ཚོང་དཔོན་གྱི་བུ་ནོར་བཟངས་དང་། སྐྱེ་བོའི་ཚོགས་ཆེན་པོ་དེ་དག་ཆོས་དང་མཐུན་པའི་གཏམ་གྱིས་བསྟན་ཏེ། ཡང་དག་པར་བསྐུལ་ནས་སྤྲོ་བ་བསྐྱེད་དེ། དགའ་བར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཙུད་དེ། སྔོན་གྱི་དགེ་བའི་རྩ་བ་ཡོངས་སུ་དྲན་པར་བྱས་ནས། སྐྱིད་པའི་འབྱུང་གནས་ཀྱི་གྲོང་རྡལ་དེའི་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཆོས་བསྟན་པས། བྱིན་གྱིས་བརླབས་ཏེ་བདེ་བར་བྱས་ནས་དེ་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་འཇམ་དཔལ་གཞོན་ནུར་གྱུར་པ་ལས་རྣམ་པ་དེ་ལྟ་བུའི་སངས་རྒྱས་ཀྱི་ཡོན་ཏན་དང་། ཆེ་བ་ཉིད་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མོས་ཤིང་བརྩོན་པས་ཕྱི་བཞིན་དུ་འབྲང་སྟེ། འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་མངོན་པར་བསྟོད་དོ། །བློ་གྲོས་ཆེན་པོ་མཐའ་ཡས་སྤྱོད་ཡུལ་ཅན། །ཁྱོད་ཀྱི་མཐུས་ནི་སེམས་ཅན་སྨན་སླད་དུ། །བདག་ཀྱང་བྱང་ཆུབ་མཆོག་ཏུ་ཞུགས་པར་གྱུར། །དེ་ལ་ངེས་པ་གང་མཆིས་བདག་ལས་གསོན། །དགའ་བའི་ཆུས་བཀང་འོབས་ཀྱིས་ཀུན་ནས་བསྐོར། །ང་རྒྱལ་དྲེགས་པའི་ར་བ་མཐོ་བར་བརྩེགས། །སེམས་ཅན་ལམ་རྒྱུད་སྒོ་རྣམས་བཙུད་ཅིང་གདངས། །དེ་འདྲའི་ཁྱིམ་ནི་སྲིད་གསུམ་མིང་ལྡན་ཆེ། །དེ་ནི་གཏི་མུག་མ་རིག་གཟིངས་པས་ཁེབས། །འདོད་ཆགས་ཞེ་སྡང་མེ་ལྕེས་རབ་ཏུ་གདུངས། །རྟག་པར་བདུད་ཀྱི་དབང་པོའི་དབང་དུ་གྱུར། །དེ་ལ་བྱིས་པ་མ་རིག་རྟེན་ཀྱང་འཆའ། །སྲེད་པའི་སྒྲོག་དང་ཞགས་པས་ཤིན་ཏུ་གླགས། །གཡོ་དང་སྒྱུ་ཡི་སྐྱོན་གྱིས་ཐོ་བཙམས་ཤིང་། །ཐེ་ཙོམ་ཡིད་གཉིས་དག་གིས་མིག་མདོངས་པ། །ལོག་པ་ཕྱིན་ཕྱོགས་ལམ་ལ་རབ་ཏུ་ཞུགས། །ཕྲག་དོག་སེར་སྣའི་ཐག་པས་བཏགས་ཤིང་བཅིངས། །ཡི་དགས་བྱོལ་སོང་སེམས་དམྱལ་མི་ཁོམ་རྒྱུ། །རྒ་ཤི་ན་དང་སྐྱེ་བས་རབ་ཏུ་མནར། །མགོ་རྨོངས་ལམ་རྒྱུད་འཁོར་ལོ་ཀུན་ཏུ་འཁོར། །དེ་ལ་ཁྱོད་ནི་ཐུགས་རྗེ་རྣམ་དག་པའི། །དཀྱིལ་འཁོར་ཡེ་ཤེས་འོད་ཟེར་སྣང་བ་མཛད།