།བསམ་གཏན་ལ་སྙོམས་པར་འཇུག་གོ །ཤེས་རབ་ཀྱིས་རྣམ་པར་དབྱེ་བ་ལ་བརྩོན་ནོ། །བྱང་ཆུབ་སེམས་དཔའ་ཆེ་གེ་མོ་ཞིག་ནི་དམ་པའི་ཆོས་ཡོངས་སུ་བཙལ་བའི་དོན་དུ་རྒྱལ་པོའི་སྲིད་ཡོངས་སུ་གཏོང་བར་བྱེད་དོ། །རིན་པོ་ཆེ་ཡོངས་སུ་གཏོང་བ་དང་། བུ་ཡོངས་སུ་གཏོང་བ་དང་། ཆུང་མ་ཡོངས་སུ་གཏོང་བ་དང་། རྐ་ལག་དང་མྱིག་དང་། མགོ་ཡོངས་སུ་གཏོང་བ་བྱེད་དོ། །མྱེར་མཆོང་བ་བྱེད་དོ། །བྱང་ཆུབ་སེམས་དཔའི་མིང་དང་ཆེ་གེ་མོ་ཞིག་གིས་ནི་དེ་བཞིན་གཤེགས་པའི་བསྟན་པ་བཟུང་སྟེ། ཆོས་སྨྲ་བར་བྱེད་དོ། །ཆོས་ཀྱི་སྦྱིན་པ་གཏོང་ངོ་། །ཆོས་ཀྱི་མཆོད་སྦྱིན་བྱེད་དོ། །ཆོས་ཀྱི་རྒྱལ་མཚན་སྒྲེང་ངོ་། །ཆོས་ཀྱི་རྔ་རྡུང་ངོ་། །ཆོས་ཀྱི་དུང་འབུད་དོ། །ཆོས་ཀྱི་ཆར་འབེབས་སོ། །དེ་བཞིན་གཤེགས་པའི་བསྟན་པ་འཛིན་ཏོ། །དེ་བཞིན་གཤེགས་པའི་མཆོད་རྟེན་བརྒྱན་པ་བྱེད་དོ། །དེ་བཞིན་གཤེགས་པའི་སྐུ་གཟུགས་བརྒྱན་པ་བྱེད་དོ། །སེམས་ཅན་ལ་བདེ་བའི་ཡོ་བྱད་ཀྱིས་སྡུད་དོ། །དམ་པའི་ཆོས་ཀྱི་མཛོད་སྲུང་ངོ་ཞེས་བྱ་བའི་སྒྲ་ཐོས་སོ། །ལ་ལ་ལས་ནི་འཇིག་རྟེན་གྱི་ཁམས་ཆེ་གེ་མོ་ཞིག་ཅེས་བྱ་བ་ན། དེ་བཞིན་གཤེགས་པ་མཚན་ཆེ་གེ་མོ་ཞེས་དབང་བསྐུར་བ་མྱིང་དང་ཆེ་གེ་མོ་ཞིག་གིས་འཁོར་འདི་ལྟ་བུ་ཞིག་ན་སངས་རྒྱས་ཀྱི་ཞིང་འདི་ལྟ་བུ་ཞིག་དང་། བསྐལ་པ་འདི་ལྟ་བུ་ཞིག་ལ་སྐུ་ཚེའི་ཚད་འདི་ཙམ་ཞིག་དང་ཆོས་བསྟན་པ་འདི་ལྟ་བུ་དང་། སེམས་ཅན་འདུལ་བ་འདི་འདྲ་བ་དང་། འདི་ལྟ་བུའི་སྨོན་ལམ་གྱི་མངོན་པར་འཚང་རྒྱ་བས་ད་ལྟར་བཞུགས་ཤིང་འཚོ་སྐྱོང་ངོ་ཞེས་བྱ་བ་དང་། དེ་བཞིན་དུ་དྲིལ་དང་དྲིལ་བུ་གཡེར་ཀའི་དྲ་བ་དང་། རོལ་མོ་ལ་སྩོགས་པའི་དམིགས་པ་ཐམས་ཅད་ལས་ཆོས་ཀྱི་སྒོ་རྣམ་པ་ཐ་དད་པ་ཚད་མེད་པའི་སྒྲ་ཐོས་པར་གྱུར་ཏེ། སྒྲ་དེ་དག་ཐམས་ཅད་ཐོས་པས་ཚོང་དཔོན་གྱི་བུ་ནོར་བཟངས་དགའ་བའི་ཤུགས་རྒྱ་ཆེན་པོས་མངོན་པར་བརླན་པའི་སེམས་ཀྱིས་ཆོས་ཀྱི་སྒོ་དེ་དག་ཐོས་ནས་ལ་ལར་ནི་གཟུངས་ཀྱི་སྒོ་མང་པོ་ཐོབ་པར་གྱུར་ཏོ།