བཞེངས་པའི་བཀའ་འགྱུར་གླེགས་ཤིང་གླེགས་ཐག་ན་བཟའ་ཚུན་ཆོད་ཤིན་ཏུ་སྤུས་ལེགས་ལ་དངོས་གཙང་བ། ཙནྡན་དམར་པོ་ལས་གྲུབ་པའི་སངས་རྒྱས་སྟོང་སྐུ་ཐམས་ཅད་མཁྱིད་གང་ཙམ་པ། ཡང་ཙནྡན་དམར་པོའི་ཕྱེ་མའི་ལྡེ་གུ་ལས་གྲུབ་པའི་སངས་རྒྱས་སྟོང་སྐུ་ཐམས་ཅད་མཐོ་ཚད་མ། ཙནྡན་དཀར་དམར་ལས་གྲུབ་པའི་སྐུ་གདུང་ཆ་བརྒྱད་བཟོ་བཀོད་ཕུན་སུམ་ཚོགས་པ། ཙན་འདམ་ལས་གྲུབ་པའི་ཆོས་རྒྱལ་ལོ་པཎ་བཞི་བཅུ་རྩ་ལྔའི་སྐུ་ཐམས་ཅད་བརྐྱང་ཁྲུ་གང་ལྷག་ཡོད་པ། ཙནྡན་དཀར་པོའི་ལྡེ་གུ་ཁོ་ན་ལས་གྲུབ་པའི་ལམ་འབྲས་ཀྱི་བླ་རྒྱུད་ཐམས་ཅད་མཁྱིད་ཚད་མ། ཡང་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་བླ་མ་བརྒྱུད་པ་རྣམས་ཀྱི་སྐུ་བརྙན་གསེར་ཟངས་ལས་གྲུབ་པ་ཐམས་ཅད་བརྐྱང་ཁྲུ་གང་དང་སོར་ལྔ་ལྷག་ཙམ་ཡོད་པ་ལྔ་བཅུ། ཁྱད་པར་གསེར་ཟངས་ལས་གྲུབ་པའི་བླ་མ་ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷ་སོགས་ཀྱི་སྐུ་ལུགས་མ་ཤིན་ཏུ་དངོས་གཙང་བ་སུམ་བརྒྱ་ལྷག་ཙམ། ལྷུན་གྲུབ་སྟེང་གི་འདུ་ཁང་ཆུང་བ་གཉྫིར་བཅས། ལྕགས་རའི་འདུ་ཁང་རྒྱལ་མཚན་བཅས། སྤོམ་མཛངས་ཆོས་སྡེའི་འདུ་ཁང་། དཔལ་སྤུངས་སུ་ཁོ་བོ་ཅག་གི་ལྷ་ཁང་འདུས་སྡེ་དང་བཅས་པ། །བླ་མ་ཀུན་ཆོས་པའི་སྐུ་གདུང་གཉྫིར་བཅས་སོགས་གསར་བཞེངས་ཁོ་ནའང་བགྲང་གིས་མི་ལང་ཞིང་ད་དུང་ཡང་སྒྲུབ་བཞིན་པ་དང་། ལོ་བསྟར་དུ་ཟབ་མོའི་རྣལ་འབྱོར་དང་ལྡན་པའི་དགེ་སྦྱོང་རྣམས་ལ་ཆོས་དང་མཐུན་པའི་ཡོན་ཕུན་སུམ་ཚོགས་པ་སྩལ་ཏེ། ཡི་དམ་གྱི་ལྷ་རྣམས་ཀྱི་རྩ་སྔགས་དང་སྙིང་པོ་སོགས་དུང་ཕྱུར་ཕྲག་མང་པོར་ལང་བ་བཅད་རྒྱ་ཁོ་ནས་སོག་ཏུ་འཇུག་པ་སོགས་མཆོད་སྦྱིན་གྱི་ཁྱད་པར་རྒྱ་ཆེན་པོ་བསྒྲུབས་པ་རྣམས་ཀྱང་དེ་དང་མཚུངས་པ་སྟེ། སྐྱེས་རབས་དཔག་བསམ་འཁྲི་ཤིང་ལས།