འཇིག་རྟེན་ལས་འདས་པའི་ཡེ་ཤེས་ཐམས་ཅད་རབ་ཏུ་བརྗོད་པ་ལ་བརྩོན་པ་དང་། སེམས་ཅན་ཐམས་ཅད་ཀྱི་འཁོར་བའི་བདེ་བ་ཡོངས་སུ་བསྐྱེད་པ་ལ་བརྩོན་པ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཡང་དག་པར་བསྔགས་པ་ལ་བརྩོན་པས་འཁོར་ལོས་སྒྱུར་བའི་རྒྱལ་སྲིད་ཡོངས་སུ་བཏང་བས་མ་ཉོས་པའམ། བདོག་པ་ཐམས་ཅད་ཡོངས་སུ་བཏང་བས་མོས་པ་གང་ཡང་མེད་དེ། དེ་ལྟར་ང་ཉིད་ཀྱི་སྔོན་གྱི་སྦྱོར་བ་ཕུན་སུམ་ཚོགས་པ་བསྟན་པར་བྱ་ན། བསྐལ་བ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཟད་པར་འགྱུར་རོ། །རིགས་ཀྱི་བུ་དེ་ལྟར་ངས་རྣམ་པ་དེ་ལྟ་བུའི་ཚོགས་ཀྱི་སྟོབས་དང་། དགེ་བའི་རྩ་བའི་རྒྱུ་བསྩགས་པའི་སྟོབས་དང་། མོས་པ་རྒྱ་ཆེན་པོའི་སྟོབས་དང་། ཡོན་ཏན་ལ་ནན་ཏན་དུ་བྱ་བའི་སྟོབས་དང་། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་བྱ་བའི་སྟོབས་དང་། ཤེས་རབ་ཀྱི་མིག་གི་སྟོབས་དང་། དེ་བཞིན་གཤེགས་པའི་བྱིན་གྱི་རླབས་ཀྱི་སྟོབས་དང་། སྨོན་ལམ་ཆེན་པོའི་སྟོབས་དང་། སྙིང་རྗེ་ཆེན་པོའི་སྟོབས་དང་། ཤིན་ཏུ་སྦྱངས་པའི་མངོན་པར་ཤེས་པའི་སྟོབས་དང་། དགེ་བའི་བཤེས་གཉེན་གྱིས་ཡོངས་སུ་བཟུང་བའི་སྟོབས་ཀྱིས་ཆོས་ཀྱི་ལུས་ཡོངས་སུ་དག་པ་དུས་གསུམ་དུ་ཐ་མི་དད་པ་ཐོབ་པར་གྱུར་ཏོ། །བླ་ན་མེད་པའི་གཟུགས་ཀྱི་ལུས་འཇིག་རྟེན་ཐམས་ཅད་ལས་མངོན་པར་འཕགས་པ་འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་ཐམས་ཅད་དུ་རྗེས་སུ་སོང་བ་སངས་རྒྱས་ཀྱི་ཞིང་ཐམས་ཅད་དུ་རབ་ཏུ་གཞོལ་བ། ཐམས་ཅད་དུ་རབ་ཏུ་གནས་པ་རྣམ་པར་འཕྲུལ་པ་ཐམས་ཅད་རྣམ་པ་ཐམས་ཅད་དུ། སྟོན་པ་འགྲོ་བ་ཐམས་ཅད་ཀྱི། ཡིད་དུ་འོང་བ་ཡང་ཡོངས་སུ་སྦྱངས་སོ།