།དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་ས་ལ་སློབ་པས་སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་བྱ་བ་ལ་ཡང་དང་པོར་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་པ་ལ་ཡང་དག་པར་གནས་པ་སྔོན་དུ་འགྲོའོ། །རིགས་ཀྱི་བུ་འདི་ལྟ་སྟེ་དཔེར་ན། སྒྱུ་མའི་མཁན་པོ་སྒྱུ་མའི་རྣམ་པ་དང་ཡུལ་ཐམས་ཅད་ཡོངས་སུ་སྟོན་པའི་བྱ་བ་ཐམས་ཅད་ནི་དང་པོར་སྔགས་ཀྱི་དངོས་གྲུབ་མངོན་པར་བསྒྲུབ་པ་ཡིད་ལ་བྱས་ན་འགྲུབ་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་ཡུལ་དང་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པའི་སངས་རྒྱས་དང་བྱང་ཆུབ་སེམས་དཔའི་ཡུལ་ཐམས་ཅད་ལ་ཡང་དང་པོ་སེམས་བསྐྱེད་པའི་སྨོན་ལམ་མངོན་པར་བསྒྲུབ་པ་ནི་ཡོངས་སུ་གྲུབ་པ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། སྒྱུ་མའི་སྔགས་དང་རིག་སྔགས་ཐམས་ཅད་ནི་གཟུགས་མེད་པ་ལ་བསྟན་དུ་མྱེད་པ་ཡིན་ཡང་སེམས་བསྐྱེད་པས་སྒྱུ་མའི་སྤྲུལ་པ་དང་གཟུགས་ཀྱི་རྣམ་པ་ཐམས་ཅད་ཡོངས་སུ་སྟོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡང་གཟུགས་མེད་པ་ལ་བསྟེན་དུ་མེད་དེ། ཆོས་ཀྱི་དབྱིངས་ཐམས་ཅད་སེམས་བསྐྱེད་པ་ལ་དབང་བསྒྱུར་བ་ཙམ་གྱིས་ཆོས་ཀྱི་དབྱིངས་ཐམས་ཅད་ཡོན་ཏན་གྱི་རྒྱན་རྣམ་པར་ཕྱེ་བ་ཐམས་ཅད་ཀྱིས་རྣམ་པར་སྒྲུབ་བོ། །རིགས་ཀྱི་བུ་འདི་ལྟ་སྟེ་དཔེར་ན། བྱི་ལའི་མིག་གིས་བལྟས་པ་ཙམ་གྱིས་བྱི་བ་ཐམས་ཅད་ཀུན་ཏུ་འབྱེར་རོ། །དེ་བཞིན་དུ་བྱང་ཆུབ་སེམས་དཔའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་པའི་སྦྱོར་བ་ཙམ་གྱིས་ལས་དང་ཉོན་མོངས་པ་ཐམས་ཅད་འབྱེར་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། འཛམ་བུ་ཆུ་ཀླུང་གི་གསེར་གྱི་རྒྱན་བཏགས་ན་རྒྱན་ཐམས་ཅད་ཟིལ་གྱིས་གནོན་ཏོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་འཛམ་བུ་ཆུ་ཀླུང་གི་གསེར་གྱི་རྒྱན་ཐོགས་པ་ཡང་ཉན་ཐོས་དང་རང་སངས་རྒྱས་ཐམས་ཅད་ཀྱི་ཡོན་ཏན་གྱི་རྒྱན་ཟིལ་གྱིས་གནོན་ཏོ། །ཟིལ་དུ་རླག་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་བ་ཁབ་ལོང་གི་རྒྱལ་པོའི་ཁམས་ཇི་ཙམ་དུ་ཆུང་ཡང་ལྕགས་སྒྲོག་སྲ་བ་ཐམས་ཅད་ཞིག་པར་བྱེད་དོ།