ཡོན་ཏན་གྱི་གཏམ་ཐམས་ཅད་ཀྱང་ཡོངས་སུ་འགགས་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོ་བ་དང་། མ་ཧེ་དང་། རའི་འོ་མས་ཡོངས་སུ་གང་བའི་ནང་དུ་སེང་གེའི་འོ་མ་ཐིགས་པ་གཅིག་བླུགས་པས་འོ་མ་དེ་དག་ཐམས་ཅད་འགྱེས་པར་འགྱུར་ཏེ་འདུར་མི་གཏུབ་བོ། །དེ་བཞིན་དུ་བསྐལ་པ་བརྒྱ་ཕྲག་སྟོང་དུ་བསྩགས་པའི་ཉོན་མོངས་པ་ཀུན་གྱི་འོ་མའི་རྒྱ་མཚོར་ཡང་དེ་བཞིན་གཤེགས་པ་སྐྱེས་བུའི་སེང་གེ་ཆེན་པོའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་འོ་མ་ཐིགས་པ་གཅིག་བླུགས་པས་ཐམས་ཅད་མ་ལུས་པར་ཟད་པར་འགྱུར་ཏེ། ཉན་ཐོས་དང་རང་སངས་རྒྱས་ཐམས་ཅད་ཀྱི་རྣམ་པར་ཐར་པ་རྣམས་ཀྱང་མི་གནས་མི་འདུའོ། །རིགས་ཀྱི་བུ་འདི་ལྟ་སྟེ་དཔེར་ན། བྱ་ཀ་ལ་པིང་ཀའི་ཕྲུ་གུ་སྒོ་ངའི་སྦུབས་ནས་མ་བྱུང་བ་ལ་ང་རོའི་མཐུའི་ཁྱད་པར་ཡོད་པ་དེ་ལྟ་བུ་ནི། གངས་ཀྱི་རི་ལ་གནས་པའི་བྱའི་ཚོགས་མཐུ་དང་ཤུགས་ཐམས་ཅད་ཡོངས་སུ་རྫོགས་པ་ཐམས་ཅད་ལ་ཡང་མེད་དོ། །དེ་བཞིན་དུ་བྱང་ཆུབ་སེམས་དཔའ་ཀ་ལ་པིང་ཀའི་ཕྲུ་གུ་ལས་དང་པོ་བ་འཁོར་བའི་སྒོ་ངའི་སྦུབས་ན་འདུག་པ་ལ་སྙིང་རྗེ་ཆེན་པོ་དང་བྱང་ཆུབ་ཀྱི་སེམས་ཀྱི་ང་རོ་མཐུའི་ཁྱད་པར་ཡོད་པ་དེ་ལྟ་བུ་ནི་ཉན་ཐོས་དང་རང་སངས་རྒྱས་ཐམས་ཅད་ལ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། ནམ་མཁའ་ལྡིང་ཆེན་པོའི་ཕྲུ་གུ་སྐྱེས་ནས་རིང་པོ་མ་ལོན་པ་ལ་གཤོག་པའི་རླུང་གི་སྟོབས་དང་མཐུ་བདོག་པ་དང་། མྱིག་ཡོངས་སུ་དག་པའི་ཡོན་ཏན་ཡོད་པ་དེ་ལྟ་བུ་ནི་དེ་མ་ཡིན་པའི་བྱ་ལུས་ཚད་དུ་ཕྱིན་པ་གཞན་ཐམས་ཅད་ལ་ཡང་མེད་དོ། །དེ་བཞིན་དུ་དེ་བཞིན་གཤེགས་པ་ནམ་མཁའ་ལྡིང་ཆེན་པོའི་རིགས་དང་རྒྱུད་དུ་བྱུང་བའི་བྱང་ཆུབ་སེམས་དཔའ་ནམ་མཁའ་ལྡིང་ཆེན་པོའི་ཕྲུ་གུ་སེམས་དང་པོ་བསྐྱེད་པ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་གཤོག་པའི་རླུང་གི་སྟོབས་དང་ཤུགས་བདོག་པ་དང་། སྙིང་རྗེ་ཆེན་པོ་དང་ལྷག་པའི་བསམ་པའི་མྱིག་ཡོངས་སུ་དག་པའི་ཡོན་ཏན་ཡོད་པ་ནི་ཉན་ཐོས་དང་རང་སངས་རྒྱས་བསྐལ་བ་བརྒྱ་སྟོང་ཚང་བས་བྱུང་བ་ཐམས་ཅད་ལ་མྱེད་དོ།