ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་རིགས་སུ་སྐྱེད་པས་བྱང་ཆུབ་སེམས་དཔའ་རྣམས་ཀྱི་ཚེའི་ས་སྟེ། རིགས་ཀྱི་བུ་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །རིགས་ཀྱི་བུ་ཐབས་མཁས་པ་ནི་བྱང་ཆུབ་སེམས་དཔའ་རྣམས་ཀྱི་ཕའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་མའོ། །སྦྱིན་པའི་ཕ་རོལ་ཏུ་ཕྱིན་པ་ནི་འོ་མའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་མ་མའོ། །བཟོད་པའི་ཕ་རོལ་ཏུ་ཕྱིན་པ་ནི་ལྷབ་ལྷུབ་དང་རྒྱན་ཏོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་བསྐྱེད་པའོ། །བསམ་གཏན་གྱི་ཕ་རོལ་ཏུ་ཕྱིན་པ་ནི་སྤྱོད་པ་རྣམ་པར་དག་པར་བྱེད་པའོ། །དགེ་བའི་བཤེས་གཉེན་རྣམས་ནི་བསླབ་པ་ལ་སྤྱོད་དུ་འཇུག་པའོ། །བྱང་ཆུབ་ཀྱི་ཡན་ལག་ཐམས་ཅད་ནི་གྲོགས་པོའོ། །དགེ་བའི་རྩ་བའི་ཆོས་ཐམས་ཅད་ནི་གཉེན་བཤེས་སོ། །བྱང་ཆུབ་སེམས་དཔའ་ཐམས་ཅད་ནི་ཕུ་ནུའོ། བྱང་ཆུབ་ཀྱི་སེམས་ནི་རིགས་སོ། །ནན་ཏན་ནི་རིགས་ཀྱི་ཆོས་སོ། །སའི་གནས་ནི་རིགས་ཀྱི་གནས་སོ། །བཟོད་པ་ཐོབ་པ་ནི་རིགས་སུ་རིགས་དང་ལྡན་པར་སྐྱེས་པའོ། །སྨོན་ལམ་མངོན་པར་བསྒྲུབ་པ་ནི་རིགས་ཀྱི་གཞུང་ཐོབ་པའོ། །སྤྱོད་པ་རྣམ་པར་དག་པ་ནི་རིགས་ཀྱི་ཆོས་ཀྱི་རྗེས་སྙེགས་པའོ། །ཐེག་པ་ཆེན་པོ་ལ་ཡང་དག་པར་བསྐུལ་བ་ནི་རིགས་ཀྱི་རྒྱུན་མི་གཅོད་པའོ། །དབང་བསྐུར་ནས་ཚེ་གཅིག་གིས་ཐོགས་པ་ནི་ཆོས་ཀྱི་རྒྱལ་པོའི་སྲས་ཀྱི་ཐུ་བོའོ། །དེ་བཞིན་གཤེགས་པ་ཉིད་དུ་ཡང་དག་པར་བསྒྲུབ་པ་ནི་རིགས་ཀྱི་རྒྱུད་ཡོངས་སུ་དག་པ་སྟེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའི་བྱིས་པ་ཐ་དད་པའི་སྐྱེ་བོའི་ས་ལས་ཤིན་ཏུ་འདས་པ་ཡིན། བྱང་ཆུབ་སེམས་དཔའི་སྐྱོན་མེད་པར་ཞུགས་པ་ཡིན། དེ་བཞིན་གཤེགས་པའི་རིགས་སུ་ཡང་དག་པར་བྱུང་བ་ཡིན། དེ་བཞིན་གཤེགས་པའི་རྒྱུད་ལ་རབ་ཏུ་གནས་པ་ཡིན། དཀོན་མཆོག་གསུམ་གྱི་རིགས་རྒྱུན་མི་གཅད་པ་ལ་ཞུགས་པ་ཡིན། བྱང་ཆུབ་སེམས་དཔའི་རིགས་ཡོངས་སུ་བསྡུ་བ་ལ་མངོན་པར་བརྩོན་པ་ཡིན།